_انا قلبي لك وحدك _
( بقلم بسمة البياتي)
_البارت العاشر _
فتحت عيني جان اكو غواش كدامي و ماكدر اشوف شي
اول سؤال اجه على بالي اني متت لو بعدني عايشة حاولت اركز بقيت افتح عيني واسدها اخير توضحت عندي الرؤيه عرفت هاي مستشفى واني بعدني عايشة
تحركت صار عندي الم بمعدتي
جانوا ومشكليلي اوكسجين
الهوا اليدخل صدري احسه مثل السيوف التقطعني صرت اون من الالم
ثواني واجه الطبيب صار يفحصني ويحجي وياي اني مكدرت اجاوبة من الوجع
الدكتور... اكيد راح تتوجعين لان سوينة الج غسيل معدة
ليش بنتي مو حرام تتصرفين بهذا الشكل بعدج صغير وحلوة والحياة كدامج طويلة ليش تريدين تنهيها بهاي الطريقة
اينار... معندي كلام اكولة وسيلتي الوحيده للتعبير عن حزني وتعاستي هي دموعي
الدكتور... لاتبجين بنتي هسه ارتاحي وبعدين لازم نحجي
اينار... الدكتور جان هوايه متعاطف وياي
رجعت غمضت عيني دقائق ورجعت نمت
من كعدت لكيت نفسي بغرفة ثانية وبابا وماما يمي
بعدين عرفت اني جنت بالعناية المركزة وهسه نقلوني الغرفة عادية
ماما لازمة ايدي وتبوس بيها وتبجي
ماما.. ليش اينار تريدين تفجعيني بيج وتحركين قلبي عليج
بابا كاعد بعيد ساكت والدمعة بعينه
اينار... درت راسي منهم ما آريد اشوفهم
دخل الدكتور ويا دكتور ثاني
الدكتور... اهلج كالوا اسمج اينار
هسه كوليلنه اينار ليش ردتي تنتحرين اهلج يريدون نسد الموضوع بدون تحقيق ومشاكل
بس احنا منكدر انسدها قبل لا نسمع جوابج
الدكتور الثاني... احنا لكينة اثار ضرب على جسمج الظاهر انتي متعرضة للضرب وللتعنيف لازم تحجين وتكولين منو سوى بيج هيجي وياخذ جزائه
اينار... باوعت على بابا وماما جانوا يباوعون عليه بخوف يمكن خايفين من جوابي
حجيت بصوت مبحوح بالكوة كدرت انطق الكلام
دكتور اريد دكتورة نسائية
الدكتور طلب من الطبيب الثاني يروح يصيح دكتورة
اهلي صافنين عليه
اجت الدكتورة
اينار.. طلبت منهم يطلعون بس اني وياها وماما نبقة
طلعوا اجت الدكتورة يمي الظاهر مفهميها على وضعي لان طلبت مني احجيلها شنو سبب الانتحار والضرب الي على جسمي
