أعتذر عن التاخير اليوم اعوضكم بارتين ان شاء الله ..
لعنة الحظ ....
زينب علي ....
كلت لامي
يمه : اني لكيت قطعه بلمزارع بعيده منا تجين وياي لو تضلين هنا ( هو اني اساسا ما لكيت بس ردت اشرد ) ..
المن ضاله هنا يمه ...
خاف يعجبج تضلين هنا قريب على بناتج ....
اجي وياك يمه شعندي ضاله وحدي ....
....
صدك والله بعده ما طر الفجر طلعنه اني و امي وحوراء و وسام
خواتي واخوتي ما قبلو وين رايح وعايفنه يعني شنو نفقد ثنين اخوه بفتره وحده ...
عوفوني اريد ارتب وضعي بلكي ولعل الملم كلبي وفكري الي انكسرو ...
عفتهن وطلعت . وجانت طلعتي اشبه ما يكون بلمهزوم من الحرب ومودع ورايه خواتي واخوتي وكلام الناس الي ميرحم وتارك شغلي و وضيفتي بدون حته ما انطي مبرر او انذار مسبق او اجازه . تركت كلشي وطلعت .
.
ما اكدر اسوق رجليه مجاي يعينني ابدااا مجاي اكدر اشوف الطريق ضليت كل فتره اخذ استراحه وانزل .
تعب ارهاق الم ضعف خذلان من كل شي .
توجهت بوجهي لصديقي بتنه ابيته وكتله راح انقل روحي هنا اريدك تشوفلي بيت كال . اجيت بوكتك اكو صيدلاني يريد يفتح صيدليه وعارض مزرعه للبيع لكطه تعال شوفها .
رحت شفتها تستاهل كلش حلوه .
وصلت للبيت الجديد الي جان بنص مزرعه جبيره ومحوطه بسياج شائك طبيت الها دعيت من الله يغير حياتي ويعوضني بلافضل ...
...
وبدت عائلتي تتأقلم وي الوضع امي ارتاحت لان البيت ميحوطه جوارين ولا يحوطه هوسه وزحمه لا منطقه كلها خضار وهوه عليل تطلع تشتم هوه تحس الروح ردت بيك ...
حوراء وضعها تغير صارت كئيبه وليل ونهار تصلي وتركت المدرسه بس البجي قل . واني وافقت من كالتلي راح اترك المدرسه . لان ادري بيها مراح تكدر تقاوم بوضعها الحالي ففكرت بيني ما بين نفسي انو لازم تترك هاي السنه حته ترجع بقوه وبواهس واني ادري بيها ذكيه وشاطره .
اما وسام فهو طفل صغير ستوه طب بلسادسه كلشي مفتهم بس جاي يطلب امه باستمراااااار وهذا الوحيد الي مضايقني طفل ما اكدر امنعه من ذكرها . وفرتله كل شي من الصغيره للجبيره سويتله مدينه العاب خاصه بي ما خليت لا زحليكه ولا مرجيحه ولا مسبح كلشي سويتله بس خاطر ينساها . بس هو من يجي الليل يريد امه . امه الي ما فكرت عواقب الي سوته شنو ما فكرت بجهالها ما فكرت انو حبل الخيانه اقصر من حبل الكذب اول وتالي توكع بيها . بس شسوي طفل والطفل يريد امه .....
اما بلنسبه اليه فاني اطلع ما اضل بلبيت اجي بنص الليل جاي وياي البطل واشرب وما جانت الجكاره تنحط بحلكي يوميه اشرب يلا ارتاح . افقد انسه ... بس استحي اشرب كدام احد اجيبه للبيت واقفل على غرفتي الباب واكعد لحد ما اكعد ثاني يوم روحي تلعب وراسي المه فضيع عبالك دود وحاي ينخر بي .
....
مرت الايااام والاسابيع والاشهر واني على هاي الحاله . امي تبجي وماكو ولك يمه استغفر ربك ....
