بخيته وقعت علي الارض غمرانه و حاج عثمان شالها ختاها فوق العنقريب ومشى كورك ياهند ياهند املي الكوز مويه وتعالى سريع .
هند : جات جارية سريع وشايله الموية امي امي مالا الحصل ليها شنو.
عثمان: ماعندها عوجه بس داخت شوية..
وقام شال الموية ورشى بيها بخيته وفتحت وبقت تعاين لى هند وبتبكى .
هند : امي مالك الحاصل شنو .
بخيته : لفه راس بس شكلها من تعب المستشفي.
عثمان : انا بعد دا ماشى ومنتظر ردك يا ام هند .
هند: بعد حاج عثمان مشى رد شنو يا امي ؟؟
بخيته: حاج عثمان قال عايز يعرسك ودا السبب الخلاني ادوخ.
هند: انا كنت حاسه انو حايتكلم معاك في الموضوع دا ولانو ريم ورتني امبارح وحتي الموضوع ناس الحله كلهم عارفينو.
بخيته : رجال الزمن دا مابختشو راجل قدر ابوك واولادو عرسو يجي يطلبك كيف واتاريو مهتم بينا من زمان عشانك انتي .
هند: انتي رايك شنو يا امي .
بخيته: كيف يعني رايي مستحيل يعرسك زول قدر ابوك وانا مابعرسك لي زول الا تخلصي الجامعه اول حاجه.
هند : عن ازنك ياامي انا نعسانه شديد وبكرة ان شاء الله بوريك رايي .
مشت هند للغرفه وقعدت تفكر في موضوع حاج عثمان هل ترفض ام توافق واذا رفضت من الذي سوف يهتم بناس البيت واذا وافقت هل سوف تواصل تعليمها وتحقيق رغبه والدتها .....
ام ماذا تفعل .......
ظلت هند تفكر حتي مواعيد صلاة الصبح وقامت صلت الصبح وإستخارت ومشت كملت نومها .
في الصباح جات هند ولقت امها بتغسل في العده حقت امبارح وقالت ليها امي انا موافقه اعرس عثمان .
بخيته: نفضت يدينها من غسيل العدة قلتي شنو ......
هند : انا موافقه اعرس عثمان بس عندي شرطين انو العرس بعد الامتحانات وانو يخليني اقراء الجامعه حتي ولو جبت الطب .
بخيته في حيرة من امرها :ياهند انا عارفه سبب موافقتك انتي دايرة تضحي عشانا وعشان اخوانك واد ما بحصل طالما انا عايشة في الدنيا دي وانا ماممكن عشان القروش ابيع اغلي حاجه عندي واوعك تمشي لعثمان وتقولى ليهو انك موافقه دا موضوع منتهي وتعالي
هنا انتي عارفه حاج عثمان بيتو مليان عندو سبعه اولاد يعني حاتعيشى عمرك كلو خدامه ليهم .
هند: يا امي انا استخرت ربنا والفيها خير ربنا بسويها وانا دا قرارى النهائي واسع ممكن تضربي ليهو وتوريهو انو انا موافقه .
حاجه بخيته كانت محتارة في بكلام هند وقال ليها خلاص لازم نحدث اخوك يس و احتمال كبير يرفض .
هند : خلاص وريهو مع انو انا عارفه حايرفض بس وريهو انا موافقه ودايراهو .
ضربت بخيته لابنها يس ودار بينهما حوار طويل اقتنع يس برغبه هند وقرارها .
علم حاج عثمان بوافقه هند ومافضل ليهو الا يرقص مع النشرة الجويه ماعلينا المهم تمت خطبه هند من حاج عثمان وتحدد العرس يكون بعد امتحانات الشهادة ووافق علي كل الشروط ، وكانت الخطبه هي شمار الحله الاسبوعى وحديث مجلس كورينا شمارات.
هند خلصت الامتحانات وكانت متوقعه انو تجيب نتيجه كويسه وخلال الفترة السابقه كان حاج عثمان عامل لاسرة هند وجع وشي كل يوم ناطي ومحمل الاكياس والهدايا .
طلعت نتيجه الشهادة وهند جابت نسبة عاليه جدا 92،6% وريم 84،6% وعاصم ودعثمان 80% وفي التقديم شالوها في طب الخرطوم وريم علوم ادارية الخرطوم وعاصم طب الخرطوم بالخاص .
في بيت حاجه بخيته الناس داخله ومارقه وبتبارك في النجاح الباهر استقل عثمان الفرصه وحددو العرس بعد اسبوعين وقام حاج عثمان دفع ليهم مبلغ 50.000الف جنيه للمهر والشنطه واقترب موعد العرس وفضل يومين من العرس .
اتصل رقم قريب علي هاتف بخيته وجرت المحادثه التالية بينهما.....
الرقم القريب: السلام عليكم.
بخيته : وعليكم السلام مرحب بيك .
الرقم القربيب: دا رقم عبدالحميد محمود.
بخيته : دا مارقمو بس انا زوجتو.
الرقم القريب: عندك ولد اسمو ياسر في ليبيا .
بخيته : ايوة بالحيل ليهو سنين ما منو خبر ولا اتر.
الرقم القريب: انا عميد في شرطه ليبيا مكافحه التهريب وولدك ياسر كان من ضمن العبارة الغرقت في السواحل الايطالية واسمو في القائمه المفقودة ونسأل ربنا انو يتقبلو ويجعلو مع الصديقين والشهداء والبركه فيكم .
بخيته: كر علي يا حشاي وبقت تكورك وتسكلج ياسر ولدي مات ياسر ولدي مات.......
انقلب مشهد الفرح الي عزاء وتم تاجيل العرس لوقت غير معلوم وانتهت مراسم العزاء .
وحاج عبدالحميد لسع في امورو البايظه والملكلكه ولو ماكلام الناس ما كان جاء العزاء ومما انتهي العزاء اتخارج طوالي علي حبيبتو بلقيس مابقدر يغيب عنها لحظه وهي جات العزاء مرة واحده بس وبكت بكايا مبشتن بدموع مامعروف جن من وين ماعلينا المهم في الامر انو بلقيس لسع مسيطرة علي عبدالحميد لدرجه انو مابقدر يطلع من البيت اكثر من خمس دقائق برجع طوالى ولو مارجع مفراكه بلقيس بتعمل عمايل... (غايتو الماجرب مفراكه مرتو ربنا راضي عنو )
يس رجع الخرطوم وساق معاهو هند وريم عشان تسجل للجامعه ومشو بعربية خاصه عشان يرجعو في نفس اليوم لانو ماعندهم محل يبيتو فيهو في الخرطوم.........
يتبع ....
