في اللحظه دي باب الشارع دق ابوي مشى فتحو ولميس جرت قدامو انا من الحوش دخلت الهول وما عايزه اقابلو بطني طمت منو بعد عرفت عمايلو 😓 سامر جا داخل وشايل بتو طبعا لميس حالتها بـ البلا التراب من رجلها لراسها ما عارفه سامر عرفها دي بتو كيف 😅 قعد مع ابوي في الحوش قال ليهو يا عمي لم عيان ليييه ما قلت لي عشان تشيل اجازه وانت عارف انو الشركه دي شركتك ولأ ما بتعتبرني في مقام ولدك 😓 ابوي قطع كلامو قال ليهو يا ولدي منو القال ليك عيان انا الحمد لله كويس وانت والله بعتبرك ولدي الكبير 😍 وبالعكس الليله من دون الأيام فرحان عشان مشكلة الشركه اتحلت في الإجتماع 😍 سامر قال ليهو الحمد لله " وانا قاعده جوه وبسمع في كلامهم وكده اتأكدته انو سامر ما كذب علي الصباح لم قال عندو اجتماع ✋ سامر همس في اضان لميس وبعدها نزلت منو وجاتني جاريه ماما ماما بابا دال ليت تعالي 😊 قلت ليها امشي قولي ليهو ماما مافي قالت لي ماما بث التذب حلام 😒 ما عرفت اضحك ولأ ابكي يعني انا القاها من سامر ولأ من بتو 😓 قلت ليها خلاص جايه وانا قاعده جاتني محاسن قالت لي انتي ما عايزه تقابلي راجلك ولأ شنو 😒 قلت ليها هو جايي يقابل ابوي عشان كده خليهم براحتم بعد شويه جا ابوي داخل وقطع كلامنا قال لي يا بتي راجلك ده منتظرك قال دايرك في كلمتين ✋ قلت لابوي قول ليهو مصدعه 😓 قال لي يا بتي هو جا لحدي هنا اطلعي ليهو الصداع ما بيمنعك تتكلمي معاهو نطت محاسن قالت لي انتو متشاكلين ولأ شنو بس ابوي سكتها قال ليها ما تتدخلي بينهم 😓 وكانت عايزه تطلع معاي بس ابوي ثبتها انا طلعته وقعدت في طرف السرير حتي ما قدرت اسلم عليهو ومنزله راسي في الأرض عشان ما اشوف وشو 😓 قال لي شجن ليييه ما كلمتيني انك جايه والسبب شنو في انك تتصرفي معاي كده 😒 وانا ساكته قال لي احكي عملت ليك شنو يخليك ما ترفعي راسك تعايني لي لحدي آخر لحظه كنا كويسين ✋ قلت ليهو كنا كويسين قبل ما اعرف قزارتك ولو عايز تعرف في شنو افتح تلفون الشركه زي ما سميتو واقرأ رسايلك وانت تعرف سببي 😏 وجريت دخلت الغرفه ومحاسن عايزه تموت وتعرف الشمار بس الحمد لله ابوي ما سألني وما ضغط علي بالكلام ✋ بعد مسافه جاتني لميس جاريه وشايله كيس قالت لي ثوفي بابا داب لي ثنو 😍 فتحت الكيس لقيت فيهو جبنه مضفره وجبنه عاديه وهوت دوغ وشكولاتات وحمودي ناولني كيس صغير قال لي سامر قال لي ده اديهو لـ شجن فتحت الكيس لقيت فيهو قروش والموبايل حقي 😓 ومحاسن متابعانا بنظراتها بعد عرفت الحاجات قالت لـ لميس اديني الحاجات الندخلها ليك التلاجه 😊 عايزه تعمل مع بتي زي ما كان بتعمل معانا زمان لم خالتي بترسل لينا الحاجات 😏 قلت ليها ما تتعبي بحتفظ بيهو انا وقلت لـ لميس جيبي الكيس شلتو منها وقسمت الشكولاته علي لميس واخواني حتي ولدها كنت بعتبرو زي اخوي ما بعمل زيها وافرز بينهم ✋ المساء لميس قالت لي ماما اتسلي علي بابا يجي يثودنا انا عايسه انوم 😔 عشان متعوده لم نجي هنا زياره المغرب سامر بجي يرجعنا ✋ قلت ليها لميس الليله ح ننوم هنا استسلمت للوضع مع انها ما كانت راضيه 😓 والليل كلو كانت مقلقه وغالبها تنوم بالرغم من اني نومتها في المكيف 😔 اليوم التاني الصباح جهزت حمودي ولميس لبستهم للمدرسه وعملت ليهم الفطور وانا في المطبخ جات محاسن داخله قالت تعالو يا اولاد الـ نعمل ليكم فطوركم مساكين كل يوم تاكلو في الطعميه والفول 😏 طبعا قصدها تسمعني الكلام قلت ليها فطورهم جاهز عملتو ليهم مع حق لميس بنتكلم كدا السواق ضرب البوري نطت محاسن قالت لی یا شجن ما تكلمي السواق يوصل معاهو اخوانك ولأ عشان محمد ولد امك وابوك وديل اولاد ابوك 😏 قلت ليها طيب بكلمو طلعت للسواق قلت ليهو بعتزر بس عندي طلب صغييير ولو ما بتقدر عليهو خليهو قال لي اطلبي وان شاء الله يتنفذ ✋ قلت ليهو بصوت محرج ومكسور لو ممكن توصل معاك الـ ولدين ديل مدارسهم مع انو عارفه فيها تعب ليك 😔 قاطعني قال لي مافيها تعب والله طوالي بوصلهم ✋ بعد الاولاد طلعو المدارس محاسن قالت لي شجن ما بلقى عندك قروش تسلفيني ليها لحدي ما صلاح يجي عشان المصاريف ناقصه وانا ماشه الخضار والقروش ما بتكفي 😓 وانا عارفه انها كضابه ده كلو عشان امس شافت القروش الـ رسلها سامر 😏 قلت ليها تمام قالت لي بس ما تكلمي ابوك وانا برجعها ليك قلت ليها ما ترجعيها اعتبريها هديه مني ليك ✋ عدا اليوم وعادة لميس وحمودي بيصلو البيت الساعه 3 بس اليوم ده اتأخرو حوالي الساعه 3 ونص اتصل سامر بس ما رديت عليهو بعدها اتصل السواق قلت اكيد حصلت ليهم حاجه فتحت الخط قلت ليهو مالكم اتأخرتو الحاصل شنو 😳 بس رد لي سامر كان متصل من تلفون السواق قال لي حاصل كل خير قلت ليهو سامر الأولاد وين 😒 قال لي الأولاد في بيتهم لو عايزاهم تعالي اها ح تجي 😉 قلت ليهو ومنو السمح ليك تسوقهم معاك 😠 قال لي نسيتي انهم اولادي يعني ما محتاج اني استأذن من زول 👌 قلت ليهو صح نسيت لميس بتك بس حمودي ما عندك حق تسوقو خلال ساعه عايزه حمودي يكون وصلني 😠 قال لي وااااو يعني بتتنازلي من بتك بالسهوله دي وبعدين انا حمودي بهمني اكتر من لميس ولو عايزاهم بكلم السواق يجيبك ليهم هنا ✋ قلت ليهو استحاله تاني اجي راجعه البيت داك وبتي ما اتنازلت منها بس زي ما قلت انت ابوها ما بمنعك ليها بس حمودي ما عندك حق فيهو وبعرف اجيبو بطريقتي ✋ قفلت الخط في وشو وفضلت أبكي 😭 جات محاسن داخله مسحت دموعي قالت لي شجن بتك وحمودي مالهم اتأخرو كده 😓 قلت ليها ساقهم سامر قالت لي شجن احكي لي انتي وسامر متشاكلين قلت ليها لا وحمرت ليها وقمت من جنبها 😒 لو قعدت اكتر كان ح تزيد في الأسئله والليل كلو مساهره بفكر في كلام سامر يعني عايز يمسكني من يدي البتوجعني ( الأولاد ) بس برضو استحاله أرجع ليهو ✋ اليوم التاني بعد الدوام انتهي وصلت المدرسه واول ما الاولاد شافوني جو جارين حضنوني سلمت عليهم وبوستهم 😘 حمودي قال لي هدا عمو واشر لي علي العربيه قلت امشي اقول للسواق وصلنا بيتنا بس اول ما وصلت العربيه لقيت فيها سامر قال لي مفاجأه صح 😊 ما ناقشتو مسكت الأولاد وقلت ليهم تعالو معاي 😓 سامر نزل من العربيه قال لي يعني ح ترجعو بالمواصلات 😊 قلت ليهو ما بيخصك وبعدين في اقتراح اسمو امجاد 😒 قال لي طيب في الأول قبل ما تمشي أسألي الأولاد عايزين يمشو معاك ولأ معاي قلت ليهو اكيييد معاي ✋ قال ليها لميس ماشه مع ماما ولأ معاي قالت ليهو معات ودي صدمتي الأولي 😳 قلت ليها اوك يا لميس وفكيت يدها قلت ليها امشي ليهو 😔 يلااا يا حمودي في اللحظه دي حسيت بالخساره الحقيقيه نط حمودي قال لي شجن انا عايز امشي معاهم قلت ليهو لا 😠 ومسكت يدو سامر قال لي ح تغصبي عشان يمشي معاك قلت ليهو ما عندك دخل فينا 😒 حمودي فك يدي قال لي شجن انا عايز امشي مع لميس 😰 وسامر واقف مبتسم نظام انتصر علي 😊 ومن غير ما افكر رفعت يدي وصج كفت حمودي قلت ليهو انا قلت لا يعني لا 😠 لميس ماشه بيت ابوها وانت ح تمشي بيت ابوك سامر في اللحظه دي نزل لميس وصرخ فيني شجن 😡 وجا بسرعه شال حمودي وانا ما واعيه بعمل في شنو ودموعي نزلت 😭 الحمد لله العربيه كانت واقفه بعيييد ما جنب المدرسه سامر جا مسكني من معصم يدي شديييد قال لي ده شنو العملتي ده 😠 وركبني العربيه واتحركنا لميس
قالت لـ حمودي ما تبكي انت بث ساهبي وماما ما ساهبتنا وح نخاسم ماما 😒 نط سامر قال ليها بحده لميس 😠 قالت ليهو بس ماما دربت همودي لهدي ما ببكي 😢 قال ليها حمودي غلط عشان كده ماما ضربتو وحمودي راجل والراجل ما ببكي صح يا حمودي 👌🏻 وانتي عيب تقولي كده علي ماما 😒 انا بعد استوعبت الحصل قلت لـ سامر نزلني هنا عشان ما انزل من العربيه وهي متحركه 😭 قال لي اول اهدي ح اوصلك بيت ابوك ومن غير كلام ✋ وفعلا وصلنا البيت انا فتحت الباب نزلت وحمودي نزل سامر قال لـ لميس انزلي مع ماما قالت ليهو بحدين بتجي تثودنا 😊 قال ليها اي نزلت انا دخلت الغرفه وما كنت طايقه زول حتي روحي ما كنت طايقاها 😓 جاتني محاست في الغرفه قالت لي شجن مالكم انتي وحمودي 😳 قلت ليها بإنفعال انتي حياتك كلها اسئله ما بترتاحي الأ تعرفي اخبار الناس مافي حاجه وتاني ما تسأليني اي سؤال اوك 😠 اتخلعت طلعت وبعد راجعت نفسي ضميري أنبني بسبب كف حمودي طلعت الهول لقيت محاسن تسأل في حمودي قلت ليها انتي مُصِره انك تسألي اتخلعت 😳 قالت لي ما كده بس خفت عليكم قلت ليها وين خوفك علينا من زمان ايام كنا محتاجين ليك عايزه تخافي علينا هسي بعد استغنينا عنك بس احب اطمنك انا وحمودي ولميس ح نقعد هنا بحقنا ومصاريفنا متكفله بيها انا تمام ✋ بقت تتمتم انا أنا ما قصدي وانا ... قطعت كلامها قلت ليها هسي ممكن تخلينا برانا ✋ طلعت من غير ما تتكلم بس كده عرفتني انو انا ما شجن الزمان كانت ضعيفه 😓 سامر علمني اثق في نفسي بس للاسف هو الـ علمني الثقه وهو الغدر بي 😔 المهم حضنت حمودي وقلت ليهو زعلان مني هز لي راسو لا قال لي بس ده سامر القال لينا قولو لـ شجن كده 😢 اتخلعت قلت ليهو قال ليكم شنوووو 😳 قال لي سامر امس قال لينا انا ولميس بكره قولو لـ شجن نحن ما ماشين معاك وماشين مع سامر عشان شجن زاتها تجي معانا بس انا ما كنت فاكرك ح تضربيني 😰 حضنتو علي شديييد وقلت ليهو اسفه طبعا حمودي بعتبري امو عشان أنا الـ ربيتو المساء حولي الساعه 9 مساء كـالعاده لميس قالت عايزه ابوها والأ اتصل عليهو يجي يسوقنا 😓 قلت ليها لميس انتي بتحبي ماما ولأ بابا قالت لي الإتنين 😢 قلت ليها لا واحد بس انا ولأ بابا قالت لي الإتنين لم زهجتني قلت ليها لميس انتي عايزه تقعدي معاي هنا ولأ مع بابا 😒 قالت لي اقعد انا وانتي وبابا وهمودي قصدها زي زمان 😔 قلت ليها لا انا بقعد هنا وبابا بقعد هناك انتي عايزه تقعدي وين قالت لي مع بابا 😢 وبزعل قلت ليها يعني عايزه بابا اوك لبستها وشلت حاجات مدرستها حمودي قال لي يعني ما ح تسوقوني معاكم وح اقعد هنا براي 😰 قلت ليهو انا جايه هسي ما بتأخر طلعت وماسكه لميس ابوي قال لي ماشه وين الوقت ده 😳 قلت ليهو اوصل لميس عايزه ابوها 😓 قال لي طيب ح تمشي بشنو إتصلي علي سامر يجيها ولأ يرسل السواق قلت ليهو طلبت ترحال مضمون بمشي وبجي راجعه معاهو ✋ وفعلا ركبنا العربيه وصلنا البيت واول ما ضربت الجرس البواب فتح الباب قلت ليهو وصل لميس لـ سامر جوه 😊 قال لي بس سامر طلع ✋ بقلبي قلت يعني كان منتظرني اترك البيت عشان ياخد راحتو مع الحيوانه 😏 قطعت افكاري لميس جرتني من يدي ماما تعالي وعايزه تدخلني فكيت يدها قلت ليها انتي ادخلي مع عمو انا عايزه ادفع للعربيه القروش وبجي 😊 قالت لي لا تعالي 😢 قلت للبواب دخلها لـ حبوبتها بوستها وقلت ليها يلا اسمعي الكلام وانا هسي بجي 😘 لميس دخلت وانا مسحت دموعي عشان سيد العربيه ما يلاحظ انو في حاجه 😔 ركبت العربيه وقبل ما نتحرك سامر وقف بـ عربيتو قلت للسواق اتحرك وسامر بنادي فيني السواق قال الولد ده بناديك قلت ليهو لا ما تقيف ما معاي 😓 سامر دور العربيه وماشي ورانا وبكنتك بالنور وبضرب في البوري للسواق عشان يقيف السواق قال لي انتي بتعرفي لانو جايي ورانا 😓 قلت ليهو ما بعرفو وما تقيف ليهو بتكلم مع السواق كده سامر اعترض الطريق بالعربيه الحيوان طبق سواقة امريكا هنا 😱 السواق اضطر انو يقيف سامر نزل من العربيه وجا فتح الباب عايز ينزلني بس انا ""
#يتبــــع ⏪⏪⏪⏪
