جدامنه أنذال وغرب .. ما نگدر أنشيل الراس
وانخى من! ومحد عرف .. وحسين بلخيل إنداس
من طلعونه من الخيم .. گمنه انعثر بين الناس
واحد يگـل للثاني ها .. طلعن خوات العباس
عباس چن صاحوا مات
وانشافن العلويات
ماتنوصف رگضتنه
ماتنوصف رگضتنه
ياعباس .. ياعباس .. ياعباس
_______________________________
للتل شطت طيحة وركض .. وعيوني ليكم تربه
هوه التشب فوگـه الخيم .. يگدر يوچت دربه
مذهوله واعثر بالجثث .. والجثث وادم غربه
وميت إلـحسين ووگـف .. من صدره طالع گلبه
مسحوگ صدره ومگفاه
عريان ويصيح أحـا
واطشرت عشرتنه
واطشرت عشرتنه
ياعباس .. ياعباس .. ياعباس
___________________________________
ادنيت له اون وانتحب .. من شاف ماي ابمگفاي
عطشان وگتله انه .. العباس اخوي اشبع ماي
مچفي وچـوه اخدوده الرمل .. ياهو اليتچيله اوياي
فَـي الله حارگته الشمس .. ومنين اجيبله أفـياي
يزحفلي وافيش ايصيح
لوگام نص منه ايطيح
حيله انهدم زمتنه
حيله انهدم زلمتنه
ياعباس .. ياعباس .. ياعباس
___________________________
عباس لو شفت الزلم .. من دارت اعله الصيوان
ركضوا على خيامي الشرف .. وتلاگـو اويه النسوان
ميدان مابي بس غرب .. وتراكضن لـلـميدان
بين الجثث واتعثرن .. ويـلاا يشيمة عدنان
ماشفهن بس عباس
ملگه التگن ويه الناس
واتفرهدت شيمتنه
واتفرهدت شيمتنه
ياعباس .. ياعباس .. ياعباس
____________________________
طلعن ولا طلعن عسه .. تحني الظهر ركضتهن
مامره متوضي بحلم .. كضاهن وچتفهن
رادن يرگضن للنهر .. بس الحبل عثرهن
بلكي الكفلهن ينتهض .. بس ما گعد كافلهن
چم دوب يالفحطانات
اجدامچن مچويات
طيحاتچن هضمتنه
طيحاتچن هضمتنه
ياعباس .. ياعباس .. ياعباس
_____________________________
عباس باچر ننشتم .. وتسير بينه العدوان
باچر يالمبچي الزلم .. نحدي الزلم بالنسوان
يالچنت بالميدان امس .. هسه الحرم بالميدان
بر هسه واشرد لو ردت .. وين اشرد امن الديوان
لوطبوا اعلينه ألـواك
انعاك لو اترياك
لواگول اجت تحرسنه
لو اكول اجت تحرسنه
ياعباس .. ياعباس .. ياعباس
___________________________
كلمات الشاعر - احمد المشرفاوي
أنت تقرأ
كلمات لطميات باسم الكربلائي وغيره من الرواديد ١
عشوائيكلمات لطميات باسم الكربلائي و غيره من الرواديد اجمل صوت في هذه الدنيا اكتبوا قصيدتكم المفضلة في التعليقات وان شاء الله اكتبهه الكم❤️😊
