كرونيك "حبيبي جدارمي "💕 نوفل ونورسين 💕 ؟؟

34

💖حبيبي عسكري💖
الحلقة 34
هبط في الدروج ...سمعها تعيط.. عليه...الموقف هذا ماينساهش...رفضتو...رمات اعترافو بعشقها للحيط.....ركب طونوبيلو..طول ديمارا.. الوجهة ماشي في بالو....
دخلتها شبيلة لبيتها ..بسيف فطنتها ....خلاوها وحدها قاعدة في السرير...نحات الروبة..والمكياج ...تكات..على السرير...( معقولة..ندمت الي مارحتش معاه...راني رفضتو..وهو كان حابني...) مسحت دمعتها..(لايانورسين .ماتنسايش عمايلو معاك...مرة بارد..ومرة يبان شاعل حب..انا نوريك يانوفل..ندمك على حياتك)..هزت تلفونها تعيط لخاليدة..
نورسين: أاو خاليدة..واش راك..
خاليدة: مليحة..نورسين..والله كنت راح نعيطلك بعد..
نورسين: خاليدة..نطلب منك خدمة..الا تقدري..
خاليدة: تفضلي...اطلبي اكيد نخدمك بعيوني..
نورسين: نقدر نبات معاكم..في لاسيتي..
خاليدة: ان شاء الله نورسين راني شفت قضيتك..وراهي فارية ..
نورسين: خاليدة محتاجة نجي اليوم..ماعنديش وين نروح..
خاليدة:قصدك تجي دوركا..؟
نورسين: الا تقدري تستقبليني.
خاليدة:ايه ماعليش..اعطيني لادريس نجي نهزك..
نورسين: أستنايني..عند باب لاسيتي ميليتار ألي جاي...في.....
خاليدة: وجدي روحك راني جاية...
كملت الهدرة.. وناضت تلم في حوايجها..
حياة: هذي نورسين؟
خاليدة: ايه..هي تلعب بشعرها وتهدر.
حياة: وين راح تجيبيها هنا؟
خاليدة: ايه.وين نديها
حياة: وكيفاش تدخليها..
خاليدة: ههههه زوج بوسات لمحمود وهي فرات..
حياة: اع ع ع هذاك المسطاش..
خاليدة: سكتينا حياة....لنجبدو دوسيات سكرناهم..
راني رايحة..فرشي في الارض وعطيها سريرك..
حياة شافت فيها شنفت..
خاليدة: نفذي حياة بلاتشناف..البوص...هذي نورسين تهمو...
...
طلت للكولوار...لقاتهم مجموعين فااصالون..علابالها يهدرو علي صرا مع نوفل...تمشي على روس صوابعها حلت الباب...وخرجت..زربت هبطت فالدروج... لحقت الباب برا..دورت شافت دارها..ذكرياتها حلوها ومرها..مسحت دمعتها وراحت....
جاتها خاليدة..وواحد يسوق ركبت وديماراو....
حبس طونوبيلو ونزل...هايم ماعلابالوش وين راه....العشق كان بالنسبة ليه...مع سيليا حكاية..ومع نورسين حكاية اخرى..تحدا باباه نهار ماخلاهش يتزوج بسيليا لانو حبها....واليوم يبكي على نورسين....طفلة صغيرة..في نظرو هو...مدلله...مازالت انوتثها ماكملتش..يعشقها..بكل جوارحو..بكل رجولتو..بهيبتو..خلات دموعو تنزل...شاف مع الشوميزي..تاعو ملطخة بدمو..يدو مازالت تقطر دم....واش من عشق هذا يانوفل..حياتو معاها ماتجاوزتش شهر..حسها كانها اعوام...معقولة يتعلق بها..لهذ الدرجة....في قمة سرحانو..صونا تلفونو...مرة وزوج وثلاثة...ماحبش يجاوب.. الرابعة جا يطفيه....شاف كريم يعيط...تردد يجاوب ولا لا..ممكن صرالها حاجة..وممكن يحوس عليه...حل ويتكلم..
نوفل: وي كريم....
كريم: نوفل وين راك ارجع بزربة
.
نوفل: ماتحوسش عليا كريم ..حتى انا ماعلاباليش وين راني..
كريم: نورسين يانوفل..ماراهيش فالدار ..وحوايجها تاني ماكاش..
طول كوبا عليه كلمة مازدهاش..(اكيد رجعت للدار..علابالي ماتخلينيش نورسين..ندمت الي مدورتش ليك وانت تعيطي.)...ركب سيارتو..وديمارا...