الحلقة ~ 40 💜
عمر.. والله ماريت اوقح منك يانادين .... بس هانت خلاص ... وهانعرف كيف اندمك علي كل الي تديري فيه.. عيشي هاليومين الي فاضلينلك لانك معاش هاتشوفي ضي الشمس مرة تانية بكل ........
وكانت الممرضة راكبة وجايبة معاها الدواء الي قالها عليه ..
عمر.. اعطيها الدواء هادا باش يتعدل ضغطها وديري بالك عليها.. كل ساعتين قيسيلها ضغطها وحرارتها وديريلها تشك ع شكارة التغذية ...
ونزل ركب سيارته وروح
《 عند نهى 》
كانت راقدة ولجين قعمزت عالسرير الي بجنبها لانها كانت تعبانة بكل وتبي ترقد...
ورن عليها نادر ...
لجين.. الو
نادر.. علاش مقلتيليش انها كانت بجنبك ؟ مكنتش نبيها تعرف هكي اني
لجين.. والله غصبا عني يانادر هيا كانت بجنبي وقالتلي نقولك هكي لانها متبيكش تعرف انها عندي وتعرف لانها تعبانة بس .. ومقدرتش انوض وسمعت كل حاجة... اما ناادين هادي محقررها كان انشدها نحصل عليها لما نجيب رقبتها ف ايييدي هال....
نادر.. هدي روحك وامسكي نفسك علي خاطر نهى.. محتاجاتك هيا الفترة هيا هادي
لجين.. وختامها مسك الصرااحة .. تعرف من شفت اليوم هني
نادر.. مني
لجين.. عمر.. طلع دكتور هني واني منندريش .. وهوا الي جي عاين علي نهى
نادر..هالللكلب هوا... اسستغفر الله ييارررب
لجين.. بس اني نبي نفهم حاجة .. توا مش كان عمر مع نادين ؟ شن الي خلى نادين مع محمد !؟
نادر..........
لجين.. ههه هادا الي قعدت تقولي عليه صاحبي و نعرفه كويس ويحب نهى.. شوف لوين وصلت حالتها بسببه
نادر.. والله مانعرف شن صارله.. اخر حاجة توقعتها انه يدير حاجة زي هكي ....
لجين.. بس انا توقعت
وقعدو ساكتين شويا
نادر.. هي امشي اقعدي مع نهى توا ..وبعدين نكلمك
لجين.. ماشي ، سلام
نادر.. سلام
وسكرت لجين ومرو 4 ساعات ونهى بدت تفيق شويا مرة تانية .... وكانت الساعة 7 العشية
لجين.. نهوش حبيبتي .. نضتي واخيرا.. امك من مبكري ترنلي خلي نكلمها نقوللها نضتي
واتصلت بامها بلغتها انها فاقت وقاللتلها جاية فالطريق..
وقعمزتها لجين وحطتلها مخدة ورا ضهرها باش تسند عليها
وقعمزت بجنبها... وكانت نهى مقعمزة ساكتة وسرحانة ومنطقتش ب ولا حرف ..
لجين.. نهى ؟؟ حبيبتي .. تكلمي قولي اي شي.. صيحي اضربي ديري الي تبيه بس متقعديش ساكتة والنبي.. وراسك الا لما نخلي نادين تندم ع الي داراته ... وربي مش هايسيب حقك.. بس انتي قولي يارب
ونهى لاحياة لمن تنادي ...
لجين.. باه نغيرو السيرة توا .. قوليلي ب شن تحسي
أنت تقرأ
🔥 مِن الحُب ماقتل 🔥
Romanceالثقة صعب تعطيها لأي حد 💛 .. والي تشوفه بعينك مش ديما الحقيقة 💛 .. مهما كان اي حد قريب منك إحترس ، لان الطعنة هاتجيك من أقرب الناس ليك 🔥 .. تأليف .. ميرا ياسر💛
