دخلت غرفتي اتأمل في صورة سامر معقول ده يكون ملكي أنا 😍 بعد شويه جاتني البنت الإسمها ساره دقت الباب قالت لي مدام انزل الغطور جاهز ✋ قلت ليها طيب نزلت لقيت راصين الصحانه في التربيزه بقلبي قلت بعد البيت الكبييير والسمح ده كلو مساكين ما عندهم صينيه بس مع مرور الأيام اكتشفت انو اصلا منظرها كده وبسموها صفره 😂 طبعا فيها كل ما لذ وطاب قلت يا حليل الصينيه الفيها كسره وملاح الويكه طبعا انا باكل حبه حبه ولقمتي صغيره ماما سهير قالت لي يا بتي اكلي وما تخجلي " عمو قال لي لو بتخجلي مننا تاني يرفعو ليك الأكل في غرفتك ✋ قلت ليهو لا باكل معاكم هنا قال لي ونحن لاقنك وين تشرفينا 😍 وان شاء الله بكره ح نبدأ في اجراءات الجواز للسفر قلت ليهو ان شاء الله ✋ بعد انتهينا من الفطور ساره جات تلم الصحاني شلتها معاها قالت لي انت ارتاح انا بشتغل 😊 قلت ليها لا اصلا ما عندي حاجه أعملها ومن اللحظه دي ممكن تعتبريني اختك ✋ بقلبي قلت يا حليلا حالتها زيي وسهير دي تكون مرت ابوها عشان كده بشغلوها زي ما كان بتعمل معاي محاسن فـ لازم انا اساعدها 😔✋ وقفت في حوض المطبخ عشان اغسل العده جات قالت لي لا انت تمشي الغرفه وانا اغسل قلت ليها والله الأ اغسلها انتي من قبيل شغاله 😔 جات ماما سهير داخله المطبخ ساره اتخلعت قالت ليها والله يا ماما انا قلت ليها ترتاح بس هي رفضت 😰 ماما سهير قالت ليها خليها تغسلها وبديت اغسل فيها والعده كلها عباره عن صحانه جبنه وزيتون وتونه مسكينه ما شافت العده البغسلها انا في الطشت في راكوبتنا والشمس في راسي ومحاسن مرت ابوي تشيل وتنقل في العده وتختها لي في الطشت ما فضل الأ تجيب لي عدة الجيران 😅 بغسل وسرحانه في الزكريات لحدي ما انتهيت بعدها طلعت الغرفه طبعا الغرفه مكتمله حتي فيها تلفزيون كبيييير معلق في الحيطه بس ما بعرف افتحو عشان كده قاعده زهجانه 😓 طبعا ماما سهير ادتني اتكلمت مع سامر مره واحده وما اتكلمنا كتير 😓
اليوم التاني مشيت مع عمو الجوازات 😓 تاني يوم الصباح ماما سهير قالت لي عشان مافي زول تتونسي معاهو اكيد بتكوني زهجانه وفعلا انا قاعده منطويه من غرفتي ما بطلع الأ وقت الوجبه 😔 قالت لي ح اتصل علي بنت اخوي في عمرك كده واسمها رزان وفعلا رزان العصر جات تقعد معاي بنت زي العسل 😍 ماما سهير قالت ليها اقعدي مع شجن ونسيها مسكينه ما اتهنت بالعرس بدل تكون هسي في شهر العسل محبوسه في البيت هنا 😢 بس ان شاء الله تسافر لراجلها ويعوضها كل شي وانا طبعا خجلانه من كلامها 🙈 نادت ساره قالت ليها اعملي ليهم العصير وارفعي في غرفة شجن ساره قالت ليها حاضر ماما ✋ بقلبي قلت مسكينه ياااخ البنت دي زكرتي بروحي زمان قلت ليها بعملو انا 😢 ماما سهير قالت لي لا انتو اطلعو اخدو راحتكم في الونسه وهي بتجيبو ليكم رزان شالت شنطها وطلعنا اول ما دخلت الغرفه وقفت قدام صورة سامر قالت ليهو كده يا ولد عمتي تغدر بي وتعرس وحده غيري 😒 طبعا انا بسمع فيها ومخلوعه 😳 عاينت لي وضحكت قالت لي ما تنططي عيونك بهظر معاك ساي والله بس اقعدي جنبي هنا من زمان عايزه الفرصه دي أحكي لي وقعتي ولد عمتي ده كيف في شباكك وخليتي يحبك 😍 جات ساره دقت الباب ودخلت ختت العصير في التربيزه وعايزه تطلع قلت ليها ساره تعالي اقعدي اتونسي معانا 😊 قالت لي انا عندي شغل قلت ليها تعالي اقعدي وبعد نتونس بنمشي نشتغل معاك 😊 قالت لي لا انت ارتاح طبعا رزان بتعاين لي مخلوعه قالت لي تشتغلي مع منو 😳 قلت ليها مع ساره مسكينه ياااخ طول اليوم شغاله 😢 رزان قعدت تضحك قالت لي لو ادوني قروشها دي بشتغل لحدي ما اموت 😂 قلت ليها يعني هي بدوها قروش 😳 قالت لي انتي فاكره انها بتشتغل ليهم مجان 😒 قلت ليها يعني هي ما بتهم 😳 قعدت تضحك قالت لي يا بنت انتي برئيه ولأ غبيه بعتزر في الكلمه دي طلعت مني بالغلط بس دي الشغاله هم ما عندهم غير سامر معقول ما عارفه اهل راجلك 😳 طبعا انا كنت فاكراها من الاسره ياااخ دي انضف من نيتي ولبسها كلو بناطلين 😅 رزان قالت لي خلينا في المهم نرجع لموضوعنا انتي اتعرفتي علي سامر المغرور ده وين 😍 واكيد انتي ما زميلتو في الدراسه لانو كل دراستو في امريكا اها عرفتي عن طريق الفيس ولأ الواتس ولأ الانستغرام ولأ الاسناب شات 😉 قلت ليها ولا واحد لأني اصلا ما بعرفو نططت عيونا قالت لي طيب شافك وين 😳 قلت ليها ما شافني 😊 اتخلعت زياده قالت لي انا جاده معاك والله ما اكلم زول قلت ليها والله دي الحقيقه اتزوجت زواج تقليدي عن طريق اهلي ✋ قالت لي خلاص وصفي لي الشيخ المشيتي ليهو لانو شكلو شيخ قوي انا سكت قالت لي يا بنت بهظر معاك والله 😂 عندنا قروب بنات العائله اها رقمك كم عشان ادخلك فيهو قلت ليها بس ما عندي تلفون 😔 قالت لي ما مشكله مليني رقمك وبعد تصلحي تلفونك ادخلي 😘 قلت ليها قصدي ما عندي رقم 😢 قالت لي كيف يعني لا تلفون لا شريحه إنتي جاده 😱 قلت ليها اي والله 😔 قالت احييي يا و لد عمتي يعني متكبر وتغيان وعرست وحده واتس ما عندها اسفه ما قصدي 😰 صاح كلامها جارح بس عفويه فتحت تلفونها وقالت لي سجمي الدعم السريع جايي قومي اقشري 😱 قلت ليها شنووو ما فهمتك 😳 قالت لي ديل بنات القروب يعني بنات العيله جايين يسلمو عليك 😓 فتحت الدولاب طلعت توب قالت لي يا بنت انتي مجنونه انتي من زمن التياب زحي كده طلعت لي فستان مع الجسم قالت لي قومي ألبسي ده ✋ قلت ليها بري ده ما بلبسو ح يكون ضيق فيني 😓 قالت لي عليك الله انتي جاده ح تمشي تعيشي في امريكا احيييي يا ريتني لو مكانك 😍 قومي ألبسي وبعدين اصلا قاعده في البيت هنا يعني ما ح تطلعي بيهو 😒 وفعلا لبستو قالت لي واااااو اول مره اعرف انو فستاني حلو كده وانا لي ديشليون سنه بلبس فيهو ما حصل عجبني كده بس ما شاء الله جسمك مقسم 😍 وطلعت لي شنطه قالت لي يلا بعد ده اتمكيجي وانا قاعده في السرير وبعاين للشنطه قالت لي مالك 😳 قلت ليها ما بعرف 😢 قالت لي أحلفي قلت ليها والله ✋ قالت لي سامر ح يتصدم فيك وتاني قالت لي اسفه والله 😓 بس ما تخافي ح اعلمك اي شي قبل تسافري ✋ الحيوانه كل مره تقصف جبهتي وتقول لي اسفه 😏 قالت لي قدام البنات اعملي انك مفتحه وبتعرفي اي حاجه عشان ما يضحكو فيك تمام ✋هزيت ليها راسي قالت لي طبعا نحن من نعرف سامر جايي السودان اجازه القروب كلو بتقلب انبراش واي وحده فينا بتتحبس قبل شهر نضافه وحكحكه في جسمها زي العروس 😅 ولم سامر يجي البيت هنا بيتملي بنات وبنشتغل شغل ياااخ ساره الشغاله بترتاح لا وكمان بتتأمر فينا 😂 وبعد ده كلو سامر يدخل ويطلع وما شغال بوحده فينا ياخ كان بعبر ساره أكتر مننا 😏 اصلا مفتري ومغرور وشايف روحو وفي الآخر عرسك انتي الكحل ما بتعرفي تختي ياااخ انا خسرت كترة قروش في جسمي كان عرسوني ما كان خسرت كده هسي بس تعوضوني ليها 😅 قعدت اضحك قالت لي ما تتحركي ح تخربي الايلاينر بعد ظبطت وشي قالت لي كده يادوووب ممكن الواحد يقول عليك مدام سامر 😍 وفعلا البنات وصلو ياااخ بنات نضافه ورقه عجيييبه بعد قعدو قالو لي قمر وسامر عرف يختار 😘 بقلبي قلت ليهم يشهد الله كلو مكياج بفضل رزان 😂 وحده قالت لي اتعرفتي علي سامر كيف 😊 نطت رزان قالت ليها عن طريق الصدفه في اجازتو الفاتت شجن ماشه صالة الزومبا وسامر لمحها في الشارع ودي كانت أجمل صدفه 😍 بقلبي قلت صالة الزومبا دي شنو كمان 😳 البنت قالت ليها نحن قاعدين ليهو هنا زي الحبشيات وسامر عينو في صالات الزومبا 😏 لو عارفه كده ما كان خسرت مجهودي هنا 😅 وحده قالت لي شجن انا حبيتك والله عندنا قروب ظريف رقمك كم عشان ندخلك فيهو 😘 نطت رزان قالت ليها هسي شجن شريحتها حرقت وسامر قال ليها مافي داعي تطلعيها تاني وانتي اصلا جايه امريكا نطت وحده قالت اريتو حالي بعد الحال 😍 قالت لي خلاص اول ما تمشي اتواصلي معانا برقم سامر لحدي ما يجيبو ليك شريحه قلت ليها ان شاء الله ✋ بعد طلعو قلت لـ رزان شكرا عشان طلعتيني من اسئلتهم 😘 قالت لي لا شكر علي واجب بس اوعك تسمعي كلامها وتدخلي برقم سامر دي اكبر شلابه 😓 طبعا عمو عبد الفتاح لم عرف ما عندي تلفون اشتري لي احدث تلفون ورزان ما قصرت معاي قعدت معاي لحدي ما ستفت معاي الشنط للسفر طبعا كنت مسافره مع ولد عمو لـ سامر اسمو عمار شغال في امريكا جا السودان اجازه وراجع يوم السفر ودعنا الأهل واتحركنا علي المطار 😭 ""
يتبــــع ⏪⏪⏪⏪
