رجعت بلقيس من صاحبتها عشوشه الوداعية وهي مبسوطه وتضحك براها لاخر ضرس ولقت عبد الحميد بشرب في غرارة عرقي .
بلقيس : انت ياراجل غير الشراب ولعب القمار ماعندك شغله قوم علي حيلك يقوم حسك وانا العرقي دا عاملاهو ليك انت بس ..
عبدالحميد : ماكلو منك انتي!! انا مما عرستك بقيت مدمن وحالتي بالبلا وصحتي اتدهورت شديد .
بلقيس : عندي ليك مفاجاءة بعد كم يوم وفي زول عزيز عليك شديد .....
عبدالحميد : الله يجازيك انتي شيطانة خليتني اطلق بخيته وابعد عن اولادي وبعد دا كلو ما مخلياهم في حالهم .....انا بترجاك كفاية لحدي هنا .... انا مابقدر استحمل اكتر من كدا ........
بلقيس : وانت لسع شفت حاجه .....انا لازم انتقم من بخيته واولادها شر انتقام .......
الخرطوم :
حاجه بخيته طلعوها من المستشفي وعدت فترة في الشقة مع هند ويس وعصام مافارقهم نهائى وقررو انوبخيته ترجع الحله وبقت تتعالج علاج طبيعى وبدت تتحسن .
هند وعصام بقو قريبين من بعض شديد وعصام لمن يشوف هند بتتكلم مع مهند الضابط وشو بتكرمش وبقى بغير شديد على هند
في صباح اليوم المسافرين الحله جا مهند وقال لهند انو ناس الشرطة قبضو حاج عثمان واسع مقبوض في كسلا وبكرة برحلوهو للقسم محل الاختصاص.
يس وعصام ما سافرو مع ناس هند لانو الجامعه فتحت وهند ابت تقعد للجامعه وقالت الا امها تبقي كويسة .
بخيته وهند وصلو البلد وعملو كرامه كبيرة وعزمو كل الاهل ما عدا بلقيس والقريبة انو جات بدون عيزومة وكمان جات شايله معاها رطلين سكر وصاراهم في طرفا (لو ماعندها مشاكل مع بخيته كان قلنا جيتها دى هي خايفه من اللوم بس اكيد عندها فهم من جيتها بدون عيزومه وبدون سابق انزار ) ماعلينا بس ربنا يستر من المخلوقة الاسمها بلقيس دي ....
مرت ايام وحاج عثمان مقبوض في الحراسه وسجل اعتراف قضائي والنيابة صدقت ليهو ضمانة مالية (10.000)وطلع من الحراسه والضامن عبدالحميد والمتحري وصى بتحويل البلاغ للمحكمه وحددو جلسه بعد اسبوعين .
بخيته قررت انو ترحل بيت امها حبوبه هند وعشان تبعد من حاج عثمان وشرو ....ولانو محتاجه رعاية هي ويوسف ....
هند سافرت للجامعه بعد تلتله وكانت عايزة تخلي الجامعه بس امها اصرت عليها .....
هند وصلت الخرطوم ونزلت في الداخلية مع ريم في غرفة واحدةومعاهم بتين تانين ولحقت هند المحاضرات وكان عندها اسبوعين ماحضرتهم ولقت عصام محضر ليها الشيتات وكل حاجه ....
في الداخلية هند وريم بتونسو .....
ريم : ياهند لقيتي الجامعه كيف ...
هند : روعه ماكنت مفتكراها كدا .....
ريم : شايفاك اليومين ديل طوالى مع عصام .... يعني .....
هند : قصدك شنو .....
ريم : انتى عارفه .
هند : انتى عارفانى زوله واضحه وبصراحه انا بديت ارتاح ليهو ..... بس ما اكتر من كدا ... وهو وقف معانا كتير......
ريم : مافى حاجه اسمها برتاح ليهو .....يا بتحبيهو يا لا .....
هند : حب شنو انا المشاكل الكتيرة دي ادتني فرقه احب......وبمناسبه الحب دا يس بسلم عليك كتييييير .
ريم : عليك الله متين الكلام دا .....
هند : طوالي... غايتو الحب شكلو عندك انتى ......
ريم : انا نعست عايزة انوم بكرة عندى محاضرة بدري .......
هند : ههه يعني غيرتي الموضوع منى ....
ريم : زى ما انتى غيرتي الموضوع .....
في المحكمه :
اليوم جلسه محاكمه حاج عثمان الساعه 9:30ص امام قاضي الجنايات ......
بدت الجلسه بحضور الشاكية بخيته والشهود ابناء عثمان ........
ومن الحضور هند وعصام ويس وريم وعبدالحميد وبلقيس ......
هل ياترا سوف تتم محاكمه حاج عثمان محاكمه عادلة ........
وماهي العقوبة ........
يتبع.....
