كلمات لطميات باسم الكربلائي وغيره من الرواديد ١

٦.اقطع الكلام

قصيدة إقطع الكلام مكتوبة
الشاعر عبد الخالق المحنه
ليلة ٧ محرم ١٤٣٩ العاشور

اقطع الكلام
سيفي يتكلم وأريد الكل يسمعه
صولة الختام
لو جبل باب الشريعه اليوم اقلعه
هذي خيبر وآني حيدر

قل هو الله احد أبدأ كلامي
واشهرت سورة براءه مو حسامي
مصحف وكعبه ومحمد في خيامي
وآني حيدر وأبرهه ومرحب أمامي
فيل ولا حجر , باب ولا نهر
هذا المختصر , من ينازل !
صاحت الطفوف
هيه كلمه الزينب ومابيها رجعه
بلغ الألوف
گِلهم العباس قادم من يمنعه !
كلشي أگدر و آني حيدر
●●●
في بدر نادى المنادي عالبريه
لا فتى الا علي حامي الحميه
هالندا من زينب تكرر إليّه
لا فتى إلا أنا في الغاضريه
حيدر هل أتى , غيره لا فتى
واسمع نخوته , يابو فاضل
دمدم الإله
يلا يا خير فتى بعد الصميده
يا شايل لواه
اهجم عليهم غضنفر عَطِّر إيده
خلها تصفر واني حيدر
●●●
يا علي وراية أحد صارت نشيدي
والتلوگ الايدك تلوگ اعله ايدي
اني شايلها تره ويشهد عضيدي
لو وگع چفي أركزها بوريدي
رايتنه ستر , ماتنزل شبر
بيدي تستقر , چف مراجل
جمّع الرجال
بلكي من يكثر عددهم يملي عيني
أدري بالمحال
ترعب السبعين ألف فارس حسيني
موت الأحمر واني حيدر
●●●
ترتجز بالخندق و كِلَّك معاجز
مِن ضَربةٍ وذِكْرُها عند الهزاهز
وآني مثلك ارتجز لمن أبارز
آنه اخو زينب وأرجعهم جنايز
الگطهم لگط , وعيونج شرط
بالنص بالضبط , واني قائل
والرفع سماه
الا هالسبعين ألف اگطع خبرهم
والعلي وعلاه
ما أخليهم ولا اخلي اثرهم
سيفي قرر واني حيدر
●●●
والدي يوم الفتح كَسّر صنمهم
وآني ابنه وعالنهر اكسر خشمهم
آني أمي فاطمة ومعروفه امهم
صارت بكيفي أطشرهم وألِمْهُم
والأمي القرأ , أفعل ما أشئ
واكتب هالنبأ , هذا عاجل
آمَر الأمير
اسجدوا والماسجد ما يلگه راسه
ساعة النفير
والشمر لا يختفي خلف الحراسه
خله يظهر وآني حيدر
●●●
هذي مو رايه تره زينب بچفي
والهوه يحاذر إذا مر اعله أنفي
الا اشيل المشرعه كلها اعله چتفي
للخيم واسأل سكينه هذا يكفي
لو قالت نعم , إي كافل يَ عم
رشي ع الخيم , والمحامل
ماصرت كفيل
لو تزاعلني سكينه هالحبيبه
والله والخليل
لو جبل يذبل تريده هم اجيبه
بيدي يزغر وآني حيدر
●●●
من إجه حسين ووضع ايده اعله متني
جنت أفور وإيد أخويه بردتني
صرت أحس الرايه كلش تعبتني
بين عليّه التعب والخيل اجتني
ضل عندي الأهم , جودي والعلم
نادت بالخيم , وآنه أحاول
نظره اعتذار
عمه يا سكنه العفو هذا نصيبي
والقلع جدار
لولا ايد حسين مايبرد لهيبي
سيد الكّر وآني حيدر
●●●
يا علي سامحني خاف مقصر آنه
عالنهر راح اترك چفوفي ولوانه
وبظهور المنتظر صاحب زمانه
گِلّه تاركلك ابو فاضل أمانه
من ايد الگمر , لإيد المنتظر
يا ثار النحر , والثواكل
ساعة الظهور
بيدي يرفعها وينادي واحسينا
فارس وغيور
گِلّه عطشان الرضيع وما روينا
خله يثأر وآني حيدر