لعنة الحظ .....
زينب علي ....
نزلت امشي وعيوني مجبده بلدموع بجي بحركه لكيت مره كاعده يم بيبيتي . اول ما شافتني يااا حبيبتي ها شبيج .
ها خاله شلونج جنت اثرم بصل .
ههههه يا عمري مردتي عيونج العسليه .
سكتت مجاوبتها . كلت بكلبي عود مجامله وينها عسليه هيه سود كوه هلولاكه
والله يا ام ماجد جبت واحد لسماوي لكطه وكلت ماكو غيرها تستاهله ....
بيبيتي : منو هذا ام صلاح .
والله هذوله اصدقاء ابو محمد رجل اختي بلبصره كاعدين عدهم كاع ورجال صيدلاني وحلو وكامل ومكمل وامه عدها هلواحد وتريدله وحده حبابه وفقيره متريد تبعده عنها وكلت لابو صلاح ماكو غير سميه جوارينه تلوكله ...
بيبيتي : والله مواصفاته زينه بس كون يطلع ادمي وخوش رجال
ام صلاح : ياااا ام ماجد هيه المره وين تلكه صيدلاني ومؤدب وحباب .
بيبيتي : اي بس بعيدين يا يمه هنا هنا بلبصره ...
ام صلاح : مو بعيده الله وكيلج . هنا هنا لنج واصلتلها .
بيبيتي : والله ما ادري يا يمه خاف بعيده وتتورط وانتي شوفه عينج لانكدر نوصل الها ولا نعرف اخبارها . اني مره جبيره وامها مربوطه برجال تجيلها كل شهر ساعتين وتروح حته متكله اني رايحه لهلي من المسواك وتجي وخالها ومرته هذولياهم تدرين بلوضع ما يحتاج اسولفلج .
ام صلاح : ام ماجد اذا ضلت الناس كلها تفكر مثلج محد يزوج ويطي ادرين جاي يطن للخارج وبكل دول العالم وطياره تاخذ بس البنيه وهناك تعقد وتزوج ولاهل محد بتوصل وجاي يعيشن ويرتاحن .
بيبيتي : والله يحبيبه ما ادري شكلج هاي فقيره والدنيا تظلم واخاف تنظلم وياهم واني اخاف عليهن . شوفي حظ امها هم شبعت قهر وضيم
ام صلاح : حجيه فكرو وردو خبر والله الناس تمدح بيهم خوش ناس خوش اودام وبعد الي بي الخير الله يقدمه ....
.
.
.
سميره : عمه متطيها لو اله تضل بلفكر والضيم اطيها وفضيها خل تشوف حال سبيلها هم بنيه وتحلم مثل البنات ...
بيبيتي : ما ادري والله مكان بعيد شلون اوديها لهناك .
خالي ماجد : وين تلكه صيدلاني اشاف بيها اسمها كوه تكتبه ..
بيبيتي : مو اكلك يمه الناس ما تنعرف خاف ضميلنه ضميمه ..
سميره : يا ضميمه عجبها عجبها ما عجبها اطلك واعوفه واركعه ميت نعال شنو فد مندله .
بيبتي : شلون يمه هو الزواج لعبه واطلك واعوفه .
سميره : والله لو بيه خير من زمان جان اطلكت واخذت هلقرار بس اني جبانه .
