زميلتي في قسم المحاسبه في العيادات الخارجية وجدت تشابه كبير في الأسماء ما بيني وبين واحد من المتقدمين لزراعة النخاع ولقيتها في وشي وهي حاطه أديها في وسطها .
ماجده : يا ستي عرفنا أنك بتكرهي الواسطه بس عرفيني أن أبوك من الناس المتقدمه على الأقل أعمل الواجب معاه وأجيبله حاجه ساقعه ده أنت حتى جدعه مع الكل ينفع تحطيني في الموقف ده طيب يقول عليا أيه .
نعمة : مش هيقول حاجه وبعدين أش عارفك أنه أبويا مش يمكن تشابه أسماء .
ماجده : هو أنتي هتعمليهم عليا ولا أيه تشابه الأسماء ما يجيش لغايه الأسم الرباعي يا نعمة ولا فاكراني هتوه عن أسمك وبعدين ما قولتليش ليه أن أخوكي تعبان .
نعمة بدهشه أخويا.
ماجده : الله مش مروان ده يبقى أخوكي .
نعمة بصي يا ماجده أنا محتاجه أرجع لشغلي نبقى نتكلم بعدين .
و خلصت شغل ورجعت للبيت وأنا رأسي بتلف زراعة نخاع وأخويا .
طبعا رجعت البيت وما قلتش لحد على الموضوع ده و قررت أني هنسى المسأله دي وأشلها من دماغي خالص وأنا مالي وأن سألتني ماجده هقولها مش أبويا ولا أعرفه وهو كان عرفنا ولا سأل علينا .
والصبح كملت الروتين بتاعي عادي أطمن على أمي والعربيه وأغلس على حمدي وبعدها على المستشفي عدل بصراحه حمدي كان نفسه طويل قوي بس الخوف إلي جوايا ده مش مخليني قادره أخد قرار في موضوع الأرتباط وعماله أجل بحجج فارغه وأنا في القسم بتاعي بصيت لقيت حد بيقولي نعمة
أتلفت لقيته أبويا بيبص في وشي وبيقولي أنت نعمة .
نعمة بتنهيده أيوه يا فندم حضرتك محتاج حاجه.
أبويا أنت مش عرفاني يا نعمه أنا أبوكي .
بصيت حوليا وبعدين أجبته أجابه كان نفسي فيها من زمان أسفه يا حضرت أنا أبويا مات من زمان حضرتك غلطان في العنوان وسبته ومشيت .
كنت فاكره أني لما هعمل كده هرتاح لكن على العكس بصيت لقيت الدموع بتنزل من عنيا من غير ما أقدر أسيطر عليها ودخلت الحمام وأنفجرت في العياط لغايه ما هديت ولما رجعت للقسم لقيته مستنيني وكان شكله مكسور .
أبويا نعمه ممكن نتكلم شويه أرجوكي .
نعمة أنا عندي شغل كتير .
أبويا هقعد وأستناكي .
وفعلا قعد وأستناني لغاية ما خلصت شغل فأخدته وقعدنا في الكافتريا بتاعت المستشفي .
أبويا ياه ما صدقتش نفسي أنك كبرتي كده وبقيتي عروسه , أزي فردوس يا نعمة .
نعمه الحمد لله كلنا كويسين أنا زي ما أنت شايفني كده ممرضه في مستشفي كبير و حنين في كلية الأداب و رحمة بقى داخله حقوق بإذن الله أه صحيح أنت ما عرفتش أن أختنا الثالثه أتسمت رحمه .
أنت تقرأ
أوراق من الحب والسعادة
Romanceهل بحثت يوما عن الحب الصادق ولم تجده؟ هل يأست يوما من أن تجد سر السعادة ؟ لماذا لا تقلب داخل أوراقنا فقد تجد بينها ضالتك مجموعة من القصص القصيره باللهجة المصرية يقص علينا أصحابها سر من أسرار السعادة . تنويه : أي تشابه بين الأسماء و شخصيات القصه وأي...
