الرحلة الاخيرة | مكتملة

3

الجزء الثالث
#الرحلة_الاخيرة
#زوي

" تيقني ا سي حميد .. ماعندي والو غير غادي نتحول و صافي و غادي نتوحشكم و صافي راه مادوزناش القليل داكشي علاش"
حميد: " رغم هاد الجواب ماقنعنيش و لكن حسيت بيك ماغاديش تعاودي ليا و انا ماغاديش نبزز عليك مازال ... الله يسهل علييك في المدينة لي غادي تمشي ليها ... و لكن راه نمرتي عندك فيما تحتاجي شي حاجة و لا يكون عندك شي مشكل تفكريها و انكون جد ممنون و انا نعاونك ا بنتي"

من بعد ماقدرت نتهرب من سي حميد توجه لبيرو هزيت كاع داكشي لي جمعت و توجه لدار باش يالاه نكمل الشغال لي تابعيني .....

داز 3ايام لقيت فيها المدير سنا ورقتي و وصلوني كاع المستحقات ديالي واخا لقيت شي حاجة زايدة عرفت ايكون غير سي حميد لي دخل باش تزاد .... اول مسمار طرقتو عليا.

من بعد مشيت عند طبيب لي تبعت معاه  بما ان العلاج لي لقيت غاااالي بزاااف و برا البلاد و زيد عليها 10% ضمانة ينجح و لا لا فعلا نحاول نتعالج في بلاصة ما دوز ايامي في داكشي لي كنبغي ... من بعد عدة حصص قدر طبيب يعطيني واحد الدوا لي يكالمي ليا الصداع ... باقة نتفكر هضرتو
" هاد الكينات لي غادي تبداي تشربي فنما يجيك صداع مزيانين و لكن من بعد ماغاديش يبقاو ينفعوك خاصك كل مرة وحدين اقوى منهم و لكن تقدري تلقايهم و تقدري ماتلقايش .... المهم من بعد ماخديتي قرارك ماعندي مانقول ليك من غير الله يشافيك و ربي معاك"
و لكن ماعندي ماندير اللهم نبدا نبرد صداع كل مرة و لا بلاش .... من بعد كنت مشيت لفارماسي باش ناخد الكمية لي غادي تكفيني و بحكم ان الدوا قليل فين كيتباع اضطريت انني نمشي لعدة صيدليات باش يالاه نجمع الكمية لي بغيت .... و هذا هو المسمار ثاني طرقتو.

المسمار الثالث هو السمسار ... درت دار للبيع بحكم انها مكتوبة كلها بسميتي فمالقيتش مشكل باش نحط للبيع.
من بعد مشيت عند واحد سيد كيبيع و يشري الاثاث المنزلي المستعمل بعت ليييه كلشي جملة و بحكم دار عندي 3 طوابق فبعت ليه داكشي بزاف و كاع الفلوس لي ربحت من عندو ديتهم نيشان لبنكة.

دازت اسبوعين  لقيت لي يشري الدار و بثمن كثر من مناسب حيث الدار جات قريبة لسونطر المدينة فكان الثمن طالع شوية حتى الثمن ديال الدار مشا البنك من بعد ماتكاتبنا و رجعات دارو هضرت معاه باش يخلي ليا دار 3 سيمانات اخرين على مانقدي اخر شغال.

سيمانة لولة لي كنت شديت فيها كونجي و من بعدما كنت كئيبة بسباب المرض لي عرفت و لكن جمعت راسي هادشي مكتاب ليا و ماعندي ماندير و في بلاصة ما نبقى نبكي على زهري و مكتابي علاش مانوضش نحقق فيه داكشي لي كنت نحكلم بيه 28 سنة و باقي يالاه حققت الخدمة لي باغة نوصل ليها فعلاش مانحققكش اكبر حلم كنت كنتماه و هو جولة حول العالم .
عارفة خاصني بزاااااف الفلوووس و ضربت حساب في راسي الا بعت لي واريا و قدامي ايجيب ليا فلوس ديال العلاج و ديال السفر لي بغيت واخا ماشي حول العالم و لكن حول اغلب الدول و تما فين خديت قرار نخسر فلوس و نتمتع في اخر ايامي على نمشي نضيعهم على امل 10% و من تما كنت مشيت لقنصليات سولت و جمعت الوراق لي خاصيني  و بقى ليا غير ورقة ديال البنك باش يشوفو الحساب و تما فين حتاجيت سي حميد لي قلت ليه بغيت نمشي عند خويا و نضرب ضورة و حيتاش كيعرف شي واحد تما هو لي دفع ليا دوسي  على ماكملت و بعت دار باش حطيت الفلوس في كونط و دابا كلشي واجد الحمد لله ....

بقى ليا مسمار واحد و هو البنك ... خليتو هو الاخير على مانبيع كلشي كاع لي ورايا و لي قدامي خليت باليزة ديال الحويج صافي..... خديت الفيزا و قطعت التيكي و رديت الكونط ديال دولي و خديت لاكارط دولية باش نبدا الجولة لي كنت ديما نحلم بيها و عمري كنت كنتوقع انني انمشي ليها بهاد الطريقة و انا مريضة و في اخر ايامي و انبيع  دار لي تزاديت و عشت و كبرت فيها و الاهم من هادشي كامل انني غادية و ماعلمت خويا بحتى حاجة .... الا مت في طريق فماعرفتش واش اتوصلو خباري و لا غادي يدفنوني ناس ماكنعرفهمش ،فاش كنوصل لهاد الفكرة كنحس بشوية الندم علاش زعمت على هاد الجولة و انا غادي نمشي لبلدان جديدة انتلاقى مع ناس جداد، في بلاصة ما نبقى هنا حتى الا مت نموت وسط الجيران على الاقل شي وحدين كيعرفوني و لكن كنوصل تاني لنفس نتيجة كلهم مابيناتناش صلة دم فاللهم بلاما نفكر بزاف و نحقق حلمي زعمت نكمل حتى الاخير و نشوف هاد الرحلة الاخيرة فين اتوصلني.