وقعت بخيته مغشيا عليها في الارض واثناء ذلك انتبهت بلقيس وقامت مفزوعه من المنظر الذي شاهدته وبقت تكورك ياعبدالحميد دي الحيوانه دي الجابها هنا شنو قوم علي حيلك وارميها برة بيتي دا وقام عبد الحميد منزعجا ياوليه دي برضو مرتي وام اولادي وانا بعزها شديد ...
بلقيس: ههههههها قال بعزها بري يايمه رجال الزمن ديل عندهم جنس محن وعينهم طايرة انت لو بتغزها كان رجعت لي واترجيتني ارجع ليك ..
اثناء ذلك عبدالحميد رفع بخيته من الارض وختاها فوق العنقريب وجاب موية ورشابها بخيته وصحت مفزوعه ومنططه عيونها وانتفضت من العنقريب وقامت جارية علي بيتها وبتكورك بطول حسها وعبدالحميد جاري وراها وبهدي فيها ياوليه استهدي بالله ماتفضحينا في الشارع وهنا ناس الحله وبتاعين الشمارات طلعو الشارع وبسألو المات منو المات منو ورونا الحاصل ...
عبدالحميد: مافي حاجه ياجماعه مشكله بسيطه واتحلت...
في المنزل كانت هند منتظرة جنب الباب وشافت منظر امها وهي بتكورك.
هند: امي امي في شنو ماتكوني ضربتي بلقيس .
امها: ياريت لو كان ضربتها اوكتلتها كدي زحي لي من الباب انا مافاضية ليك .
اثناء ذلك دخل حاج عبدالحميد المنزل وطوالي على الصالون وقفل الباب عليهو والغريبة بعد الجرية دي كلها ولا سألها ولا اعتزر ليها ..
هند : اجي امي وابوي ديل ما لم ربنا يجيب العواقب سليمه .
مشت هند لى امها وبقت تهدي فيها وجابت ليها كباية مويه من الزير وشربت الويه وهدت شويه.
هند: امي احكي لي الحصل شنو.
بخيته: الحصل يابتي مابتحكي ولا بتقال لقيت ابوكي فاقد الرجاء المابختشي دا قاعد مع بلقيس واخر ضحك وونسه .
هند: معقوله (حليمة رجعت لي قديمة) !!!
ابوي رجع لي بلقيس تاني .
بخيته : ايوة يابتي شكلو المجنونه دي عامله ليهو عمل .
هند: انا يا امي كرهت المدرسه عشان بلقيس تجي تشيل مني ابوي ماممكن اصلو دي شيطانه عديل، انا لازم امشي لابوي واخليهو يبعد عنها واحكي ليهو البتعملو فيني في المدرسه كل يوم.
بخيته: لا ياهند ماتمشي عليهو ابوك انا بعرفو من يوما وراسو قوي وانا قنعت منو نهائي .
هند: ماتقولي كدا يا امي دا برضو ابوي وانا بقنعو وهو بسمع كلامي .
ومشت هند علي الصالون عشان تتكلم مع ابوها .....
هل ياترا سوف تقنع والدها بالتخلي عن بلقيس ..
هذا ماسوف نشاهده في الحلقه القادمه ....
انتظرونا ولاتذهبو بعيدا ....
يتبع ...
