رجعت بخيته لمنزلها بعد تقديم واجب الشكر لجارهم حاج عثمان ولم تجد ابنتها هند في المنزل وقالت اكيد بتكون مشت لي ريم صاحبتها لانو امتحانات نص السنه قربت *معلومه(ريم صديقة هند منذ الطفوله من اجمل بنات الحله بس مابتحصل هند في الجمال والرقه وخفه الدم والرشاقة، وبتدرس معها في نفس الصف بس هي ادبية وهي ابنه شيخ البلد واسرتها ذات حسب ونسب ومال )
الساعه تشير الي التاسعه وهند لم تحضر الي المنزل وامها بدت تغلق عليها شديد وماعندها تلفون التلفون حقها قافل ليهو يومين فيهو مشكله في البطارية وقامت مشت لي غرفه يوسف عشان مواعيد الدواء بتاعو وكانت المفاجاءة انو لقت يوسف ما موجود في غرفتو ودا خلاها تنزعج اكتر طوالي طلعت ومشت ناس عثمان عشان تضرب من تلفونو لي سعاد ام ريم ولقت حاج عثمان طالع من البيت وبإستعجال قالت لعثمان هند بتي ويوسف من ماطلعت منكم مافيشين وتلفوني خسران ممكن تضرب لي سعاد ام ريم لانو هند مابتمشي محل غير بيت ريم .
عثمان: ماتشفقي ياحاجه هاك التلفون واتصلي منو وخلي معاك وانا من دربي دا اصلا ماشي لدكان كورينا شمارات وبفتش عنهم وبرجع ليك في التلفون لانو الليل دخل وما صاح تحومي براك انتي خشي البيت وانا ان شاء الله بجيب معاي هند ويوسف .
بخيته: منزعجه ادخل البيت كيف واولادي مافشين .
عثمان :ياحاجه انتي في الحله يعني مافي حاجه بتجي لاولادك.
اقتنعت بخيته ودخلت البيت واتصلت علي سعاد ام ريم ووجدت الهاتف مغلق وزاد من توترها اكثر الا ان كلام عثمان خلاها تنتظر في البيت .
وحاج عثمان وصل لدكان كورينا بتاع الشمارات واول ماسلم عليهو وعلي الناس المعاهو كورينا ماردا السلام كويس وقال ليهو كفارة لابو النسب!!
عثمان:بقضب ابو النسب منو ؟؟
كورينا: هههههه في زول مابعرف نسيبو المستقبلي .
عثمان :ياكورينا اتكلم عدل وانا مافاضي ليك.
كورينا: شايف هند حبيبه القلب سايقه اخوها المجنون ومشو المركز الصحي .
عثمان: يوسف مالو حصل ليهو شنو .
كورينا :معقوله الجار ماعندو علم.
عثمان : دا ماوقت هظار انا اسع كنت مع بخيته وماعندها علم واسع هي شفقانه علي اولادها وماعارفه حاجه انت متأكد من انو هند ويوسف في المركز الصحي .
كورينا: افو انا كورينا وتقول لي انت متأكد .
حاج عثمان شال تلفون كورينا وضرب لبخيته وحكي ليها الحاصل ورسل ليها ركشه حمدان وفات قدامها للمركز الصحي.
عثمان وبخيته وصلو المركز وسألو عن هند ويوسف ووصفو ليهم انو يوسف مرقد في حوادث المركز ولقو يوسف مركبين ليهو دريب وهند قاعدة جنبو في السرير .
بخيته :سجمي يوسف مالو ياهند .
هند: ماعندو عوجه بس الدواء بتاعو انتهي والحاله قامت عليهو وحاول ينتحر وانا فتشت ليك ومالقيتك وجبتو المركز واسع الدواء حقو وحقنه منومه ومالك اتأخرتي يا امي وابوي مالو ماجاء معاكم هو ما وراك بالحصل لي يوسف !!
بخيته : يوريني كيف وهو ماقاعد معانا ..
هند : الدكتور رفض يعالج يوسف الا يجيبو التقرير حق المرض واتصلت علي ابوي لانو التقرير شايلو معاهو في مخلايتو و عشان يجيبو وهو قال بغشاك يكلمك ويجي المستشفي واسع لمن اتأخر حنست الدكتور ووافق بعد تلتله .
بخيته:ابوك دا انا طلع من حياتي نهائي وهو لو كان فيهو رجا كان جا المستشفي او كان جاني البيت وحدثني في زول بعمل في اولادو كدا الله ينتقم منك يا عبدالحميد .
عثمان :مقاطعا دا ماوقتو اسع شفتي يوسف والحمد لله كويس والدكتور قال بطلعو بكرة عشان كدا انتي سوقي هند وارجعو البيت وانا بضرب لي ولدي عاصم عشان يبيت معاهو .
بخيته : انا مابفوت ولدي شبر وببيت هنا معاهو انتو امشو وسوقو معاكم هند غشوها بيت صاحبتها ريم لانو بيت حبوبتها بعيد وماقصرت معانا ياحاج الله يقدرنا علي جزاك.
عثمان: ماتقولي كدا نحنا اهل واسرة واحدة وحانبقي منكم اقصد.... خلاص فتناك بعافيه ولوعزتو حاجه اضربي لي في تلفون عاصم وخلي تلفوني معاك ،يلا ياهند وراح نوصلك بيت ريم.
وركبو ركشه حمدان وكانت الساعه 11.50م وفي نص الطريق الركشه قطعت بنزين واتطر عثمان وهند مواصله المسافه بالكرعين وهند قالت لعم عثمان انا بصل بعد كدا المسافه قريبه بس هو رفض وقال لازم اوصلك لحدي البيت وجو مارين بدكان كورينا شمارات والناس كلهم بقو بعايتو بإستقراب !!!البخلي حاج عثمان يمشي مع بت سمحه وجميله في نص الليالي شنو؟؟؟ وكورينا بصوت عالي :يا حاج عثمان متين هو خلاص دخلت البت في شباكك .
وهنا هند كانت مستقربه من كلام كورينا وسالت عثمان قالت ليهو كورينا قاصد شنو .
عثمان : ماتهتمي بكلامو انتي عارفاهو بتاع شمارات .
هند مااقتنعت بكلام عثمان .
وصلت هند بيت ريم وكانت ريم وامها منتظرينها في الشارع وشافو حاج عثمان معاها لانو بخيته ام هند اتصلت عليهم وحكت ليهم كل الحصل .
في بيت ريم هند حكت لي ريم كل الحصل .
ريم: انا عايزة اتكلم معاك في موضوع ياهند.
هند: انتي صحبتي معقوله تتكلمي طوالي.
ريم: علاقتك بي حاج عثمان شنو.
هند: بإستقراب علاقتي انتي مالك بقتي زي كورينا بتاع الشمارات.
ريم: انا جاده معاك .
هند: اول حاجه عم عثمان دا قدر ابوي وهو جارنا ووقف معانا في كل مشاكلنا بس ما اكتر من كدا.
ريم: كلام ناس الحله كلو اليومين ديل فيك انتي وحاج عثمان وقالو هو داير يعرسك وانتي موافقه وكمان
بتحبيهو .
هند: مصدومه من كلام ريم انتي ياريم لو ماكنتي صاحبتي كنت زعلت منك وانتي عارفاني كويس وتاني شي دا زمن حب نحنا الفينا مكفينا والمشاكل كل يوم بتزيد وانا لو حبيت احب عم عثمان العمرو فات الخمسين.
ريم: العفو ياهند دا ماكلامي ديل ناس الحله وانتي لو ملاحظه انو عثمان مهتم بيكم شديد ومافضل ليهو الا يبوس كراعك ويفرش ليك الارض زهور.
هند: والله دي محن انا القاها من ابوي والا من جارنا الكنت مفتكراهو حايسد فرقة ابوي وهو حنين وطيب وختيتو في مغام ابوي، واتاريهو لابد ليهو علي راي وانا قبيل في الشارع كورينا قال لعثمان خلاص دخلت البت في شباكك وانا سالتو وقال ماتهتمي بي كلامو .
ريم: اها اقتنعتي.
هند : لو ما الموقف حق قبيل ماكنت صدقت كلامك لانو انا بطبيعتي مابصدق كلام الشمارات ..
في الصباح رجعت هند البيت ولقت امها ويوسف طلعو من المستشفي ومعاهم حاج عثمان ومما شافتو دخلت الغرفه وما اتكلمت مع زول.
عثمان: ياحاجه بخيته الحمد لله يوسف بقي كويس وانا عندي معاك موضوع عايز اتكلم معاك فيهو.
بخيته: خير انشاء الله .
عثمان :خير تب .
بخيته :قول العندك انا سامعاك.
عثمان : انا يسعدني ويشرفني اطلب منك يد بتك هند علي سنه الله ورسوله.
بخيته: وقعت علي الارض غمرانه......
هل ياترا سوف توافق بخيته وما هي رده فعل هند من هذا الخبر الجميل .......
هذا ماسوف نعرفه في الحلقه القادمه من رواية قتيل من اجل الحب ...
يتبع.....
