Shade In Darkness ( Season 1 )

SID - 14

Unicode Version

ဝမ်ရိပေါ် POV

အိပ်မက်တွေကနေနိုးထဖို့
ကျွန်တော်တို့အချိန်ဘယ်လောက်လိုတတ်သလဲ

တစ်နာရီလား ဒါမှမဟုတ်
ဆယ်နာရီလား

ဘယ်လောက်ပဲကြာကြာပါ

ဒါဟာအိပ်မက်တစ်ခုဆိုရင်တောင်
ကျွန်တော်မနိုးထချင်ဘူး
မဟုတ်ဘူး မနိုးထတော့ဘူး

သင်တန်းကစာတွေ ရက်တိုတိုနဲ့
အမြန်ပြီးပြတ်အောင်သင်ရင်း
အကိုနဲ့တွေ့ရမယ့်နာရီပိုင်းဆိုတဲ့အချိန်လေးကို
ကျွန်တော်တသသမျှော်လင့်ယူရတယ်

ဒီနေ့တော့စာကြည့်တိုက်သွားဖို့ကိုလည်း
စဥ်းစားမနေတော့ပဲအကို့ဆီ
တန်းသွားဖို့ပြင်ဆင်ရင်း
ကျွန်တော့်ရင်တွေတဒုန်းဒုန်းခုန်နေဆဲ

အကိုနဲ့မတွေ့ရတာရက်အတော်ကြာခဲ့ပြီလေ

ဝေးကွာခဲ့တဲ့ပြက္ခဒိန်တွေကြား
အကိုဘာတွေပြောင်းလဲနေမလဲ
ကျွန်တော်သိပ်သိချင်ပါတယ်

အတွေးကြောင့်နှစ်ခြိုက်စွာ
တိုးတိုးကြိတ်ရီရင်းပေါ့ပေါ့ပါးပါးဖြစ်စေမယ့်
ရှပ်အဖြူနဲ့ဂျင်းဘောင်းဘီကိုပဲ
တွဲဖက်ဝတ်ဆင်လိုက်တယ်

ဒီလောက်ဆိုအကို့ဆီသွားဖို့ ready ဖြစ်ပြီ

အမွှေးရည်ထပ်ခါတလဲလဲဖြန်းပြီး
အကျအနမီးပူတိုက်ထားတဲ့
ဝတ်စုံလေးကိုစက္ကူအိတ်ထဲပြောင်းထည့်ရင်း
နံရံပေါ်ကအကို့ပုံရိပ်လေးဆီခဏငေးမိတယ်

အလွမ်းတွေအတိုးချဖို့
ကျွန်တော်လာပြီနော် အကို

လေချွန်သံတိုးတိုးငြီးရင်း
လှေကားပေါ်ကကျွန်တော်ပြေးဆင်းတော့
တစ်ပိုင်းတစ်စပြီးပြတ်နေပြီဖြစ်တဲ့
မာဖလာစလေးကိုသိုးမွေးဆက်ထိုးနေဆဲ
ညီမလေးကစူးစမ်းသလိုလှမ်းကြည့်တယ်

" ကိုကိုဘယ်လဲ
Results တွေကဒီနေ့မဟုတ်ရင်
မနက်ဖြန်လောက်ထွက်မယ်တဲ့နော်ကိုကို
သိပြီးပြီလား "

ကျွန်တော်ပိပိရိရိပြုံးရင်းခေါင်းညိမ့်ပြကာ
အပြင်သွားမယ့်အကြောင်းနဲ့
ထမင်းစားရန်မမေ့ဖို့မှာပြီး
အိမ်ပြင်ဖက်အမြန်ပြေးထွက်လာရတယ်