_حطام قلبين _
( بقلم بسمة البباتي)
_البارت الآول _
نايمة بفراشي وصافنة على ريشات المروحة درت راسي وباوعت على الساعة اووووف ياربي هسه يلا صارت ساعة ثنتين ونص بقيت ادردم بيني وبين نفسي شوكت الله يخلصني من هاي النومة الاجبارية
اكثر وقت اكرها هو وقت الظهر لازم بالغصب انام
واذا تحركت من مكاني لو كعدت ياويلي وسواد ليلي
ماما وقت الظهر تفرشلي اني وجان يمها واقل حركة مني او منه انحصل كفخة
باوعت المكان جان هو هم ديحوص منايم
فتح عينه باوع عليه
رفع راسة شاف ماما بسابع نومه
كام من فراشه على كيف واجة شاوني باذني
جان.. تجين نصعد للبيتونة نلعب دعابل
اينار... اني بس سمعته هيجي كال بسرعة كمت من فراشي وهمست اي يلا امشي
طلعنة نمشي على كيف جنا نمشي ونتلفت اخاف احد يشوفنا
جان.... اوكفي الدعابل بالغرفة واذا اروح اجيبهم اخاف جنيد يشوفني ويفتن الماما
اينار... اني دعابلي هم بالغرفة واخاف ميرال تشوفني
جان... روحي جيبيهم بس لاطلعين صوت واني هم رايح اجيبهم
أينار... كل واحد بينا دخل الغرفتة مثل الحرامية جبناهم وصعدنا نلعب فوك
بالبداية جنا نلعب بدون صوت ويا محلانه
بس من سابع المستحيلات ننجمع اني وجان بمكان واحد بدون منتعارك
اينار... انت واحد غشاش رجع دعابلي
جان... انجبي اني ربحت انتي متعرفين تلعبين
أينار... كلمة مني وكلمة منه وصرنا نتكافش وصار المرافس بالكاع
ثواني وسمعنا صرخت ماما باوعنا عليها
بالكوة مفتحة من النعاس والوجه احمر وبيدها الجفجير
اني وجان يبسنة بمكانه
ماما... الخاطررررررر الله كولولي شسوووووي وياكم والله تعبتوني يوم اسود يوم الخلفتكم راح امووووت بسببكم
اينار... اني وجان كل واحد حصلة جفجير معدل ونزلتنا سحل ليجوا
رجعتنا لفراشنا ومن الكتلة والبجي نمنا
كعدت من النوم فتحت عيني باوعت صايرة دنيا عصر وصوت اهلي كاعدين
كمزت من فراشي طلعت شفتهم كاعدين بالمطبخ ديشربون شاي ويا الكعك
أينار... اخذت كعكة ورحت الدده (بابا)
يلا دده انطيني مصروفي اروح اشتري
دده...سحبني باسني وكرص خدودي قربان هاي الخدود طلع فلوس انطاني
