هند وعصام طلعو من الحوادث وحولوهم لمستشفي خاص وبقو بتابعو مع الاخصائي وحالتم استقرت ......
وهند سألت يس وقالت ليهو ابوي حصل ليهو شنو .....
يس : البركه فينا وفيكم والدايم الله ....
هند: بدت تبكى ومن شدة الالم تعبت شديد..
يس : ياهند عشان صحتك اهدي شوية ودا قدر الله والحمد لله ربنا كتب ليك عمر جديد ....
هند: ونعم بالله ... انا المزعلني انو ابوى قبل ما اعمل الحادث اتغير وهو ضحي بحياتو عشاني ....
وانا لمن كنت مع عصام وطالعين من الجامعه سمعت صوت ابوي وهو بكورك لي العربية العربية ودفرني انا وعصام من قدام العربية وتاني ماوعيت الا وانا في المستشفي وهو ضحي بحياتو عشاني ....وهند بتحكي والدموع جارية .....
يس : الله يرحمو ويغفر ليهو .....
يس : لكين الزول الطعنكم منو بعد ما ابوي انقزكم ....
هند : انا دا الشي المحيرني ........
القسم :
تم القبض علي بلقيس علي يد افراد المباحث بالسجل المدني حيث كانت تقوم بتزوير رقم وطني بغرض السفر خارج السودان ...
مهند مشي علي القسم عشان يحضر استجواب بلقيس....
بعد ضغط كبير علي بلقيس اعترفت وسجلت ليها اعتراف قضائي وحكت كل التفاصيل من بداية المشاكل مع هند في المدرسة وحتي مقتل عبدالحميد.
إعترافات بلقيس:
*انا اسمى بلقيس احمد 44سنه من اصول مصرية من مواليد السودان ونشأت مع الوالد في الخرطوم ورحلنا الحله بعد وفاة ابى وزواج امي من الحله ،ووفاة الوالد اثرت فيني وبقيت اصاحب الاولاد واخدعهم بالعرس واتزوجهم عرفي واكل قروشهم ومن ضمنهم جعفر سواق العربية الليموزين وفي يوم شافني عثمان مع ولد في الساقية في وضع مخل ومن ديك بدا يبتزني ويجيني في البيت واي حاجه يطلبها اعملها ليهو وولدي الانتحر هو ابوهو ولمن انا وريتو اني حامل منو بقى يضغط فيني اكتر وهو كان شغال في السعودية ولمن يسافر بكون مرتاحه . ولمن عبدالحميد طلب يدي انا كنت حامل في الشهر الاول ووافقت وعرست عبدالحميد وكلمت عثمان انو نزلت الجنين وانو عبدالحميد طلب يدي للزواج ..
وهو قال لي ارفضي وحااتزوحك لمن ارجع السودان
وانا رفضت واتزوجت عبدالحميد ولمن انجبت ولدي المن عثمان سجلتو باسم عبد الحميد
وعثمان لمن جا السودان كان كل هدفو ينتقم من عبدالحميد ومني والمشاكل الحصلت لي عبدالحميد وبخيته وهند بتخطيط منو وهو العرفني علي عشوشه الوداعية وعملنا عمل لعبدالحميد عشان يخلي بخيتة وعملنا عمل لهند عشان تعرسو...
وانا كنت بضرب هند في المدرسة بتوجيةمنو هو وكل الحاجات الكنت بعمل فيها قصبا عني...
ولمن ضرب بخبتة بالسكين انا كنت معاهو في غرقتو وبخيته شافتنا مع بعض بس الحادث نساها ...
وهو جبرني ادفع قروش الغرامه بتاعت المحكمة وقال لى اسرقيها من بخيته وسرقتها ومعاها قروش الدكان ...
كانت بلقيس بتحكي وهي بتبكي بحرقة ...
مهند : واصلى واصلى مافى شيطانة بتبكي ....
بلقيس: بعد داك عثمان ضرب لي وقال لي تعالي الخرطوم ومشيت ليهو ونزلنا في الفندق لحدي ما عرفنا انو يس وعصام كشفونا ....
مهند: والقسيمة جبتيها من وين ؟
بلقيس: انا اتعلمت التزوير وبزور اي حاجه وحتي الشهادة بتاعت التدريس مزوراها ...
مهند: اها احكي كيف قتلتو عبدالحميد؟
بلقيس: لمن طلعنا من الفندق بقينا بنراقب في هند وعصام وعثمان كان داير يقتل عصام ولدو عشان يفوز بهند ولانو كانت مكسراهو شديد ومجنون بيها وحالف انو يعرسها حتي ولو بالحرام ..
وفي يوم الحادث عثمان كان متفق مع واحد انو عصام وهند لم يطلع من الجامعه بمسافه يقوم يضرب عصام عشان يكون حادث عادي ونحنا وقفنا بعيد وبنعاين بس الخطه مامشت تمام وظهر لينا عبد الحميد وخرب الخطه ........
مهند : تابعي ماعندنا ليك زمن......
يتبع ....
