يوميات موظفين

الحلقة الثالثة والعشرون

#يوميات_موظفين~
الحلقة الثالثة والعشرون 📍
.
.

لايك + كومنت
//
//

شويه هكي وطلعو الشباب و كل واحد عدا يشوف في حياته وفالليل حا يردو وقعد حازم حذا جهاد

و شويه جت امه و خشت عليه ،وطبعا لازم من دراما الامهات والبكاء

حازم>> امي خلاص عاد مازال جهاد تعبان
امي >> الحمدلله علي سلامتك يا حبيبي
جهاد يغمض في عيونه
امي>> امتي يطلعوه
حازم>> مازال تمر ٤٨ ساعة يطمنو وبعدها يقرر الدكتور
امي >> ان شاء الله يطلع وليدي ان شاء الله

//
//

روح انس للحوش تاااااالف اكثر واحد كاين فالمستشفي و ماتحركش منها بكللل خش دوش و طلع انعزق يبي يرقد علي رنة تلفونه

انس >> ايوه
نور>> روحت
انس >> اه كيف طلعت
نور>> الحمدلله علي سلامة جهاد
انس >> الله يسلمك
نور >> كلمتني شهد اول ما روحت فرحانه بطير
انس >> اه شفتها لما جت
نور >> شنو ادير؟؟
انس >> تالف بكل
نور >> ياروحي خلاص نخليك تريح
انس >> لا ياروحي وبعدها نخليك اتريح ماتجيش بكل
نور>> هههههههه سامط ، كليت
انس >> والله ماعندي نيه بكل بنرقد بس خليك معايا عالخط لعند نرقد
نور >> باهي بعد تنوض كول
انس >> حاضر ... مرايف عليك
نور >> من يومين شفتني فالمستشفي عاد
انس >> لا انا كل يوم نرايف
نور ابتسمت>> يا سلام
انس >> عندك شك
نور>> لاء
انس >> خلاص معناها
نور >> امتي بتنوض ؟؟
انس >> توا الساعه ٤ ترني عليا ٨ هكي ؟؟ بيش نرد للمستشفي
نور>> حاضر 
انس بدا يطفى وصوته يريح >> ربي يخليك ليا
نور >> وليا❤️

قعدت نور عالخط لعند رقد انس بعدها صكرت ❤️

//
//

ثاني يوم ، كلناااااا ردينا للمعمل ❤️
استاذ حامد و قيس و حازم
كان يوم خميس و جهاد تحسن احسن من اليوم يلي قبله

كنا حايسين فالشغل المتراكم

انا >> عندنا اجتماع الاسبوع الجاي اللي اجلناه
هديل >> والشركة هذي تراجي فالرد
حامد >> خلي صفاء تكتب الرد هضا وتدزه
هديل خذت الورقة>> اوكي
انا >> الاجتماع يوم الاثنين الساعه ٢ تمام
حامد >> مناسب تمام بلغي حازم بس و اكدي عليهم
انا >> حاضر

كنا مشغولين بكل واحد نازل للمعمل لوطا والاخر راقي فوق
انا طالعه من مكتب وهديل خاشه

حازم >> قيس ما استلمتش شي الاسبوع هضا
قيس>> تي ما جيتش بكل انا
هديل >> خيريه استلمت و شهد ختمت بختم جهاد
حازم>> قسم بالله انكم خيال وينعبى عليكن انتي وياها
هديل غمزتله>> عيب