بعد مغادرة حاج عبدالحميد بيت بخيته بكم يوم ازدادت المشاكل واصبحت متراكمه ومعقدة شديد وخاصه انو حاج عبدالحميد كان العائل الوحيد للاسرة ومع انو كان فقران وحالو بالبلا وبعد دا كلو كان جبار الجنيه بطلعو بصعوبه ماعلينا المهم انو حاجه بخيته اصبحت مصدر دخل الاسرة الوحيدة ولازم تشوف ليها اي شغله توكل بيها اولادها وترسل مصاريف لي يس الطالب في الجامعه وعشان توفر علاجات يوسف المريض وغير مصاريف هند في المدرسه .
مرت الايام علي اسرة بخيته والحال يغني عن السؤال والمعروف في القري انو عيب تطلب المساعدة من الاهل الا يحسو هم براهم ويساعدوك ومافي حاجه اسمها نفقه دي عادات وتقاليد .
في صباح يوم كان الجو حار جدا صحت هند من النوم جعانه شديد ليها كم يوم يتاكل سخينه وكسرة بموية وملح ومشت على المطبخ لكي تلقى ليها لقمه تاكلها لقت امها بتعمل في حله كمونية ومافضل ليها الا تكورك من الفرحه اخيرا الليله حاناكل حاجه سمحه وسألت امها جبتي الكمونيه من وين امها قالت ليها دا عمك عثمان جارنا رسل ولدو وجاب لينا كمونيه ولحمه راس ماقصر معانا ربنا يجزيهو خير.
بعد الفطور هند عملت الشاي وجات قعدت مع امها بخيته.
هند: امي انا عارفه الحمل عليك كتير عشان كدا عايزة اخلي المدرسه واشتغل عشان اساعدك في مصاريف البيت.
بخيته: دا كلام شنو يابتي مافي حاجه اسمها اخلي المدرسه وانا مشيت وين وتاني حاجه انتي لو خليتي المدرسه حاتشتغلي شنو .
هند: اي حاجه وخلاص ياامي المهم اشتغل او اشتغل في المركز الصحي فراشية.
بخيته: ياهند انتي لسع صغيرة علي كلام الشغل لمن تكبري وتقري الجامعه وبعد داك ممكن تشتغلي وانا امنيتي من زمان انك تبقي دكتورة كبيرة وتتخصصي وتعالجي اخوك يوسف .
هند : انتي عارفه ياامي قرايه الطب طويله لحدي اتخرج ومصاريف كتيرة ونحنا الفينا مكفينا .
بخيته: انا بكرة بمشي السوق وعندي غويشات ودهب ببيعو والقروش بفتح بيها دكان ابوك القديم بشتغل فيهو لحدي ماربنا يفرجا علينا.
هند: ماعارفه اقول ليك شنو ياامي ربنا مايحرمنا منك ويخليك لينا يا احلى ام في الدنيا.
واثناء الحوار الجميل بين هند وامها قطع حديثهم صوت هاتف بخيته يضرب وشالت هند التلفون وبلهفه دا يس يا امي وردت الو يس كيف والله مشتاقين ليك كتير
يس بنبره حاده: انا يومي بضرب ليكم وما وريتوني بالمشكله الحصلت الا اسمع بيها من الحله وكمان من كورينا بتاع الشمارات
هند :ما كدا يا اخوي بس ماحبينا نشغلك وافتكرنا انو الموضوع بسيط وبتحلا وقلنا مانزيد همومك ساي.
يس: انتو كدا زتوها لي زيادة بانكم ماتوروني على الاقل كنت ضربت لى ابوي ويمكن كنت اصل معاهو لي حل .
بخيته مقاطعه حديث هند كدي اديني ليهو ياهند .
يس : كيفك يا امي والله مشتاق ليكم كتير .
بخيته: والله ياولدي ما تتصور الايام الفاتت دي عدت علينا كيف بس نقول الحمد لله.
يس: انا زعلان منكم عشان ماوريتوني بالحصل وما اسمع الا من الحله .
بخيته: معليش ما كنا عايزين نكتر همومك وانت عارف ابوك دا ياهو طبعو من زمان وعينو طايرة ولابجدع ولابجيب الحجار.
يس: والمصاريف الجاتني مع جعفر جبتوها من وين .
بخيته:اتصرفت عندي باقي قريشات قديمه كنت داساهم عند عاشه بت نورين .
يس: الله يقدرنا علي جزاك يا امي .
بخيته : اها ياولدي جاي البلد متين مش خلصت الامتحانات .
يس: ايوة بس ماجاي .
بخيته : مالك ماداير تسلم علينا والا شكلك وافق في صف ابوك
يس:هههه ماكدا يا امي بس انا عشان اساعدكم في المصاريف لي فترة مشيت ناس الهدف واشتغلت معاهم واسع تميت شهر وصرفت مرتب 700 جنية ورسلت ليكم 500 مع جعفر بصل بكرة ان شاء الله .
بخيته ودمعوعها جارية: الله يخليك لينا يا يس وربنا يشوفنا جديدك ونشيل وليدك وماكان تعمل كدا الشغل متعب وبأثر في قرايتك وانا اسع بكرة ماشه السوق عشان ابيع دهيباتي وافتح دكان ابوك القديم
يس: انا عارف الظروف بقت ضاقطه شديد عشان كدا وصيتي ليك ياامي انو هند تتعلم كويس وتخش كليه الطب وترفع راسنا .
بخيته : انشاء الله وربنا يوفقك دنيا واخرة .
يس : مامشكله انتو استحملو الفترة دي لحدي مااخلص الجامعه وانا لو ماقربت انتهي كان جمدت الجامعة وعشان كدا اشتغلت مع ناس الهدف ..
بخيته : ربنا يحفظك ياولدي ويعلي مقامك..
اتهت المكالمه بين يس وامه واخته وكانت الفرحه تتطل على هند انو الامور اتسهلت شوية.
مرت الايام وحاج عثمان جار ناس بخيته كل يوم جايب كيس وخضروات لناس هند لحدي ما يوم من الايام مشت بخيته لي منزل حاج عثمان وشكرتو علي المعروف وورتو انو يس اشتغل وهي فتحت الدكان وامورهم ماشه في افضل حال .
وحاج عثمان قال ليها دا واجبي وانتو جيراني والرسول (ص) وصانا علي سابع جار .
هل ياترا هذا مقصد حاج عثمان من الجاحات البجيبا لناس بخيته وام هنالك مأرب اخري لحاج عثمان ...
هذا ماسوف نعرفه في الحلقه القادمه انشاء الله .....
انتظرونا ولاتذهبو بعيدا ...
يتبع...
