لعنة الحظ ....
زينب علي.....
صالح : مرت الايام وصار عندي ٤ ولد و٣ بنات .
وجدان تزوجت وطلع رجلها للكويت وما ندري عنهم شي .
وعباس هم تزوج والي سمعته عنده بنيه ووليد و الي سمعته ابنه جان عليل ( اعرج ) ما اعرف بعد عنهم شي لان الدنيا تغيرت وكلمن احتار بروحه وبزره وصارت الكعدات وي ولد العمام قليله واكيد ٧ سنوات خلاف لازم تضل بلكلب حزازيه شويه فاكيد ما متصافين كلش .
ومرت السنين اطارد سنه وره سنه ما حسينه بيها لحد ما طلع تعيين محمد ابني بلجيش .
وجنت ماخذ عهد على روحي اذا استلم محمد اول راتب اخذ حمله للكربلاء ويزور الامام الحسين . وصدك رحنه زرنه وهناك بلامام الحسين شفت ابن عمي عباس بحرم الامام الحسين سلام الله عليه .
لكيته يملج لناس ( يعقد لرجال على مره )
شلونك شيخنه ....
اهلااااااا وسهلا يا هله حي الله من جاي .
شلونك شيخنه شخبارك صحتك .
والله برحمه الله انت شلونك ....
خطيه ضل الشيخ عباس ( شيخ لابس عكال مو معمم. واحنه لان جبير نصيحله شيخ لو حجي بس هو لان يعقد للوادم نصيحله شيخ ) يتوسل بيه تواسيل يجي يتغده يمنه
صالح : والله يا شيخنه اني جاي مرجع لان ابني تعين وجبت اول راتب اله زياره انشاء الله بلمرات الجايه وويايه ناسنه ما ترهم نعوفهم وحدهم يرجعون بلسياره واحنه متكفلين بيها .
عباس : ها بيها الخير انشاء الله . بس عليك هذا الحسين اذا اجيت مره ثانيه وما مريت عليه .
صالح : انشاء الله اجي بحيل الله اذا الله راد اني اجيكم وعندي عمر .
.
مرت الايام والله قسم النه زياره للامام مره ثانيه .بس هلمره مستعجله بس جيف محلفني بلامام استحيت ارده وكلت لمحمد ابني الجبير بويه امشينه خل نروح لبيت شيخ عباس محلفني من ذاك اليوم الي استلمت راتبك بي واجينه ولكيته هناك ...
اي آمر بويه نمرله جا ليش ....
تمشي بلسياره واشوف بيت شيخ عباس على ذاكرتي بعده نفسه . دكينه الباب فتحت الباب بنيه عمرها ١٤ سنه . منووو ..
انه شيخ صالح ابن عم شيخ عباس ...
ابوي ما موجود بهلاثناء اجه شيخ عباس . تفضلو يا اهلا وسهلا زارتنه البركه .
فتحي الباب بويه هذا عمج تعاي جيبي كلاص ماي ...
طبو للبيت شيخ صالح ضل صافن عليها .
البنيه ام ١٤ سنه وبيدها كلاص ماي : تفضل حجي .
شيخ عباس : جان عدنه واجبه واني والحجيه ابن اخوها مضروب بلسياره ورحنه نشوفه خطيه امدد ..
