🔥 مِن الحُب ماقتل 🔥

8

الحلقة ~ 8 💜

وناضت نهى خدت كتاب تقرا فيه لين يجي وقت المحاضرة ..

واتصلت بيها لجين ..

نهى.. اه حبي...
لجين <بصوت بكى >... اهلين
نهى.. تبكي ؟؟ خييرك شن في !!
لجين .. معاش بنكمل قرايتي
نهى.. علااااش ؟؟ خيرك ششن في ؟؟؟
لجين .. بوي سكر راسه عليا وقالي ماعندك ماديري بيها الشهادة وقعمزي فالحوش
نهى .. يا الله !! شن صارله بوك؟؟
لجين .. هوا من الاول مش مقتنع ب بنت تقرا ولا تخدم كان مش من امي ره بطلت بعد التانوي اصلا
نهى .. وشن الحل توا !
لجين.. قالي قعمزي فالحوش لين يجي نصيبك .. وهوا حر فيك يقولك تكملي ولا تقعمزي فالحوش لاكن جو طلوع وخشوش سبلة القراية معاش فيه
نهى.. يااربي وخلااص .. باه هدي روحك توا نلقو حل ..
لجين .. <مع رشفة خشم > ..اوك ..هي بري محاضرتك باش منعطلش عليك
نهى.. اوكي حبيبتي .. ردي بالك من روحك
لجين .. ان شاء الله .. سلام
سلام

<< قعدت نهى وحطت ايدها ع راسها وقعدت طول الوقت وهيا تفكر ف لجين وشن بيصير معاها و واجعها حالها .. وتفكر ف كل المشاكل الي تصير معاها.. وجعها لما خانها الانسان الوحيد الي حباته ..ووجعها لما بتسيب قرايتها وطموحها وتعبها الي بيمشي كله فالهواء ..
صعبة لما تشوفي حد قريب منك ف مشكلة ويتوجع وانتي مش قادرة تتصرفي وتحسي بشعور العجز .... ونزلو دموعها وقالت ف نفسها
وفوق هدا كله بوها يبيها تنخطب .. كيف وهيا قلبها مسكراته بالضبة والمفتاح ياهمي ....!

خداها الوقت لين شبحت للساعة ولقت وقت المحاضرة قريب ف ناضت بترد الكتاب وبتنزل ..

كيف حطت الكتاب عالرف .. حد دفه من الجيهة التانية وطيحه 😀 ..

وجت بتقيمه وترده ولقت محمد هوا الي دفه قعد يشبحلها ويضحك 😂

وهيا كانت تبكي ومعندهاش خلوق تهزبه ..حطاته مرة تانية من غير ولا حرف وهوا زاد طيحه مرة تانية😅

محمد.. عيب عليك ياطالبة تفسدي ممتلكات الجامعة ولا 😁

نهى قعدت تشبحله وعيونها حمر من البكي ومن غير ولا كلمة .. سيباته ونزلت

محمد.. هادي خيرها هيا :/ .. شكلي زودتها رسمي! .. وااك.. اما اني فاضي حق ..تي تزعل ولا ان شاء الله تولع شن خصني اني ! ..الشيت وقت عالمحاضرة ..

ونزل يجري باش يلحق يعطي المحاضرة وخش للقاعة ...

محمد.. السلام عليكم .. اسف عالتأخير ..
اني المعيد محمد عبد السلام .. وباذن الله هانعطيكم محاضرة اليوم لان الدكتور صارله ظرف مفاجئ ومش هايقدر يعطيكم ..
بسم الله .. نبدو المحاضرة ..

>>وكيف بدي يفتح لاب توبه وقام راسه باش يقولهم ينقصو صوت ..

شبح نهى مقعمزة شادة تليفونها ومشافتاش مزال ...