كلمات لطميات باسم الكربلائي وغيره من الرواديد ١

٢٧.الموت ارتبك

ماكو ريبة وماكو شك.. صعبة والموت ارتبك
هذا ملك الموت حاير بين الأمرين
بين أمر رب الجلالة وموت ابو حسين

صعبة صعبة ..

العلي اشتاك لعلي ابهاي المسيه
وشتياك المصطفى وبنته الزجيه
وده ملج الموت يم حامي الحميه
يقبض الروح الطهوره والنقيه

والملك ضل يستعد .. يوصل الباب ويرد

كرر الحالة ويحاول مره مرتين

بين أمر رب الجلالة وموت ابو حسين

صعبة صعبة ..

_________

ها يملج الموت أخرت المهمه
كله ارحمني يالهي وانته رحمه
ربي شفت حسين كاعد يبجي يمه
وانا شفت المرتضى لصدره يضمه

كلبي حتماً ينكسر .. وانا كاعد انتظر

كسر جناحي الونين ودمعة العين

بين أمر رب الجلالة وموت ابو حسين

صعبة صعبة ..

________

ياالهي روح حيدر ما خذتهه
والسبب ام الخدر تلطم شفتهه
استحيت ودرت وجهي وأجلتهه
من بجت زينب بجيت وكابلتهه

ربي اخرني الخجل .. من دمع زينب نزل

آني محتار بأمرها وأمر الثنين

بين أمر رب الجلالة وموت ابو حسين

صعبة صعبة ..

________

وصه حيدر والهواشم ثبتوهه
يا بني هاشم وصيتي اتذكروهه
هاذي زينب سلمتهه بيد اخوهه
يله يا عباس اخذهه من ابوهه

ها يعباس اشكلت ؟.. كله يابويه اكفلت

والله وعيونك لاجلهه افدي جفين

بين أمر رب الجلالة وموت ابو حسين

صعبة صعبة ..

_________

آ يزينب دمعتج تكسرلي ظهري
والله يابويه ابمحبتج الله يدري
هذا عزرائيل اجه ومتاني أمري
والزجيه تنتظر هسه اعله كبري

بويه يازينب ثقه .. بالطفوف الملتقه

من يسلبونج اذكرج هالوعد وين

بين أمر رب الجلالة وموت ابو حسين

صعبة صعبة ..

__________

نلتقي يوم هدعش وانتي سبيه
من تناديني يبويه الحك عليه
بويه انا ياوكت مجتوفه اديه
والشمر نادني ها يالهاشميه

بينج وبين الشمر .. اني اوكفلج ستر

هذا مو هسه يبنتي يجري بعدين

بين أمر رب الجلالة وموت ابو حسين

صعبة صعبة ..

_________

لاتخافين الشمر انتي وخواتج
والله مايكدر يمس خيط ابعباتج
روحي يم عباس واشكي نايباتج
ميت وضل مستحي ويطلب رضاتج

لاتراوينه المتن .. ينجرح يام الحزن

جرح ابو الغيره يزينب يعني جرحين

بين أمر رب الجلالة وموت ابو حسين

صعبة صعبة ..

_________

من يطيح حسين ميمونه يفزعج
روحي يمه والشمر ادري يدفعج
انا كبلج احضر المصرع واسمعج
ديري وجهج بويه لاينشاف دمعج

حاولي سد النظر .. من يكطعون النحر

من كفاه ايذبحه وانتي ابولية البين

بين أمر رب الجلالة وموت ابو حسين

صعبة صعبة ..