مشت هند على الصالون عشان تتكلم مع ابوها عشان يتراجع ويطلق بلقيس ...
هند دقت الباب.
عبدالحميد: منو .
هند: انا هند ياابوي .
عبدالحميد: عايزة شنو انتي كمان ...
هند: دايرة اتكلم معاك ممكن ادخل.
عبدالحميد:ادخلي وسدي الباب وراك.
جلست هند بجوار والدها وساد صمت لمدة من الزمن .
عبدالحميد: اتكلمي يابتي موضوعك عارفو وانا بالنسبة لي موضوع مسوكر ومنتهي.
هند: لكين يا ابوي انت في حاجات كتيرة بتحصل من وراك وانت ماعارفها وانا كم مرة حاولت اتكلم معاك بس انت مافاضي لينا وانا كنت حاسه من زمان برجوعك لي بلقيس وهي مرة شرانية وبتاعت مشاكل والحله كلها عارفاها وانت ماجايب خبر .
عبدالحميد: بحرقه هوووووي يابت اتكلمي كويس والزمي حدودك بلقيس مرتي زيها زي امك واكتر كمان وانا زي مابرضي في امك برضو مابرضي انو زول يتكلم في بلقيس .
هند : لكين ياابوي انت ماعارف انو بلقيس كل يوم في المدرسه بتضربني بسبب وبدون سبب وشايلاها معاي عشان انا بت بخيتة .
عبدالحميد:بلقيس دي في مقام امك وماممكن تعمل كدا وكلامك دا ما صاح اكيد امك محرشاك وهي امك زاتها خرفت وكبرت والمراض كتر عليها .
هند: الله يسامحك يا ابوي امي تعمل كدا إظاهر كلام امي صاح لمن قالت لي بلقيس عامله لي ابوك عمل عشان تفوز بيهو ..
هناعبدالحميد قام من السرير بقضب وشال صوت العنج المعلق في الحيطه و ضرب هند ضرب عدوك وهند تصرخ باعلي صوتها و بخيته سمعت الكوراريك وجات جارية مفزوعه وحجزت هند من الضرب ولسع ابوها بضرب فيها بقوة وبدون رحمه وقبل علي بخيتة برضو ضرب شديد حتي جا حاج عثمان جارهم بالحيطه وسمع صوت الكواريك وقام وقف عبدالحميد من ضرب إبنته وزوجته وهدا الموقف شوية وهنا قالت بخيتة لعبدالحميد شوف ياراجل بعد العملتو في بتك وفيني دا تاني ما بنقعد معاك نهاي واسع طلقني طلقني طلقني ياعبد الحميد .
عبدالحميد وهو يضحك: جدا مش دايراة الطلاق انتي طالق وبالثلاثه كمان ...
وهند مازالت تبكي و حاج عثمان موجود وبقول ليهم ياجماعه استهدو بالله انعلو الشيطان ياعبد الحميد عاين لاولادك لسع صغار وعاين لى ولدك العيان الطلاق ماحلل .
عبدالحميد : ياحاج عثمان انت ماعارف حاجه انا لي زمن متضايق من عيشة الفقر دي وبخيته غير الفقر ما جابت لي حاجه وياهو شايف براك واولادي كلهم طلعو مانافعين احسن لي اشوف حياتي واعيش لي ايام حلوة قبل مااموت .
وفي اللحظة ديك بخيته ساقت هند وقالت ليها وراح نلم هديماتنا ونمشي لي بيت جدك .
عبدالحميد مقاطعا كلام بخيته: ماشين وين اندفسو قبلكم انا البطلع من البيت انا بيت بزكرني بيكم ماعايزو ودا طرفي منو ، وشال مخلايتو ولملم هديماتو وشال عكازو وطوريتو والراديو ومشي طلع من البيت علي منزل بلقيس حبيبه القلب ...
يتبع......
