Shade In Darkness ( Season 1 )

SID - 7

Unicode Version

ဝမ်ရိပေါ် POV

ဆုတောင်းတွေကမှားတတ်သလား အကို

သေးငယ်နုံချာတဲ့ကျွန်တော့်ဘဝမှာ
အကို့ကိုပိုင်ဆိုင်ချင်တာသံသရာနဲ့ချီတာမို့
ဘယ်အရာတွေကိုအားထားရင်
တစ်ဘဝဆိုတာမျက်တောင်တစ်ခတ်နဲ့ညီမျှမလဲ

အလံဖြူပြရင်အရှုံးပေးတာပဲလို့
သတ်မှတ်ထားတဲ့ကျွန်တော့်ကို
ကံကြမ္မာကတိတ်တိတ်လေးထပ်ထိုးစစ်ဆင်တယ်

အချစ်ရှိရာအရပ်ဆီဦးတည်တဲ့ခြေလှမ်းတွေကို
နှောင့်နှေးစေချင်တဲ့ရည်ရွယ်ချက်နဲ့ရိုက်ချမယ့်
ဒီပရိယာယ်ကို အကိုကိုယ်တိုင်ဆွဲတယ်ဆိုရင်
စုတ်ပြတ်သွားတဲ့ကျွန်တော့်ရင်ဘတ်အတွက်
လျှော်ကြေးကဘာဖြစ်မလဲ

ကျွန်တော့်ရဲ့အချစ်ကမဖြူစင်ပြီး
မအေးချမ်းရုံသာမက
ကြမ်းတမ်းပြီးရိုင်းစိုင်းတယ်ဆိုတာ
သိခဲ့ရတာတောင်ဒီနှလုံးသားက
အကိုလက်ညိုးညွှန်ရာအမိန့်ဖြစ်နေတုန်းပဲ

မနူးမနပ်လေးလို့အကိုတွေးနေတဲ့ကျွန်တော်က
တကယ်လည်းအကိုပေးတဲ့ဒဏ်ရာတွေကို
လျစ်လျူရူပြီးစုံလုံးကန်းချစ်ပေးနိုင်အောင်
ရင့်ကျက်ချင်ယောင်ဆောင်ထားတဲ့
သာမညတစ်ယောက်ပါ

နေ့သစ်တွေကိုကျွန်တော်မုန်းသလိုပဲ
တစ်ခါတစ်လေမှာလည်းချစ်တယ်

အိပ်ယာနိုးလာတိုင်းဒီနေ့ဘာဖြစ်မလဲလို့
​ကြောက်တာလား ရင်ခုန်တာလား
မသေချာတဲ့ခံစားချက်ကြီးနဲ့
တွေးရတာကိုနှစ်ခြိုက်တတ်လာတယ်

အခုညနေမှာ
ပုံမှန်ထက်ထူးခြားတာဆိုလို့
ကျွန်တော့်ဆီအဖေဖုန်းဆက်လာတာ

လစ်စဘွန်းမြို့ရဲ့ဆိပ်ကမ်းမြစ်တံတားပေါ်
မနက်ခင်းလေညင်းခံရင်းမှ
သားတော်မောင်ဆီဖုန်းဆက်ဖို့
အဖေအတော်လေးစဥ်းစားလိုက်ရပုံပေါ်တယ်

" နေကောင်းတယ်မလားသားရေ
အတော်လေးရောအေးနေပြီလား
ကျန်းမာရေးဂရုစိုက်နော် "

တစ်ချက်တစ်ချက်အကြည့်လွဲပြီး
ပြောနေတာပေမယ့်အဖေ့အသံမှာ
ကရုဏာစိတ်အပြည့်ပါတာကျွန်တော်သိတယ်