الرحلة الاخيرة | مكتملة

6

الجزء السادس
#الرحلة_الاخيرة
#زوي

فاش قربت لطوموبيل فتح ليا الباب لوراني
ابراهام: "باش تكوني مرتاحة و تحسي براسك بحال في طاكسي"
تبسم و سد الباب و ركب في بلاصة السائق و نطالق بينا، انا غير تحركنا شوية و نطق.
ابراهام:" تبغي تمشي لسبيطار؟ واش نديك و لا متأكدة بلي راكي مزيانة دابا؟"
اهتمامو خلاني نرتابك للمرة الثانية و لكن جمعت راسي دغيا و تفكرت بلي السبيطار ماعندو مايدير ليا واخا نمشي و بالعكس في هاد الدول يقدر يشدوني بزز باش ندير العملية و انا ماقادرة على حتى عائق يوقف في وجه رحلتي، فاش وصل تفكيري لهاد النقطة جاوبت بحزم و رفض و انا كنحرك في راسي بالنفي
علياء:" لا، ما محتاجاش لسبيطار، انا لاباس ،و عندي الدوا في الحالات الحرجة فكن هاني"

بجوابي و برفضي قدرت نقعنوا او هادشي لي جاني، حيتاش طول الطريق و من بعد جوابي هو سكت و ماعاود نطق بحتى حرف و أنا كذلك بقيت حاضية غير شرجم حتى وقف قدام واحد الفندق انيق باين غير من الدخلة ديال الباب، رغم انه باين فيه غالي شوية و لكن لا يهم المهم هو نرتاح ليوم و ليل هذا اصلا مافيا لي يبقى يقلب ، انا عندي الزهر ملي لقيت سيد جابني ليه، و غذا ان شاء الله نمشي لبلاصة اخرى.

نزلت من الطوموبيل و بان ليا واحد السيد بزي تابع للفندق هضر معاه ابراهام و توجه نيشان لكوفر، تحركت انا و ابراهام لداخل د اوطيل صراحة واخا العيا ماخلانيش نبرگگ فيه مزيان الا انه باين لعمى زوييين و هاد ليلة اتكلفني بزاف، تقدمنا لاستقبال و تما تكلف ابراهام بالهضرة، كنت مبهورة بالاوطيل و زاد بهرني هو هضرتو، كان كيهضر بالإسبانية بطلاقة، هاد سيد مازال في جبعتو شلة مايتجبد، دنماركي كيهضر بالعربية و الاسبانية و رجل نبيل و عندو ضحكة كتنسيك في راسك.... بقيت حاضياه كيفاش كيهضر و كيفاش كيتبسم قطع الحوار معاها المرة لولة و ضار عندي قال ليا باش نعطيه باسبور، و قطع معاها الحوار للمرة الثانية فاش هضر مع داك السيد لي هاز ليا  الڤاليز، فاش كمل ضار عطاني لاكارط ديال البيت لي حجز ليا.
ابراهام:" الغرف دياولنا بزوج في نفس الطابق، يالاه نوصل معاك"

تحركتا بزوج لمصعد و انا نتفكر الفلوس ماعطيتوش الخلصة ديال طاكسي، جبدت البزطام و فين كانو الاورو لي كنت صرفت قبل مانجي جبدت و لكن ماعرفتش شحال انعطيه، شافني جابدا البزطام و كنشوف فيه يالاه انسولو و هو يسبقني
ابراهام: " اش كديري؟"
علياء:" ماعرفتش شحال الخلصة ديال باش جيت "
اخر حاجة كنت نتوقعها هي يضحك حتى يدمع، ماحبسش من الضحك حتى وقف المصعد و تحل، خرجنا  و مشينا حنى وقفها قدام بيتي
ابراهام:" نتي عيانة دابا، سيري تنعسي تصبحي على خير و غذا نهضرو"
علياء:" و لكن باقي ماخل...
قطع كلامي  و هضر بجدية
ابراهام:" راه قلت ليك هكاك غير باش نخليك ترتاحي، عرفتك ماغاديش تبغي تجي الا مادرت هاكاك و دابا سيري تنعسي"
شكرتو و دخلت و فعلا كنت عيانة ديال بصح، لدرجة كنت محتاجة لدوش و لكن ماقدرت غير دخلت بدلت حويجي  و نعست.

صباح جديد، في دولة جديدة، و ناس جداد، فقت و احساس جديد جاني، قررت من هاد الصباح غادي نسى المرض في هاد الرحلة و انستمتع بكل معنى، نضت من بلاصي و انا كلي حماس باش نبدا رحلتي الاخيرة، دوشت و حسيت براسي خفيفة صليت يالاه بديت نبدل حويجي سمعت الفيكس كيصوني، لقيتهم خدمة الغرفة كيسولو واش الفطور يوصلني لبيت و لا نزل لتحت، كملت حويجي و فاش حليت الباب باش نخرج صبحت على اجمل ابتماسة شفت في حياتي
ابراهام:" صباح الخير"