Dark Angel

Part 11

လေငြိမ်နေသဖြင့် မီးတုတ်များမှ မီးတောက်မီးလျှံများသည် တည့်မတ်စွာ တောက်လောင်နေသည်။ ‌‌ခြောက်ခြားနေသော လူအုပ်စုမှာ တစ်‌ယောက်နှင့်တစ်ယောက် ကျောချင်းကပ်ရင်း မျက်လုံးများပြူးကျယ်နေသည်။ အားလုံး၏အကြည့်သည် အသံကြီးထွက်ပေါ်လာရာ တစ်နေရာထဲတွင်ဖြစ်သည်။

အသက်ရှူသံကြီးသည် ကျယ်သည်ထက် ကျယ်လာသည်။ သစ်ရွက်ခြောက်များကို နင်းလျှောက်လာသည့် ခြေသံကြီးလိုမျိုး ကြားနေရသည်။ ခြေတစ်ဖက်ကို တရွတ်ဆွဲနေသည့် အသံမျိုးဖြစ်သည်။ သစ်ကိုင်းသစ်ခက်များ ကျိုးသံပဲ့သံနှင့်အတူ မာန်ဖီသံလိုမျိုးကိုလည်း ကြားလိုက်ရသည်။ လေငြိမ်နေသော တောအုပ်ထဲမှ သစ်ပင်တစ်ချို့ သည် တစ်စုံတစ်ရာက တွန်းဖယ်သွားသလို တယိမ်းယိမ်းလှုပ်ခါသွားသည်။

အားလက်စ် မျက်တောင်မခတ်ရဲ။ ဖလော်ရာလေးကို တင်းကြပ်စွာ ပွေ့ထားသည်။ အသံထွက်ကာ အော်လိုက်မည်ကို စိုးရိမ်ပြီး ပါးစပ်ကိုလက်နှင့်အုပ်ကာ ပိတ်ထားသည်။ သို့ပေမယ့် တစ်ကိုယ်လုံး တဆတ်ဆတ်တုန်နေသော ဖလော်ရာသည် အကြောက်လွန်ကာ အသံထွက်ဖို့ပင် သတိရဟန်မတူ။

ခြေသံကြီးနှင့်အတူ ညှီစို့ပုပ်ဟောင်နေသော အနံ့ကြီးသည် စူးသည်ထက် စူးလာသည်။ တောယင်မည်းရိုင်းကြီးများကို ဦးစွာြမင်လိုက်ရသည်။

ထို့နောက်မှာတော့..

.

.

ဖလော်ရာသည် မူးမေ့သွားဟန် အားလက်စ်ရင်ခွင်ထဲ ခွေကျသွားသည်။ အားလက်စ်ကိုယ်တိုင်လည်း တုတ်တုတ်မလှုပ်ရဲ။ သစ်ပင်များကြားမှ ထွက်ပေါ်လာသော သတ္တ၀ါကြီးကို ခြောက်ခြားစွာ မြင်နေရသည်။ အ၀တ်စုတ်ကြီးနှင့်တူသော ရိရွဲနေသည့် တောင်ပံနှစ်ဖက်သည် ၎င်း၏နောက်တွင် တရွတ်တိုက်ဆွဲပါလာသည်။

အရိအရွဲ၊ အဖုအထစ်များနှင့်ပြည့်နေသော မည်းနက်နေသည့် ကိုယ်ခန္ဓာကြီးသည် မီးရောင်အောက်မှာ ကျက်သရေမဲ့နေသည်။ ရွဲ့စောင်းနေသော ပါးစပ်ထောင့်တွင် သွေးများစွန်းပေကာ တစက်စက်စီးကျနေသည်။ သွားချွန်များကြားတွင် ၀ါးလက်စအရိုးများကို တစွန်းတစမြင်နေရသည်။ မျက်လုံးနီနီများသည် ရိုင်းစိုင်းပြူးကျယ်နေသည်။ ခေါင်းတစ်လုံးတည်းမဟုတ်။ ပုံပျက်ပန်းပျက်နှင့် အခြားခေါင်းနှစ်လုံး တစ်ဖက်တစ်ချက်တွင်ရှိနေသည့် ခေါင်းသုံးလုံးနှင့် နတ်ဆိုးတစ်ကောင်ဖြစ်သည်။