بعد ماعرف حاج عثمان بالحصل لي هند قام ضرب تلفون لهند .
عثمان : ياهند انتو وين اسع.
هند: في الجامعه وخلاص انتهينا من التسجيل واسع طالعين .
عثمان : ماتكوني بتكضبي زي امبارح .
هند عرفت انو ابو مهند حكي ليهو وقالت ليهو كدي لمن اصل وبشرح ليك الحاصل .
عثمان : مامشكله لمن تصلي انا عندى معاك كلام كتير .
طبعا ناس هند انتهو من التسجيل والدراسه بعد اسبوع ويس وصل هند وريم الموقف ولقو عصام ود حاج عثمان بالصدفه في الموقف وركبو سوا ويس رجع لانو شغال محاضرات.
في البص لقو مقعدين جنب السواق وواحد وراء قامت ريم قالت لي هند انا بركب في المقعد الورا لانو بخاف من المقاعد الامامية وانتي اقعدي مع عصام نسيبك .
في الطريق عصام وهند بتونسو عن الجامعه وعن الحله وقام عصام سأل هند ؟انتي ياهند وافقتي علي ابوي قصبا عنك وعشان وضعكم المادي الكلام دا صاح.
هند : ياعصام دا موضوع منتهي والحصل حصل ...
عصام : انا ابوي بعرفو كويس وهو صعب شديدوعينو طايرة ومن ما اتوفت الوالده الله يرحمها وهو جنو نسوان ، وعشان كدا مادايرك تستعجلي وتندمي بعدين وبالمناسبة انت جميله وحلوه والف واحد بتمناك وماتضيعي مستقبلك مع راجل عجوز قدر ابوك .
هند حست بكلام عصام وهو عايز مصلحتها ومع انو اتكلم فوق ابوهو واول مرة ترتاح لي زول وحست انو هي قريبة من عصام وكانو اول مرة تقابلو مع انو هم جيران ودفعه من الروضه .
وصل البص الحله وريم مشت طوالي بيتهم قريب من الموقف وهند وعصام اجرو ركشه ووصلو البيت ولقو حاج عثمان منتظرهم عند ناس بخيته ام هند ودخل عصام مع هند .
عثمان: مماشاف هند طوالى جراها قام ضربها كف من امو وقال ليها جابت ليها كضب وبيتان عند ناس غراب من الليله دي مافي جامعه والعرس بعد اسبوع وخلاص دا موضوع منتهي بلاش قرايه وكلام فاضي .
بخيته : ساكته ساي خشمها مافتحتو .
هند : من الصدمه جرت خشت الغرفه وسدتها عليها .
عصام : بصوت عالى دا شنو العملتو دا يا ابوي ما من حقك تعمل كدا وانت لسع ماعرست هند عشان تمد يدك عليها وانا ماموافق علي موضوع العرس وعندك خيارين يا نحنا ياهند .
عثمان : اتنفخ وبقي يكورك في عصام انت ولد ما محترم وكمان بتفرض رايك علي انت ماولدي ولابعرفك وانا متبري منك وانا ولدي عصام مات من زمان .
عصام طلع زعلان من بيت هند ومشي علي البيت وحكي لاخوانو بالحصل كلو ولمن جا ابوهو لقاهو بحكي لاخوانو وطوالى قال ليهو الجابك هنا شنو دا بيتي انا وتاني ما اشوفك هنا وقوم اطلع تطلع روحك...
طلع عصام من المنزل وماعارف يمشي علي وين ........و يبيت وين و........
و........
الي اللقاء في الحلقه القادمه ...
يتبع ...
