الجزء التاسع
#الرحلة_الاخيرة
#زوي
علياء:" كيفاش المرافقة تاعك، و نتا باغي تمشي لطاليان و انا باقة انمشي لمدريد و ندوز لفرنسا بعدا"
دار راسو كسمع و لكن هو كان كيضور في عينيه بحال غير كنخربق و بلي راه مصمم على هاد الهضرة لي قال و براه غير علمني ماشي كيتشاور معايا.
ابراهام:" و لكن في الاخير وجهة وحدة انمشي معاك لمدريد و فرنسا، و بالمقابل غادي تمشي لديك البلاصة في ايطاليا، اش بان ليك ؟"
غوت بدون شعور و نضت من بلاصتي
علياء:" واش تصطيني لا !!!؟"
النوضة لي نضت بجهد خلاتني نحس بدوخة و شوية ديال الصداع جاني، لدرجة شديت في راسي و رجعت گلست في بلاصتي.
الهدوء لي كان فيه و عرفتو فيه هاد اليومين تبدل دغيا لقلق
ابراهام:" ياك لاباس !؟ مالكي؟"
مابغيتوش يزيد يطرح عليا شي اسئلة و لا شي حاجة لي غادي توصلو لمرضي داكشي علاش حاولت ما امكن نجاوبو بهدوء و رزانة
علياء:" والو غير شداتني دوخة فاش نضت بجهد"
و لكن هيهات كاع داكشي لي قلت قبل ضربو ليا فزيرو و جاني نيشان او بالاحرى صدمني كيف العادة بردة فعلو
ابراهام:" اليا اشنو هو المرض لي عندك ؟"
اسئلتو و قوة الملاحظة لي فيه خلاتني نشك واش هو طبيب و شك فمرضي من الاعراض لي كيعرفوهم غير الأطباء، هاد الفكرة خلاتني بدون شعور نسولو و نقلب الموضوع
علياء:" ماقلتيش ليا فاش خدام نتا؟"
شفت علامات الدهشة على وجهو و لكن دغيا رجعو لملامحو العادية
ابراهام:" بلاما تبدلي الموضوع و جاوبيني على سؤال!؟"
بديت نلعب معاه
علياء:" اينا سؤال!؟"
ابراهام:" اليا، ماكنلعبش معاك، بلاما تبدلي و قولي ليا"
واش انا مكشوفة ليه لهاد الدرجة، كيفاش كيقدر يقرا افكاري، و لكن حاولت نتماطل في الهضرة.
علياء:" نتا لي بدلتي الموضوع ماشي انا، كيفاش غادي تمشي معايا؟ شكرا على مساعدتك و لكن مايمكنش ليك تطفل على رحلتي، و انا قادرة على راسي"
ربع يديه و بقى مركز معايا حتى كملت هضرتي و في اخر كلامي لمحت نظرة استهزاز منو، و فعلا ماعطلنيش بجوابو
ابراهام:" لا باينة قادرة على راسك و نتي كل شوية كدوخي و يضر راسك، لاحظت هادشي طول الخرجة و زيد عليها اول مرة تلاقينا لقيتك سخفانة"
رجع بهرني بنظرتو الثاقبة و دقة الملاحظة لي عندو، و انا لي كنت كنظن انني تمالك نفسي و ماردتش ليا البال ساعة معامن انا، زاد كمل هضرتو بتكرار نفس السؤال
ابراهام:" و دابا قولي ليا اشنو هو مرضك؟"
خاصني نركز قبل مانجاوب، خاصني كذبة متقونة، شي مرض كيخلي الدوخة و صداع، فكرت و ماطاح في بالي غير جواب واحد ماعرفت واش يقنعو و لا لا
علياء:" عندي صداع نصفي، و دواه عندي فماكاينش لاش تعاود تحكر على الموضوع"
ابتسم تاني ابتسامة عريييضة
ابراهام:" ماغاديش نعاود و لكن كنظن هذا سبب كافي باش نكون المرافق ديالك في الرحلة"
أنت تقرأ
الرحلة الاخيرة | مكتملة
Adventureقصة قصيرة تحكي على علياء لي ساكنة لوحدها و لقات راسها مريضة، قررات تخلي كلشي وراها و تحقق حلمها في سفر حول العالم ... اتلاقى مع ابراهام لي غادي يعاونها و يشجعك و يبدل فيها بزاف الحويج و حتى هي نفس الشيء
