أنا سمعت التليفون بيرن وأنا دماغي لفت ما كان الوقت قدامك قبل المباراه حبكت دلوقتي .
بابا بغضب ده مين السئيل إلي بيتصل دلوقتي ده وبص في التليفون وقال وكمان رقم مش معروف مش فايقلك وراح قفل التليفون .
حمدت ربنا أنها جت على قد كده لأن بابا في مود مش حلو أنا أزاي نسيت موضوع المباراه كان لازم أنبه عليه ما علينا بس مصيبه أحسن يفتكر حسن أن بابا عارف ورافض أعمل أيه دلوقتي .
الصبح أول حاجه عملتها أول ما وصلت الشغل أني دورت على رقم حسن وقبل ما أتصل لقيته قدامي .
حسن السلام عليكم.
بسمه وعليكم السلام يا حسن أهلا أتفضل .
حسن وهو بيتعامل برسميه أنا كنت بمر علشان أخلص ورق الشحنه الجديده و .
بسمه هو أنت أتصلت بوالدي أمبارح يا حسن .
حسن أه على العموم والدك قال رأيه بصراحه وأنا تفهمت الوضع .
بسمه بدهشه قال رأيه أيه هو رد عليك أمتي .
حسن خلاص يا أنسه بسمه ما فيش داعي أنا .
بسمه أرجوك أفهم بس هو رد عليك امتي .
حسن أنا أتصلت أمبارح في حدود الساعه خمسه رن مرتين وبعدين قفل عليا قلت مشغول بعدها بساعتين تقريبا أتصلت فتح عليا وشتمنى وقفل السكه .
أنا في نفسي يادي المصيبه هو فتح عليك بعد المباراه ده انا كنت فاكره أن الرقم الغريب إلي أتصل به كان أنت .
بسمه لا يا حسن أنت فهمت غلط هو كان فاكرك واحد بيعاكس معلهش جت فيك .
حسن بضحكه أه علشان كده ما أدنيش فرصه اقول حاجه لا خلاص حصل خير يعني أقدر أتصل به النهارده .
بسمه ثانيه واحده وطلعت التليفون وبصيت في النت لا النهارده فيه ماتش للأهلي ولو كسب هتبقي مصيبه ثانيه فبصيت لحسن بأبتسامه وقلتله بص خليك بكره علشان النهارده هو عنده شغل لغايه وقت متأخر وأحتمال ما يردش على التليفون ماشي .
حسن بأبتسامه ماشي .
حمدت ربنا أني عرفت ألم الموضوع وعلشان ما يتكررشي فاتحت ماما في الموضوع وقلتلها على ماحدث .
أمي بخجل يا دي الخيبه أبوكي ده ما فيش فايده من عصبيته في الكوره ,يا بنتي ده أنا فاكره أن خالتي جت زارتنا في يوم وكان فيه ماتش للزمالك دخلت وقعدت يادوب عشر دقائق وراحت هربت من البيت وهي خايفه من نرفزته أعمل أيه بس المهم أن الرجل ما أخدتشي على خاطره مش كده .
بسمه لا يا ماما انا أخترعتله كذبه كده أن بابا كان فاكره واحد بيعاكس .
أمي ودي حاجه تدخل الدماغ يا بسمه .
بسمه أهه إلي جه في دماغي يا ماما وعلى العموم هو صدقها وقال انه هيتصل بكره ثاني, أنت بقى كلمي بابا و يعني هيئيه للموضوع ماشي .
أمي ماشي بس قوليلي هو زملكاوي ولا
بسمه بقلق تصدقي يا أمي أني ما سألتوش على الموضوع ده خالص .
أمي معقول أنت مش شايفه أبوكي وأهله شكلهم أيه ده مش بعيد يولع في العريس أن طلع أهلاوي .
بسمه لا متقوليش إن شاء الله زملكاوي .
وقفت قدام المرايا وأنا مبسوطه وبتزوق حسن وأهله جايين النهارده علشان يتقدمولي كنت حاسه أني طايره من الفرحه ووقفت جنب باب حجرتي أتصنت لغايه ما سمعت بابا بيرحب بيهم ويدخلهم حجره الصالون .
دخلت أختي بابتسامه وهي بتقولي أنا قلت أنك هتبقي واقفه ورا الباب بس أيه ده يا بسومه الواد قمر طول بعرض وشكلهم ناس محترمين ربنا يتمم بخير يا حببتي .
بسمه بهمس يارب .
أمي أيه يا بنات واقفين زي الحراميه كده ليه تعالوا ساعدوني وأنتي يا عروسه يالا علشان تشيلي الصنيه .
بسمه أيه رأيك فيه يا ماما مش طيب .
سمعنا ضحك في حجره الصالون فأمي أبتسمت وقالتلي من الواضح أنه نال القبول يالا بقي
دخلت بالصنيه وأنا مكسوفه قدمت لوالدته طبعا الأول وبعدها والده أما هو فأخد مني الصنيه وحطها على الطرابيزه وهو بيقولي عنك أنت .
قعدت بخجل بجانب أمي .
ألهام (أم العريس ) بسم الله ماشاء الله عروستنا زي القمر
أمي ربنا يخليكي كمان حسن ربنا يخليهولك رجل على خلق .
محمد ( أبو العريس ) طيب أحنا بصراحه كده جايين نطلب يد الأنسه بسمه منكم لأبننا حسن فأيه رأيكم.
بابا وقتها رد عليه بأنه يشرفنا بس سيبونا نفكر ونشاور نسأل عليكم وتسألوا علينا يعني .
وفعلا سأل بابا على أخلاقه وطباعه و أهله الكلشكروا فيهم وأعلمناهم بالموافقه و قعدوا وأتفقوا على كل حاجه وبابا كان مبسوط علىالاخر وقرر يعمل الخطوبه في نادي الزمالك وهنا بقى بدأت المشكله .
أنت تقرأ
أوراق من الحب والسعادة
Romantizmهل بحثت يوما عن الحب الصادق ولم تجده؟ هل يأست يوما من أن تجد سر السعادة ؟ لماذا لا تقلب داخل أوراقنا فقد تجد بينها ضالتك مجموعة من القصص القصيره باللهجة المصرية يقص علينا أصحابها سر من أسرار السعادة . تنويه : أي تشابه بين الأسماء و شخصيات القصه وأي...
