🔥 مِن الحُب ماقتل 🔥

41

     الحلقة ~ 41 💜

"طبعا زي ماريتو الصدمة الي مرت بيها نهى غيرتها 360 درجة.. وغيرت طريقة تفكيرها.. وغيرت تصرفاتها وكلامها .. ونحت البراءة الي كانت فيها .....ونهى الي كانت ابسط كلمة تجرحها وتخليها تبكي.. بدت معاش ترف من عينها دمعة وتميل للسكوت ف اغلب الوقت والاهم من هدا كله.. ان  مفيش ف قلبها غاية غير الانتقام ........

تعالو نشوفو شن هايصير مع بعض...

وليد.. صباح الخير
نهى.. صباح النور
وليد.. رقدتي باهي ؟
نهى.. اي
وليد.. ب شن تحسي ؟ نجيبلك حاجة ؟!
نهى.. لالا انا كويسة .. ترفعني للكلية ؟
وليد.. تي اما نرفعك هادي مهبولة انتي ؟؟ طلعتي من المستشفى ليك يومين وتبي تمشي الكلية اليوم
نهى .. وليد انا كويسة صدقني.. لازم نمشي نشوف الي فاتني امتحاناتي النصفية قريب
وليد.. حاضر .. من عيوني ، بس ديري بالك ع روحك
نهى.. ههههه انقنك بديت حنين 🙃
وليد.. لين اتم فترة النقاهة بس 😛هي البسي خير ما نغير رأيي  😂
نهى.. ههههه باه اطلع هي

وطلع وليد ولبست نهى حوايجها ونزلت ومشي حطها وليد فلكلية

وليد.. امتى بتروحي..
نهى.. ال1
وليد.. اوك.. لو حسيتي بروحك مش تمام كلميني.. اني هني عند ولد صاحبي
نهى.. حاضر.. سلام
وليد.. سلام

ونزلت نهى من السيارة ومشت جيهة المدرج وشبحت محمد ونادين واقفين مع بعض.. بس دارت روحها مشافتهمش وكملت طريقها ....

نادر.. 😳😳يامجنننونة انتي😱.. شن جيييبك للكلية
نهى.. عييت م الحوش 🌚
نادر.. شكلك انتي الي بتجيبيلنا جلطة 😐
نهى.. هههههه

وشبح نادر محمد ونادين واقفين مع بعض وهاتك ياضحك ونهى مش معاهم و كانت تساوي ف روجها و وشاحها فلمراية😂

ولاحظ انها مش مدايرة اي ري اكشن والشي هدا غريب طبعا بالنسبة للي مرت بيه🙃

نادر.. نهى ، انتي كويسة ؟
سكرت نهى المراية.. اها .. خيرني .. كويسة الحمدلله
نادر.. مش مضايقة ؟ مش معصبة ؟!
نهى.. ههههههه قاعدة صغيرة اني عالتعصيب منبيش نضيع شبابي على حاجة متستاهلش
نادر.. ايااه 🌚🌚 متأكدة ؟؟
نهى.. تي مليحة انا ياراس😂 وين لوجي ؟
نادر وهوا مصدوم.. اه .. عندها محاضرة تطلع بعد ساعة وشويا
نهى.. الساعة كم هيا توا ؟
نادر.. اااه .. السااعة 9 ونص
نهى.. اتس اوكيشن.. 🙃 لازم نمشي تأخرت . . C ya😆  ......
نادر.. 😳😳

ومشت نهى ونادر يحك ف راسه ومصدوم من رد فعلها متوقعهاش تكون هادية هكي وجوها مليح ورايقة

نادر.. نهار حرف البنت بتخش ف حالة نفسية ولا كيف 😳

ومشت نهى باش تلحق ع معادها مع عمر لان كان عندها فضول قاتل تعرف في شني يبيها ومقالتش ل اي حد ولا حتى ل لجين ......

و وصلت لكافتيريا البشري ولجين كانت فالمحاضرة وكانت الساعة 10 إلا ... وقعدت تستنى ....