يوميات موظفين

الحلقة الثالثة عشر

#يوميات_موظفين~
الحلقة الثالثة عشر 📍

//
//

هديل >> عظم الله اجرك
حازم بحت فيها>> اجرنا و اجرك علي الله
هديل>>حاولت نرن عليك بس ما حصلتكش
حازم>> بارك الله فيك
هديل >> انت كويس ؟
حازم تنهد>> نبي الايام هذينا يمرن عشان عقلي يخف تفكير وقلبي تبرد ناره بس.
هديل بحتت فيه ومعش عرفت شن تقول

برم حازم ونزل لوطا

طلعت هديل جابت الاوراق الجهاد اللي مش فاهم منهن شي غير يبي يدير عرض قدامي وخلاص 😂😂😂

طلعت هديل وخشيت عليه انا

انا>> مش اتفقنا نكبرو عالحركات هذينا؟
جهاد مايبيش يرد
انا>> تهيالي انت الغلطان
جهاد>> لا مش غلطان !
انا>> ياسلام ؟ حتي انا مش غلطانه
جهاد>> كان ما فتحتيلش سريب ماكانش جا ووصل بيه لمواصيل يحكي قدامي بطريقة هذي

مع خشت قيس

انا>> لا تعال اضربني وخلاص حتي انا ! تعال خوذلك كفين

جهاد>> فكيني من الكلام الزايد كذا
قيس>> شباب مش قاعدين في حوشكم انتو؟
جهاد ازح باتك تو يطلع ما صدقناه سكت
جهاد>> نقوللكم حاجه اجتماع ودرته وحازم وجا طلع ماشي شور انس انا
انا >> شفته ياقيس ؟؟ شفت!
قيس>> جهاد !

سيبنا نحكو وطلع
انا خنقتني العبره>> هو كنه هكي 😭
قيس>> بطلي هبال الموضوع مش عليكي هو فيه حاجه مضايقته
انا >> هي حاجه شور بنت صح ؟
قيس>> كلا انتن ما تهلبن شي
انا >> يعني صح
قيس>> مش عارف خليه هو يحكيلك
انا >> اصحاب عاد ما تعطوش في بعضكم 😡

ضحك قيس و طلع من المكتب وطلعت وراه مشيت المكتبي وقعدت مضايقه ونفكر فلي صار 😞

//
//

جهاد
روحت للحوش غيرت دبش الشغل كان كاتم علي نفسي لبست لبسة عادية ومشيت لجامعة عند انس ورجب

جهاد>> وينكم؟
انس>> كافيتيريا
جهاد>> تم

مشيت شورهم وخشيت عليهم

رجب>> شن الجية هذي؟
جهاد>> طلعت بدري قلت نجي نديرلكم زرقة
انس >> لا تمام تو نصدقو

وانا نحكي مع انس مقابلني ووراه المكان متاع الدفع يلي فالكافيتيريا شفت بشرى وصاحبتها

جهاد>> ييييي عليك قصة
رجب>> شن فيه ؟

جيت نبي نصبي دوبني رفعت روحي هي برمت وجت عيني في عينها ابتسمتلي !
مافهمتش شن فيه 😕 ، قلت هي شافتني شافتني خلاص نقعمز

رجب>> يا اوييي بتفهمنا شن فيه؟
جهاد>> شي
انس برم وراه وبرضو رجب
انس>> هذي البنت لي هضك اليوم
جهاد>> را والله متمزط للمليون وجاي عشان نغير جو مش نتنكد
انس >> خلاص سكرنا السيرة
رجب>> معيال
جهاد>> رجب ؟