وانا فی البیت مره اشتغل مربية اطفال لـ حمودي واولادها ومره حبشية نضافه في البيت وبعد مرور 6 شهور جاتنا عفاف ومعاها نفس المرا والمرا طلبت يدي للزواج بس محاسن رفضت وقالت ليهم شجن لسه صغيره على العرس المرا قالت ليها لو علي الدراسه ما عندنا مشكله انها تواصل فيها محاسن قالت ليها لا لو ما كملت دراستها ما بتعرس نطت عفاف قالت ليها خلاص انتي كلمي ابوها انو هسي تكون بس خطوبه نظام نحجزها والعرس بعد تخلص تعليمها محاسن قالت ليها ابوها زاتو ح يرفض البنت لسه صغيره علي المسؤوليه وما عايزين نشغل تفكيرها بكلام العرس عفاف والمرا طلعو وهم زعلانين بقرار الرفض وانا لسه ما عارفه حاجه بعد طلعو سمعت خالتي محاسن تتكلم براها قالت بعد شجن تعرس الـ بشتغل لي منو وأخوها ده البيتحمل مسؤوليتو منو كمان انا أربي اخوها ولأ اولادي بلا عرس بلا كلام فارغ وبعد ده كلو ما فهمت من كلامها حاجه
وفي بيت خالتو عفاف المرا قالت ليها وووب علي مرت ابوها دي فقر نطت عفاف قالت ليها اصلا فقر انتي قلتي كده فما بالك بـ شجن الـ عايشه معاها العمر كلو المرا قالت ليها والله من شوفت شجن من أول يوم عجبتني وارتحت ليها كان نفسي يوافقو هي صح صغيره بس لو وافقو مستعدين ننتظرها خالتو عفاف قالت ليها محاسن دي خليها علي انا تاني برجع ليها وبحاول اقنعها ولو ما وافقت ح اضطر اتصل علي سماح خالتها في السعوديه وان شاء الله يوافقو وتبقى من نصيبكم وبتمنى تعجب سامر قالت ليها سامر ما عندو مشكله بس ربنا يهدي مرت ابوها وتوافق خالتي عفاف قالت ليها بكره دي انا برجع ليها وفعلا اليوم التاني من الصباح جاتنا خالتي عفاف ومحاسن اصلا ما بتريدها عشان صاحبة امي ربنا يرحمها قالت ليها اهااا يا محاسن جيتك تاني ما غيرتي رأيك قالت ليها من امس اديتكم رأيي الآخير عفاف قالت ليها طيب ما تكلمي ابوها وتشوفي رأيو شنو ؟؟ قالت ليها وانا ما عاجباك يعني وبعدين ما تنسي انا ولي امرها وفي مقام امها محاسن قالت ليها العفو بس ده عريس ما بتفوت يسعد شجن ويريحكم عريس مغندل والله انتو زاتو ترتاحو طبعا محاسن همها كلو القروش قالت ليها شغال شنو قالت ليها الزيهم ما بيشتغلو الناس البتشتغل عندهم ديل اصحاب شركات طبعا عفاف عارفه محاسن ماديه " محاسن قالت ليها المشكله محمد متعلق بشجن اها بعد تعرس عفاف قطعت كلامها قالت ليها حمودي ما مشكله ممكن تسوقو معاها ولو العرس ده تم القروش تجيك زي التراب ولو ما وافقتو في بنات كتير متمنين نسب زي ده وهسي لو العريس عايز يأشر بأصبعو ويعرس أحلي بنت بس خلاص النمشي اقول ليهم لسه رافضين عشان يشوف وحده تانيه نطت خالتي محاسن قالت ليها مالك مستعجله انتظري ابوها يجي اكلمو واشوف رأيو حتي تمشي تكلمي ناس العريس عفاف قالت ليها ابوها ده تقنعي انتي ده لو انتي موافقه طبعا قالت ليها لو علي انا بكره دي اعقد ليها البنت عندها شنو غير بيت وراجل وابوها ان شاء الله يوافق طبعا محاسن من لقت في مكسب قروش غيرت رأيها من يومها ماديه عفاف جات طالعه مبسوطه لقتني بكنس في الحوش قالت لي الليله مالك ما مشيتي المدرسه نطت محاسن قالت ليها مؤجزين ليهم عفاف ودعتني بالأحضان وهمست لي قربتي تتفكي من المرا الشوم دي بس ما فهمت كلامها عشان قالتو لي بهمس المساء أبوي جا راجع من الشغل محاسن جابت ليهو المويه وعملت العشا طبعا بالليل بتشتغل هي عشان قدام ابوي المهم بعد انا دخلت انوم محاسن قالت لأبوي شجن جاها عريس ابوي قال ليها شنووووو قالت ليهو والله ما شاء الله حسب ونسب ابوي قال ليها شجن شنو البتعرس البنت لسه شافعه وما بتقدر علي المسؤولية قالت ليهو اصلا رفضت القرايه وبعدين هم قالو خطوبه وشغاله تشكر في العريس كأنها بتعرفو معرفه شخصيه وده كلو عشان القروش وابوي رافض وبدت تأثر عليهو بـ امي قالت ليهو انت عارف انا موافقه عشان خاطر ساميه لانها لو لسه حيه كانت وافقت اي ام بتتمني تشوف بتها في اليوم ده وخاصه لو كان العريس اهل عفاف صاحبتها ابوي بعد كلامها ده بدأ يتأثر واصلت كلامها وقالت ليهو والبنت نهايتها راجل يسترها ابوي قال ليها عايز يفكر قالت ليهو مبروووك وربنا يتم ليها علي خير شجن تستاهل والله ابوي قال ليها انا قلت عايز افكر وبعدين ما بعرس ليها قبل سنتين وبعد يومين ابوي كلم محاسن بقرارو النهائي وكان عباره عن الرفض ومحاسن كانت زعلانه والخبر وصل اهل العريس اليوم التاني المساء الباب دق مشيت فتحتو لقيتو راجل الوقار ظاهر في وشو قال لي ده منزل صلاح قلت ليهو اي قال لي صلاح موجود قلت ليهو دقيقه انادي ليك وفعلا دخلت كلمت ابوي وجا استقبلو ودخلو في سراير الحوش مشيت قدمت ليهو المويه قال لي انتي شجن قلت ليهو اي قال لي ما شاء الله وقعد اتونس مسافه مع ابوي بعد طلع ابوي ناداني جنب محاسن قال لي يا بتي وقت رفضتي المدرسه خلاص عيشي حياتك الراجل الـ جا هسي ده اتقدم ليك قاطعت كلامو قلت ليهو بس يا ابوي انا ما عا يزه اعرس انا عايزه اقعد مع حمودي نطت خالتي محاسن قالت لي والعرس ما بيحميك حمودي قلت ليها برضو ما عايزه اعرس ابوي قال لي انا زاتي من الأول ما كنت موافق ولم رسلت ليهم الرد جا الراجل هسي يقنعني وقلت خلاص ما اقطع نصيبك بس وقت انتي زاتك رافضه انا بكره ح اقول ليهم لا وضميري يكون مرتاح نطت محاسن قالت ليهو كيف يعني تقول ليهم لا وانت تسمع كلام شجن " شجن دي لسه صغيره ما عارفه مصلحتها وين ابوي قال ليها انتي براك قلتي شجن لسه صغيره وبعدين كل حاجه ممكن تحصل بالغصب الأ العرس بالإتفاق وانا ما بجبرها علي حاجه هي ما عايزاها ودي حياتها هي يلا تصبحو علي خير بكره طالع الشغل بدري بعد ما ابوي نام وانا دخلت الغرفه محاسن جات محصلاني قالت لي في زول برفض عريس زي ده قلت ليها بس انا ما عايزه اعرس وبعدين العريس ده كبير قالت لي عايزه تلقي احسن منو وين وابوك طول عمرو تعبان وشقيان عشانك هسي لم جاتك فرصة تردي ليهو المعروف ترفضي قلت ليها كيف يعني قالت لي لو عايزه تريحي حمودي وابوك وافقي علي العريس ده وح يجينا منو خير كتييير وطول الليل شغاله تزن لي في راسي وانا كنت بفكر في كلامها الصباح صحيت بدري عشان اقابل ابوي قبل ما يطلع الشغل وكان بيشرب في الشاي قلت ليهو بصوت مكسور ابوي انا موافقه قال لي بخلعه بسم الله موافقه علي شنو قلت ليهو علي العريس قال لي الـ غير رايك شنو قلت ليهو براي فكرت و وافقت قال لي متأكده ما في زول أثر عليك وبعاين لـ مرتو قلت ليهو اي وطبعا محاسن عايزه تطير من الفرح ابوي طلع الشغل والراجل اتصل علي ابوي عشان يعرف قرارو الأخير واتفقو انو العرس يكون بعد 3 سنين بس محاسن قالت 3 سنين كتيره لبست توبها ومشت لـ بيت عفاف طبعا العريس من اهل راجلها لـ عفاف محاسن قالت ليها كلمي ناس العريس انو نحن خلال سنه نحن جاهزين للعرس عفاف قالت ليها والله هم زاتهم مستعجلين بس قالو 3 سنين عشان شجن لسه صغيره قالت ليها شجن ما صغيره سنه مناسبه للعرس وخالتو عفاف كلمت اهل العريس وحددو العرس بعد سنه ابوي اتصل علي خالتي سماح في السعوديه كلمها وكانت معترضه قالت لأبوي كيف تطلع شجن من المدرسه عشان تعرس ليها هسي ساميه لو حيه ما كان وافقت ابوي قال ليها انا ما طلعتها من المدرسه للعرس شجن من زمان براها رفضت تدرس وقعدت في البيت عشان كده قلت ما امنعها تشق طريق حياتها طبعا خالتي اتصدمت بـ عدم دراستي وجات راجعه من السعوديه مخصوص تشاكلتني كيف اخلي المدرسه وما عارفه إني عملت كده عشان راحة أبوي خالتي سماح قالت لي بعد العرس ح تواصلي دراستك وانا ح اشترط علي اهل العريس كده بقلبي قلت ليها ياتو عريس ده راجل كبير ممكن تسمي ابوي التاني ومرت الشهور واهل العريس جابو الشيله والمال ومحاسن ما صدقت شافت القروش واستولت عليها وعدت الشهور والعقد بعد يومين وعشان حالتنا الماديه اهل العريس كانو عاملين الدعوه عندهم بس ابوي اصره انو يعقد لي في بيتنا حسب العادات طبعا انا ما كنت مركزه في اسم العريس كل همي كان العرس يتم واطلع من البيت واسوق معاي حمودي عشان نتخلص من معامله محاسن وبعد تم العقد جا الـ راجل الكبير اقصد العريس وطبعا اكبر من ابوي جا يسوقني اتخلعت وقلت ده ح اتعامل معاهو كيف عشان كده ابوي كان رافض صاح في الأول اتصدمت بس ما اتأثرت كتير قلت اصلا هنا عايشه في جحيم وهو ما ح يعيشني في ألم أكتر من الألم العشتو خالتو سماح ركبتي معاهو العربيه قدام وهي ومحاسن ركبو ورا الراجل لاحظ لي خايفه ومتوتره قال لي من اللحظه دي اعتبريني ابوك التاني يعني ما تفتكري انك ماشه بيت غريب بقلبي قلت كويس عارف روحك قدر أبوي وقف العربيه جنب بيت كبير عباره عن 3 طوابق وفي الاخر اكتشفت ده بيت اهل العريس وكان عاملين فيهو الحفله بـ فنانه مهججه واول ما دخلنا ""
يتبع⏪⏪⏪⏪
