يوميات موظفين

الحلقة السابعة

#يوميات_موظفين~
الحلقة السابعة📍

رنيت علي نور

نور >> ايوا
انا >> اسمعيني عشان نبي ننفجر
نور>> شن فيه كنك؟
انا>> ادم جاني اليوم للمعمل
نور>> كنا متوقعين يجي بس مش بسرعة هذي!
انا>> نور انا خايفه والله ، الدنيا تلخبطت عندي معش فاهمه شي
نور>> شن صار احكيلي بس وحده وحده

حكيت النور علي جيت ادم و عركته مع جهاد واللي صار كله

نور>> عمك جهاد مش ساهل
انا >> بحتي انتي وين وانا وين !؟ 🙄 نندب انا ولا شن ندير؟
نور>> اس بلا اوڤر و ادم ما ترنيش عليه ومش ح يطلع في يده يدير شي لانه ادم خواف طول عمره خواف
انا>> خلاص صكري عالموضوع معش بنفكر
نور>> مش مستاهل تفكري فيه
انا>> انتي عارفه ادم كيف وقح ! انا مش عارفه دماغي كان وين بس
نور>> ياما قتلك لا شكل لا محضر
انا >> خلاص عاد اهي صارت وكملت و هو مازال يلف ويدور
نور>> انا بنفهم حاجه وحده عليش يرن وهو لي ضحك عليكي من الاول
انا>> حاولت نفهم حتي انا والله مافهمت
نور>> يستر الله ماتحاوليش تردي عليه لو رن
انا>> لا مش حانرد مش خايفه غير انه يدير الجهاد شي حاجه يتعرضله ولا يضربه
نور>> نبهي جهاد
انا>> لالا فكيني منه متزلطه بكل مش عارفه كيف بنوريهم وجي
نور>> تي عادي ماصار شيي
انا >> ان شاء الله البوني يكون ردله عقلة سيد ادم ويحل عني
نور>> حتي هو بوني جهاد😂
انا> نور 🙄
نور>> سكتت خلاص

//
//
جهاد

نضت ثاني يوم للشغل وانا غامه عندي بكل ، خشيت لقيت شهد تشتغل صبحت عليها ونزلت لوطا للمعمل

لقيت خيريه مقعمزه تشتغل

جهاد>> خوخه
خيريه>> باهي االي وريتنا وجك
جهاد>> فكيني من حركات امي عاد 😂
خيريه"سيبت الة الخياطة وبحتت فيه">> هات احكيلي شن فيه
جهاد>> احسن حاجه انك فاهمه
خيريه>> متربي بيناتنا انت هنا
تذكر لما كنت صغير كان باتك يجيب فيك معاه ديما وكنت تلعب حذايا هنا
جهاد>> ايام ما كنتي صغيره ومُزه 😍😂
خيريه"ضرباته علي كتفه">> انت المن طالع بس باتك عيونه فالوطا عمره ما حد شكا منه
جهاد>> ماطالع الحد انا مافيش مني
خيريه>> المهم احكي
جهاد>> شي بس خالطه عندي شويه "وكريت كرسي وقعمزت"
خيريه>> يعني عشان جيت يومين للشغل قعدت غامه عندك؟ 😂
جهاد>> لا الشغل موضوعه بروحه يارا كيف متحملين هنا انتو
خيريه>> انت دلوع شويه بس
جهاد>> خوخه هكي بدينا نغلطو عاد🙄🤣

//
//

اما انا كنت نبرم فالمكتب و جهاد مشقاعد كملت شغل بروحي والاخ ولا دور شي
كنت نحسابه زعلان مني عشان اللي صار مع ادم بس خلاص عاد تأسفت 🙄

طلعت من مكتبي مشيت لصفاء قالت لي شفته نزل لوطا
انا>> شن يدير لوطا
صفاء>> اكيد ما يشتغلش يعني 😂تلقيه يهدرز
انا >> والله تعبت معاه
صفاء>> انا جيت قبلك بفترة قصيره جا مره جهاد قلب المعمل ضحك وبصارة لعند طلع استاذ حامد ولزه ،توا نحس فيه عقل شويه
انا>> اين عقل كان هكي العقل بلاش منه😂😂
صفاء>> دروحي نبي نخليك اتفائلي😂
انا>> خليني ننزله نشوف التفائل بعيني 😂