_انا قلبي لك وحدك _
( بقلم بسمة البياتي)
_البارت الخامس عشر _
لو ابقة منا الباجر اوصفلكم شعوري بهذيج اللحظة مراح اكدر اوصللكم نقطة بحر البداخلي معقولة بعد كل هاي السنوات راح اعرف شي عن اشور
جنت اخاف يطلع هذا حلم وبعدين اصحى منه ما اكدر اصدك اكو هيجي صدفة
اينار... دموعي تنزل مثل المطر وجسمي يرجف مثل السعفة مشاعري مخربطة خوف فرح صدمة ارتباك توتر كل هاي المشاعر مجموعة بيه
حاولت هيلين تهديني
هيلين.. اهدئي حبيبتي حتى اكدر احجي وياج
اينار... بصوت يرجف مجاي اكدر اصدك انتي تعرفين اشور
هيلين... بلي صدكي وحتى انتي اعرفج بس مشايفتج
اينار... باوعت عليها بتعجب منين تعرفيني؟
هيلين... ههههههه هو ليش منو ميعرف روميو وجوليت ماكو احد باقاربنا مايعرف قصتكم من الصغير للكبير
اينار... سئلتها بتردد وخوف اشور ازوج كملت كلامي وغصيت بالبجي
هيلين... ببتسامة لا ممزوج وميقبل يزوج
أينار... ما اعرف افرح لو انقهر اشور بعده ممزوج واني صرت الغيره الله لاينطيني
هيلين... انتي مزوجة؟
اينار... معرفت شجاوبها هزيت راسي بالنفي استحيت اكولها مخطوبة اني حتى الحلقة ما اللبسها
هيلين... بتعجب بس اشور عباله انتي مزوجة لان من جان بالعراق كايليلة انتي ازوجتي
اينار... اي اعرف هيجي كايليلة حتى لايدور عليه وينساني
هيلين.. والرب انصدمت ما اعرف شكول
اني من ازوجت رامي جنت من اشوف اشور اشوفة دائماً حزين
سالت رامي شبي اشور
حجالي قصتكم بيومها متت قهر عليه ومن كالي البنية اليحبها تركتة وازوجت كرهتج رغم اعرف زواجكم مستحيل
اينار...فدوة احجيلي كولشي عن اشور اريد اعرف اخباره كولها
هيلين... من عارف انتي مزوجة ومسافرة ادهورت صحتة وبقة بالفراش اكل ميوكف بمعدتة نهائي
العم جورج خايف على ابنة بايع كل املاكة ومسافرين للسويد
ومن وصلوا اهناك عرضوا على الاطباء
والشكر للرب تحسنت صحتة
اهله حاولوا يزوجوا كلارا لكن اشور رفض
كايل اني الربيتها على ايدي خانتني
وهسه تريدون ازوج
بعد مستحيل اثق بجنس حواء
اشور جان يقضي اكثر وقتة بالشغل حتى ينساج
بعد سفرهم بسنتين العم جورج صار عندة ورم خبيث براسة وبمرحلة متقدمة جداً وللاسف مطول اشهر ومات
