لعنة الحظ ....
زينب علي ...
جانت اجواء تركيا قمه بلروعه طلعنه ومشينه وجانت خطواتي تتحرك وفق الي هوه يريده والي هوه يأشر عليه بدون ابداء اي رأي مني او حته المناقشه والواضح بلموضوع انو هيه جانت سفرة عمل لا غير يعني بلاحرى مو اسبوع عسل ومع هذا اني جنت كلش فرحانه باول سفره اليه ...
فكرت انو لازم ابدي احجي ويا بموضوعنه يعني وضعنه لحد الان غريب . كمت بدلت ثوب جلد النمر اشتريته من تركيا الوحيد الي اخذته على ذوقي وصدك اشتهيته وقبل بي امير جان مغري الى ابعد ما يكون اباوع لروحي بلمرايه عبالك لعابه فرحت بروحي من لبسته وانتظرت امير لحد ما اجه اول ما طب شافني ضحك .
شلابس الحلو اليوم ؟...
ضحكت ونزلت راسي . شلونك ...
والله تعبااااان اليوم كله كضيته شغل ....
زين واني شنو ذنبي محبوسه هنا وحدي ....
سمسم لتبدين تشكين حبابه مو من هسه تره بعد مشوارج طوووويل وياي طريقي صعب وبي مطبات هواي ...
امير اني افديك بروحي كل شي مستعده اتحمله وعلى حسابك ...
شبكني بحظنه وباسني شويه صفن كلي كومي يلا خل انام باجر ورانه سفر ...
وين ...
للعراق بابا ....
بعدنه ما شفنه شي ...
باجر طائرتنه بلسته كون احنه ب ٤ بلمطار يلا خصميها خل انام ...
سحب روحه ونام وغط بنوم عمممميق واني مثل المسطوله كاعده هاي شبي رحت ويا بلجربايه ونمت بصفه ما حسيت اله على صوت المنبه كمت شنو ابيش الساعه ياااا صارت بلاربعه ولا حسيت كانهو دقيقه . كمت صليت وكعدت امير ...
يلا عيني كوم صارت بلاربعه ...
اي كايم .
طلعنه للمطار بيوم ثقيل ما تمنيت يخلص هلاسبوع بلعجل هيج ...
وصلنه للبصره بعد طريق طويل . وجان بلاستقبال والده امير .
شلونك ماما ...
امير / الحمد لله بخير ...
شلونج عيني
سميه / بخير خاله الله يسلمج ..
امير / اكلج يوم خل يحظرون عشه اليوم فهد ومحمد يجون للبيت .
اي يوم انشاء الله ...
بنفس اليوم انطيت عمتي ثوب اشتريته الها بمكان ثوبها الي اخذته منها . فرحت بي وتشكرتني كلش حته استحيت منها ..
خاله صدك جذب قابل شجايبه اني ...
انتي الوحيده الي كدرتي تاثرين على امير ويجيب ويا شي ...
شنو ...
امير ميجيب ويا شي من بره ابد ...
يعني شنو اني الوحيده ؟
