#طيف_العيون
بقلم: سحر عبد الرحمن
دايمآ كنت بحس بضعف وقهر ومرات كتيرة بتعقد بس ده كان ابدآ ما ضعف بالنسبه لي ؛بالعكس يمكن كان قوة
-انتي يا سجم انا مش مليون مره قلته ليك ما تجي تسلمي علي في الجامعة دي
-يا منى انتي اختي وانا لمن سمعت صوتك كروركت ليك فالموضوع عادي
-يااخ ما عادي ولا زفت هسه صحباتي يقولو علي شنو ..احرجتيني قدامهم والله تاني اقطع فيك كف طوالي ولا بتفاهم
-هه وصلت معاك للدرجه دي بقيت مصدر احراج
-ااي اكبر مصدر احراج بسبب ...
جات امهم داخله
-والله يا منى تتميها اطردك من البيت ده وتاني ما ترجعي
-انتي قايله يا امي كلامك ده بهزني اطرديني طول عمرك بتحبيها اكتر
-ااي لانها احسن منك ومن قلة ادبك دي حصل يوم سمعتيها رفعت صوتها ده علي ولا قلت ادبها
-خليها تنفعك وتتهنو سايبه ليكم البيت ده ذاتو
-اطلعي تطلع روحك بركة الله
-امي يا امي 😭😭والله منى دي لو طلعت انا ذاتي بطلع عليك الله يا امي وقفيها عليك الله
-خلاص يا طيف اهدي ..منى تعالي يا بتي ارجعي انا اسفه
-قال اسفه قال بالله يا امي فكيني
-خلاص يا بتي اسفه ارجعي
-كل مرة بتقولي كده بس دي اخر مره والا تاني ما حتشوفو وشي ده
-خلاص طيب يا بتي
زي ما انتو شايفين ده الطبيعي في البيت منى اختي وعشه امي وابوي محمد الله يرحمو اتوفى وبقينا برانا ما عندنا سند او زي ما يقولو عمود بيت بس امي ما بتقصر خصوصآ معاي بس يمكن يكون ده سبب من اسباب اني ما ...
-طيف بدينا تاني ..شاحني وين
-شاحن شنو وانا حقدر اشيلو كيف ..يكون مع امي يا منى
-طيب خلاص ؛تلفوني ده خليه معاك كان اتصل اوعك تردي فاهمه مسافة استحمى بس عشان طالعه
-طيب
مسافه منى تمشي وتجي اعرفكم بنفسي انا اسمي طيف بدرس طب السنة الاخيره من اسرة متواضعة جدآ وعلى قدر حالنا منى اختي الكبيره وخريجه بتحضر في مشروع تقرا مختبرات في نفس جامعتي ونفس الكلية بس قسم تاني اكبر مني بسنه انا سمعته من الناس بقولو اني جميله ااي جمال ما عادي حتى بقولو عيوني جاذبه ولونها عسلي وملامح وشي فتنه من شدة جمالها وكم مرة امي تقول جوني عرسان ورفضهم لانها ما قادرة تستغنى عني او بسبب اني معاقه ايوه معاقه انا ما بشوف عايشه في ظلام الليل والنهار واحد بالنسبه لي طيب في ناس حيحتارو قريت طب كيف ..لمن الله يشيل منك نعمه بديك نعمه تانيه وده الحصل معاي شال مني البصر واداني العقل نبيهة وشاطره لدرجه ما تتوقعوها وكده دخلته طب ومواصله وايام الامتحانات الاستاذ بقرا لي وانا بجاوب وهو بكتب بس برضو حقدر اعالج الناس ؛حيكون معاي طبيب مساعد وانا حفهم من المريض مشكلتو والطبيب المساعد يعالج وماف سبب كان يقدر يمنعني اقرا طب والله معاي
تلفون منى اتصل
-منى تلفونك بدق
-....
-منى تلفونك ده المره التانية يدق ارد
-.....
انا حرد يمكن حاجه مهمه
-الو
-منى يا زفته انتي انا مش قلته ليك حركات البنات دي ما بتخارج معاي مالك مزفتاها علي يااخ
-ا اا اسفه بس انا ما منى
-انتي منو ..انا الاسف دخلته شمال طوالي
جات منى من هناك وخطفت التلفون
-ياااااخ انتي ما بتفهمي عميانه وما بتفهمي كمان انا مش قلته ليك كا تردي ع الزفت ده 😡
-بس يا منى اتصل كم مره وانا رديت قلته في شي ضروري 😭
-الخط فاتح يخرب بيتك ..الو انا اسفه دي البت الشغاله بتاعتنا ردت عليك اصلها ما بتفهم 😒
انا هنا اتحمقت ووقفت وطاااخ ....
