شلون ما رديت إليه .. وإحنه نتنفس سويه
اشأخرك مو انته تدري .. بغير إديك اتموت إديه
..
ابيا وگت لو ردت اشوفك ما اشوفك
وإنته المعلمني اموت وما اعوفك
دفعوا الباب وذكرت إعليه خوفك
ماردت سيفك ردت ريحة جفوفك
همه يمي وروحي يمك .. ياعلي الكـاتلهم إسمك
وعلى عنادك صار غدري .. بغير إديك اتموت إديه
__________________
دخلوا الدار ولذت من شتموني
صحت ليش ودفعوا الباب وولوني
الباب والحايط بچن من گابلوني
صحت وينك ياعلي وسطروا اعيوني
خدي ازرگ من اديهم .. الله لا يرضى عليهم
خسروني أحلام عمري .. بغير إديك اتموت إديه
__________________
ماشفتهم بس شفت موتت شبابي
ابضلعي چلب ما قبل ينطيني بابي
لجل ستري اتحملت شوغة عذابي
أغله من ابني شفت لزمة حجابي
طاح مثل السبحة مني .. بگلبي اصيح اسم الله يبني
خفت لا ينسمع كسري .. بغير إديك اتموت إديه
__________________
سيف اصير اگبالهم لو عندي واجب
لكن آنه الزهره والعدوان اجانب
أگدر ادعي وما دعيت إعله النواصب
خفت اشيلن راسي وتطيح الكواكب
للدعاء ما كلفّ إيدي .. الله أقرب من وريدي
سلمت للباري أمري .. بغير إديك اتموت إديه
__________________
اعيالي يم راسي بچه غالي ويه غالي
شفت زينب رادت اتموت ابدالي
والحسن بيميني وحسين ابشمالي
سورة الكوثر علي بإذني قرالي
گمت أسمعهم واغمض .. حيلي مات وگلبي يركض
بالنفس چتفني دهري .. بغير إديك اتموت إديه
__________________
روحي طلعت تشتكيلك من ونيني
عگب ذاكه النور صارت حمره عيني
متت بس ماراح من وجهي حنيني
لگبري جيب اولادي لمن تعتنيني
من تجيني إيفض نحيبي .. بصوتك من أسمع حبيبي
لاتظن يمنعني گبري .. بغير إديك اتموت إديه
__________________
ياعلي ادفني ابظلام وطفي شمعي
ما أريد المو زلم يم گبري تدعي
انه اريد الكلبه حار الجَنه دمعي
المحترگ گلبه عليّ يندله ضلعي
الجنة باچر للبجالي .. النار للظلموا عيالي
من أشوفك يطفه جمري .. بغير إديك اتموت إديه
__________________
كلمات الشاعر - حسام الحمزاوي
أنت تقرأ
كلمات لطميات باسم الكربلائي وغيره من الرواديد ١
De Todoكلمات لطميات باسم الكربلائي و غيره من الرواديد اجمل صوت في هذه الدنيا اكتبوا قصيدتكم المفضلة في التعليقات وان شاء الله اكتبهه الكم❤️😊
