كورينا شمارات استلم الصور ومن شدة الدهشة خلى دكانو فاتح وطوالى جري علي بيت عبدالحميد ولقى عبد الحميد نايم يشخر وصحاهو من النوم وعبدالحميد قام مخلوع وكورك في كورينا انت ياوش البلاوي مالك عامل لي ازعاج من الصباح ....
كورينا : ازعاج هو بقت على الازعاج انا جايب ليك بلاوي متلتله....
عبدالحميد: بلاوي اكتر من النحن فيها دي ...
كورينا : هاك افتح الظرف وشوف براك البلاوي.....
عبدالحميد: فتح الظرف ولقى الصور ومن الخلعه مسك كورينا وبدا يخنق فيهو .... جبت الصور دي من وين .......وكورينا ماقادر اتكلم وقرب يروح فيها ...... وكورينا بعد صعوبة قدر يفلت منو وقال ليهو جاتني من الخرطوم ......
هنا عبد الحميد شال مخلايتو وسكينو وشال ليهو قريشات وطلع طوالى لموقف البصات ......
بلقيس استلمت الصور بالواتس وورت عثمان وقال ليها اكيد ديل يس وعصام ولدي يا انا ياهم في الدنيا دي وشال سكينو وطلع سريع........
بلقيس فكرت ورجعت محل الفندق ولقت الزول القاعد في الكاونتر وهددتو وركبت فيهو شريحة انو هي مسعوله ولو ماوراها حاتفصلو ومن الشغل وطوالي الشريحة قرت واعترف انو جوهو ناس مباحث سالو منك ومعاهم وواحد ضابط ونفرين تانين واحد منهم طويل واصفراني والتاني لونو قمحي.....
هنا بلقيس اتأكدت انو ديل يس وعصام و طلعت سريع وفي بالها الانتقام ثم الانتقام ..
في الحله :
صاحبنا كورينا ماخلي بيت ماحكى ليهو والشمار انتشر زي مرض الحسبة وحتي الحبشيات وستات الشاي الخبر وصلهم تب .....
حاجه بخيته سمعت الخبر واتكيفت شديد وشكرت ربنا انو بلقيس ظهرت علي حقيقتها ......
عبدالحميد وصل الخرطوم وبقي يفتش من فندق لي فندق وبسال عن طريق الخلفية الفي الصور حقت بلقيس وعثمان وبعد صعوبة لقي الفندق الكانو نازلين فيهو عثمان وبلقيس ودخل جوة وسال ناس الكاونتر وقالو ليهو الجماعة ديل كانو نازلين هنا وطلعو ..
وهنا عبد الحميد طلع ولسع منفوخ وناوي علي شر ..
الله يستر ويجيب العواقب سليمة ..
انتظرونا ولاتذهبو بعيدا....
الى اللقاء الحلقة القادمه.......
يتبع....
