جوان_الشيخ_جاسر

البارت الثامن

جــوان الـشـيـخ جــاسـر

للكاتبة mropanda

هو صاح هل صوت لو اني اخرسيت بعد اي ردة فعل ما عندي دخل گبل رفع الدشداشه ع جتفي و جرني من ايدي و شمرني بغرفه بيبي فيروز و سد الباب عليه و كال بدلي لا انبش كبور اهلج اليوم،،دخلت للغرفه و اني افرك بأصابيعي من التوتر و الخوف و الرهبة منه و احس جسمي بالرغم ما الجو زين بي برودة بس جسمي اشتعل نار و قطرات العرك تنزل من گصتي و هو من صاح صار بجسمي رجفه و ايدي من كثر قوتة من جرني احس انكسرت من جديد و وجع مو طبيعي بيها بس شسوي هسه احسن اسكت ما اكول شي باوعت للسكف اريد الله يخلصني من هل غباء الي اني بي شلون ياربي ليش هيج ليش هيج،، سمعته يحجي و عصبي نار
جاسر : انتو من صدك ما عندكم اخلاق الا لو عندكم اخلاق متطلعون البنيه تفتح الباب و هي هيج مفرعه
حسين : جاسر ضب لسانك انته دايس بيتي
جاسر : هااااا و كفو منكم و الله تعرفون العيبه الا و محمد لو ما هاي الغبية الي جوه و الله و لا ادوس عتبة بابكم،،،..اني فاتحه الباب شويه اباوع الهم حسين و جاسر واحد گبال الثاني واكفين و يتكاونون و جدي كاعد هو و بيبي نهر و ضايج حيل من جاسر مدري مني بس وجهه ميتفسر و عماتي و علي يحاولون يسكتون جاسر و حسين و بيبي فيروز هي و البنات كاعدين بالكاع و جود بحضن بيبي نهر سمعت جاسر حجه هيج لو حسين انجن هجم عليه و بدا يضرب بي بوكسيات و جاسر بعد ابو الكتلات فر الكتله على حسين و نزل بي اني طلعت اريد اسكتهم علي اشرلي انو ارجع خاف تتأزم رجعت للغرفه و بقيت ادحك عليهم و هم عبالك ماخذين ع كلام السبع يطلع دم
حسين : و الك عين تحجي يلعار لو زلمة ما تمد ايدك على حرمة
جاسر : تريد اشوفك الزلمه شلون يصير
و گبوا مرا ثانيه بس هل مرا جدي طفرت روحه و زكح بيهم
عيدان : جججججهههاااااللللل انتوووو ججججههههااااال
فيروز : ولك حسيوين ولك يمه لسانك مو هيج نتفاهم ويا يمه كوم عنه
نهر : جويسر سمعت جدتك فيروز شكالت ولك كوم عن الزلمه خلي نحجي مثل الاوادم،،،. محد يسمع الهم و عماتي و علي لسه يفاككون بينهم بعدها كام جدي على حيله و بعكازته يحاول يبعد حسين عن جاسر جانو واحد نايم فوك الثاني و يتعاركون واحد لازم بياخة الثاني و الضرب مبين ع وجوههم دفعهم جدي بعكازته حيل فكوا و هدأوا
حسين : يصير خير يمه،،..راح للمغاسل يغسل الدم باوعلي انتبه عليه دا ابجي و اباوع عليه هو غمزلي بمعنى و لا يهمج بظهرج اني و راح غسل اما جاسر بقى يعد و يصف
جاسر : و الله و هذا قسم بالله اليوم ما اطلع منا الا اخذها ول يابه كواد اني و مرتي هيج تفتح الباب افرضوا مو احنه اجينه شلووووووننننن
فيروز : يمه احنا هذا الحجي عندنا ميوكل خبز هي لا مرتك و لا تصيرلك شي غير بنت عمك و اذا ابوها منطيك كلمة عنها فأحنا منتدخل بالحالة انته عاقد عليها بس هسه يا يمه ما الك كلمة عليها
عيدان : خيتي فيروز خلني احجي و انتو الي يعجبكم يصير
فيروز : لا خويه خلني احجي الي بگلبي،،،...هم يحجون و جاسر عينه ع الباب يدري بيه دا اباوع يأشرلي بعينه عود اليوم اشرب من دمج
فيروز : يمه جاسر مثل ما كلت الك و لو صدك انته تحبها متأذيها هيج و تجي البنيه شارده منك يمه احنا مو ضد انو تتزوجها و اني ابصملك بالعشره البنيه شاريتك بس انته لا ترحم و لا ترضى رحمة الله تنزل
جاسر : يعني تقنعيني انو تصرفها صح؟
فيروز : تصرفها هسه ما اكلك صح او غلط لانو مو غلطها،،،،البنيه اجتي شارده منك و انته تعرف كلش زين ليش منريد نفتح السالفه لانو البنيه نفسها متريد ينفتح الموضوع كدامها بس هي من اجتي مجابت هدوم كافيه و اليوم خلصت هدومها و لبست مني و شي كلش عادي ملابسي متكديلها و احنا الي كلنا الها تفتح الباب لانو عبالنا خوالها اجوي
جاسر : و انتي تقبلين تطلع كدام خوالها و ولدهم بهاي حالتها؟
فيروز : يمه انته متفهمني شتريد؟ دا اكلك هيج و هيج السالفه و كله صدفه
نهر : عوفي خيه هذا قافل عليها لو تشوفين الطفلة شلون عايشه تكولين سجن
جاسر : انكلب الحجي عليه هسه دحكوا كلكم تسمعون جوان مرتي و اني حر بيها اضربها اطيح حظها محد اله دخل بيناتنا الا و محمد لو واحد تدخل بيناتنا اخلي چيلة براسه
حسين : و هي ما عندها ظهر و تحجي هيج شو كلها جواك و انته العالي
جاسر : لتخليني ابدي من جديد و صيح ذيج خلي اخذها
حسين : و اذا اكلك متاخذها اليوم و تبقى يمي شتسوي مثلا؟
علي : شبيكم انتو تخبلتو صلو على محمد بويه
جاسر : لا خلي يحجي اريد اشوف وين توصل اليوم
حسين : و احجي و غصباً عليك فهمت شو انته متعرف تحترم احد
جاسر : كض لسانك لا اكصه
حسين : رجال انته سويها
كام جاسر يريد يكتل حسين زكح بيهم جدي
عيدان : اخلي العكازة تهلهل ع ظهره الي يتعارك ولكم كدامكم زعاطيط احنا و لا كن الشيب تارس روسنا
فيروز : لا عاب حلگك خويه،،،...اجتي خاله امينه فاتت من المطبخ مو من يمهم و بيدها علاليك اثنين كبار خطيه رادت تفوت الي زكح بيها جاسر اني رديت الباب و رجعت للغرفه
جاسر : وين وين منو انتي انوب
امينه : انته منو
فيروز : يمه هاي امينه مرت ادهم
نهر : هلا يمه هلا بيج شلونج شخبارج
امينه : هلا خاله الحمدلله بخير دامكم بخير،،..سمعت خاله امينة تسلم عليهم و اجتي يمي جانت جايبتلي ٣ كلابيات و ٢ تراكسود و عبايه اسلاميه تجنن مثل البشت صايره حتى شالات من النوعيه الزينه جايبه يمه همزين محد سألها شكو بالعلاليك لان جاسر يتخبل من سالفه اصرف من غير الفلوس الي هو ينطيها الي حتى من اجيت لهنا خلا بأيدي ٧٠٠ كال الج و لجود و لتاخذين حتى من بيبيتج...،،،اني گبل بدلت اخذت گلابيه يصير لونها رصاصي و من الصدر بيها شغل حيل حلو نازك و رداناتها طويله و نوعها بهارية يعني قماشها فانيلة ناعم حيل عجبتني طبعا خاله امينه مقصرت ساعدتني باللبس علمود ايدي كملنا
امينه : هذا الحلو الي حجه ويايه هو رجلج؟
جوان : خاله يا رجلي ابن عمي هذا الي يحبني و الي وصلني لهاي الحالة
امينه : هاااا الي يحبني ولج ام كفشه لو ما ميته عليه
جوان : يااا خاله هلكد مبين عليه
امينه : بس يستاهل هل كيكة هذا
جوان : لا شنو يستاهل دحكي شمسوي بيه
امينه : الله يهدي سركم ييمه تعاي تعاي اسويلج شعرج و ارتبج و اطلعي اجلطي
جوان : ههههههههههه خاله و الله عليج سوالف اجلطه هسه هو بس يريد يكطعني
امينه : يمه الحب يمه،،،..مشطت الي شعري و سوته ذيل حصان عالي و نزلت كم خصلة بس مو هوايه و شويه حمرة بس هيج لون عود و خلت شال ع راسي و رتبتني و اني اصلا البارحه كتلها تحفلي وجهي باوعت لروحي يمااااي طلعت اجنن شهل ترتيب و هي صلت على محمد من الحسد طلعتني من الغرفه و اني قطرة دم بجسمي ماكو صفريت من شفته جان المروض افرح بس بعد الي صار كمت اخاف بالزايد سلمت ع عماتي جانن كاعدات بالكاع و بيبي و جدي  كاعدين ع القطعه الجبيره الي يصير البيت كله كدامها و سارة و غزل و علي و بيبي بجهه هم ع القطعه الثانيه الجبيره صايرين كدامنا و حسوني كاعد يم بيبي فيروز بس جايب كرسي من برا و بحضنه جود يلعب هو ويا حتى ميتعارك و ابو الكتلات جسوري افندي،،اما جاسر كاعد وحده ع القطعه الي بيها بس اثنين خاله راحت للمطبخ تجيب عصاير لانو هدأو  و خلتني اكعد يم جاسر ،،،.. بعد ما هدأو جاسر و حسين الباقين هم هدأو و غيرو الموضوع اما ابو الكتلات ابد مينسى الا يطلعها من خشمي اعرفه انوب صارت هاي السالفه و سالفة المستشفى شلووون يربي،،،،..صارت ايدي الي ما بيها شي من جهته بس ارجف هو انتبه رجع نفسه لمستوايه و يحجي بصوت ناصي بس ميباوع عليه نظره صاير عليهم
جاسر : و الج عين ترجفين
جوان : شمسويه اني بايكه ناهبه
جاسر : و تراددين هم الا من صدك طلعت عينج
جوان : هاي شبيك
جاسر : شويه و افهمج الي بيه،،،...اجتي خاله قدمت الهم و جابت كرسي و كعدت بعدها سوالف للـ٣ العصر و جان جدي يكول يلا بويه نروح كافي عاد
جاسر : اي يلا جوان كومي
جوان : وين
جاسر : لبيتنا
جوان : مموو كتلي براحـ...
جاسر : و اسحب كلامي و اكلج يلا بسرعه عندي شغل،،...باوعت ع بيبي و حسين و اتوسل بيهم يحجون ما اريد ارجع
فيروز : بس يجاسر خلي البنيه تبقى شني ع طول الطريق لو مانعيك عنها
جاسر : فدوه اروحلج جده لتحجين كتلكم لتدخلون
حسين : متروح هي كوه،،،..اجه جرني من يم جاسر و خلاني بظهره
حسين : متطلع منا
جاسر : عيد شكلت بله؟؟
حسين : متطلـ...،،..مكمل كلامه جاسر هجم عليه و راد يسحبني عمتي اسراء و علي مخلو يجيني و كضبو بعيد و حسين اني لزمته و غزل و عمه اسيا و جاسر يصيح عليه و يكول يلاااااااااا لا احركج هناااااا و كام يسب و يغلط ع اهلي و شتايم من هاي التمام و يكول اني كواااااد لو عفتج هنا اهجم البيت فوك راسج سايبه فلت نفسه من علي و اجه يمي تقرب حسين هم فلت نفسه مني و راد يسحبني صاح جاسر
جاسر : عوووووفففههه
حسين : مو تدلل،،،...سحبني حسين و راد يدخلني للغرفه جاسر بحركه سريعه اخذني منه احس نفسي مثل الحبل بينهم يمكن لو بقيت على دشداشة بيبيتي جان تشككت..،،وصلنا بالباب و جاسر يعت بيه يريد نطلع و اني رافضه الفكرة و همَ يصيحون ع جاسر يكلوله عوف البنيه براحتها عاد هو وكف من شافني اني هم رافضه
جاسر : انتي هم؟
جوان : ءءاننيي ششنوو هم شنو؟
جاسر : تمثلين عليه الخوف؟ تريدين تخلصين مني؟تحتمين بيهم مني ولج؟ شفتيهم كلهم بظهرج قويتي عليه ووووللللججج؟،،...كل حجايه منه تزرف گلبي من الخوف و الوجع اريده بس يفتهم انو اجيت لهنا اريد ارتاح و هو رافض و الموضوع يمه تحور لغير شي عباله ما اريده عباله اني مجيشتهم عليه و صوته حيل عالي عصب عصب حيل
جوان : لا جاسر لا و الله لا مو هيـ..
جاسر : لا يولي هيج هيج،،..تقرب مني و حجه بأذني
جاسر : الا اندمج و اخليج تبجين دم لان كسرتي كلمتي كدامهم و ما حسبتيلي حساب و الله الا اندمج ،،،..و نتر ايدي و طلع شخط سيارته مبقت غير الترابه ورا اووووفففف ياااربي للليييش اباوع ورا و عيوني موكفن بجي شنو قصده راح اندمج شيسوي يعني،،..بيت جدي هم ما بقوا طلعو ورا و هم ضايجين حيل مني بالرغم ما هم دافعوا الي كدامه بس ورا ضاجوا حيل حتى محد سلم عليه بقينا بس اني و بيبي فيروز و حسين و جود باوعت للساعه جانت بـ٤ حسين كال طالع اشوف المضمد و مناك اطلع ع اصدقائي و بيبي راحت مددت من التعب كالت اقفلي الباب خاف نغفى و حسين ماكو رحت قفلت الباب و رجعت مددت يم جود جان وجهه عليه دايره و مخلي ايده جوه راسه و اني هم درت وجهي عليه و نمت مثله هو صافن عليه بعدين حجه
جود : عمو جاثر ليث يثيح عنيج (عمو جاسر ليش يصيح عليج)
جوان : يمكن لان اني اعصبه
جود : بث انتي ما ثويتي ثي غلط (بس انتي ما سويتي شي غلط)
جوان : يمكن هو يحس اني مسويه شي غلط
جود : اذا بعد ثيح عنيج مثل اليوم اضربه بوكث مثل خالو حثين (اذا بعد صيح عليج مثل اليوم اضربه بوكس مثل خالو حسين)
جوان : ههههههه ليش حبيبي انته مو تحبه و تخلي يبوسك هوايه
جود : ما احبه بعد حتى ما خلي يبوثني هوايه جبيرة
فيروز : ولك رامبو راسي راح ينفجر كافي،،..اندار ع بيبي و يحجي وياها
جود : بيبي انتي هم تضربي بوكث ثح؟
فيروز : اي بيبي اي نسوي كتلته عمل شعبي
جوان : جاسر امه داعيه عليج بالمغرب لعد
فيروز : ناموا كافي راسي راح ينفجر،،،.....نمنا كلنا من التعب و الهوسه صارلنا اسبوع متعودين ع هدوء البيت او يمكن اني الي تعودت ع الهدوء احلى من الهوسه و المشاكل ليش حياتي اني و جاسر متصير هيج هادئة كعدنا المغرب بيبي تصلي و اني رحت اسوي عشا طماطه تكلاه و چاي و اكو صمون و جود يشوف بالتلفون مالتي يم بيبي حسين لسه ما بين اجه جود يركض كال سارة تتصل عليج لزمت الفون تذكرت يمكن جاسر كاعد يمهم شحجي شكول حتى يهدأ لا يابه اكيد مو هناك هههففف اخذته و جاوبت
جوان : ها
ساره : وجعا
جوان : امممم شكو
ساره : شدتسوين،،...من هذا السؤال عرفت هي مو وحدها ...بعد هو اعترف كال اني موجود كل ميخابرنج و فوك هذا سمعت صوت جداحه اكيد هو ديدخن هههههاااي كشفتك فـأني كمت اراوغ بالحجي و اصير ذكيه عود
جوان : هيييجج دا اسوي اكل اسمعي اسمعي صوت الگلي مال الطماطه
ساره : ههههه ديري بالج ولج ايدج الثانيه لتروح
جوان : لا لتخافين اهنا محد يكسر ايديه،،...تعمدت اكولها حتى يحس مو بس اني غلطانه بحقه حتى هو اذاني
جود : ثاره ثاره فتحي كاميرا اثوفج لعبتي الجديده خالو جابلياها البارحه
ساره : يااا هسه افتح كاميرا وياك،،...اني نصيت الطاوه و الجاي و ابتعدت عن الطباخ و بحركه سريعه رتبت نفسي و انفتحت الكاميرا ساره جانت بعدها ممقربه الكاميرا ع وجهها فـاني نظري ثاقب ههههاااي شفته گاعد و زين يمه و غزل هم هي انصدفت گبل قربت الكاميرا و تمتمت بحجيها
جود : هاا ثفتيها
ساره : ها ثفتها ثفتها حبيبي تجنن بالعافيه
جود : اي عود اثتريلي منها انتي هم
جوان : عييييييب ولك
جود : هاج بوثه بث لتصيحين
جوان : هههههه،،....و من صدك سواها باسني و راح يم بيبي فيروز حسيت جاسر منتبه بالكاميرا
ساره : هذا اخوج كبران ههههه
جوان : يي يلا سديها
ساره : يا ليش غير دنشوفج لو حرام
جوان : مو فتحتيها علمود جود لو شنو
ساره : عوفيها قابل احنا غربه
جوان : تمام،،...ركزت التلفون ع الميز و خليته عالي حتى يطلع وجهي و اروح اطبخ حسين راح يجي و العشى مصاير لسه فشله
ساره : ديري بالج عوبه
جوان : تمااام بويه ترا مو فاهيه حسين علمني،،..سمعته يسب بصوت ناصي يمكن عباله ميبين بالمكالمه مهتميت اله هيج اريد احرك دمه و احنا فاتحين كاميرا دخل حسين من باب المطبخ ساره جفلت كبل وخرت بس بقت الكاميرا مفتوحه و متأكدة هو يسمع
حسين : ها يولي شدتسوين
جوان : علف لبطنك
حسين : افااااا و هذا شاربج ما مرجيه منج جا اني اكل علف
جوان : افااااا و هذا شاربك ما مرجيه منك غير اتشاقه
حسين : جايب كباب همزين سويتي طماطه
جوان : غير افكر بيك
حسين : امممم دحكي كملي و تعاي غيريلي الضماد مال وجهي من ورا حبيبج اكلنا كتله،،..اني هنا حمريت خضريت هو يحجي ممنتبه ع الجهاز
جوان :هو اني احتاج اغير ضمادي شدتحجي متشوف ايدي خلي جده تغيرلك
حسين : هو احنه شايفين منج خير كله لو عركات لو متسوين شي
جوان : اعوف العشا عليك و الله
حسين : الي يسمعج يكول كل يوميه ناكل من ايدج الا انتي ٢٤ ساعه نايمه و اني اجيب عشا من برا و خالتج تطبخ الغدا و ارجع اني اسوي الريوك حتى التنظيف على امينه
جوان : و مدام هيج نادر هم ايدك حتى باجر التنظيف عليك،...شو هذا كام يركض ورايه و يكول اليوم اطيح حظج و اني اركض اريد انهزم منه و اضحك عليه ما حسينا الا صوت علي بالجهاز عزا العزاني نسيت اني عفته مفتوح يبوووو
علي : هلا خويه حسين،،،...حسين تقرب ع الميز هو لاوي ايدي عود يريد يكتلني و هو مصدوم
حسين : هلا علاوي شلونك شلون صحتك مع العلم قبل ٤ ساعات انتو يمنا
علي : هههههه اي و الله شنسوي هاي سويره جانت تخابر جوان رادت تعرف اخبارها و احنا كاعدين هنا من دخلت انته هي عافت الجهاز مفتوج و كامت و الثولات اثنينهن ما سدن الجهاز
حسين : سويره لو غيرها رادوا يعرفون اخبارها
جوان : دعوفني ايدي كامت توجعني و عود احجي الاكل احترك
علي : ههههههه و الله عليك سوالف لگفتها،،..و همَ يحجون شفته تقرب للكاميرا عرفته لزمه فضول يريد يعرف حسين شيسويلي لان سمعني و اني اكله عوفني
حسين : خويه مينراد الها روحه للقاضي
جوان : كافي سد الجهاز و تعال ساعدني ما اكدر اصب الاكل
علي : هههههههه يلا روحو اعلفو ع كولة جوانه،،،..سمعت علي انكفخ ميريده يسد الجهاز بس حسين خبث عليه كله يلا رايحين مع السلامه و سده
حسين : ليش مكلتي فاتحه وياها كاميرا
جوان : وداعت امي نسيت،،....بقينا اني ويا نحضر كملنا و رحنا تعشينا و كله ضحك و تلفزيون و بيبي من عشاق المسلسلات التركيه بقت تدحك ع التلفزيون و جود نام غطيته و طلعت برا جانت الساعه بـ٨ كعدت ع الدرجات اووووففف الهوا يرد الروح بقيت افكر بي شيسوي هسه اكل لو لا زين يفكر بيه لو هاي مريم مدري غيرها ماليات عليه الوكت شيصير لو يفهمني و لو مرا ليش هيج هو عقده هههففف
حسين : لتفكرين هوايه مو زين
جوان : من شوكت انته هنا
حسين : هستوني جيت،،،...اجه كعد يمي و خلا عليه ستره لان الجو بي بروده
جوان : اممممم
حسين : تحبي؟
جوان : شبيك شو اول مرا اشوف خال هيج يحجي ويا بنت اخته
حسين : حالتج شاذه انتي،،..سحب جكاير و يدخن و يحجي ويايه
جوان : ها اي احبه
حسين : ليش شردتي منه لعد
جوان : علساس مشفت شسوا بيه و شلون يتعامل ويايه مع انو الغلط منه بس الله وكيلك لحد هسه مفتحت موضوع سوالفه مال النسوان و هو ع الحجايه يحاسبني
حسين : دحكي يولي الي يحب يتحمل،، اني ما ادافع عنه و اني ما اكرهه و لا هو عايل عليه فديوم  يمكن اني ويا نتعارك لان اثنينا انريد نحميج بس بُعدج عنه هذا اكبر غلط و لا تفكرين انو بسكوتج عن موضوعه مال النسوان مسويه فضل لا يابه لازم تحجين ويا و تكعدون سويه بهدوء و بعقل تكوليله هاي سالفتنا 1 2 3 و تخلين النقاط ع الحروف ترا بهذا عنادكم مرا توصلون لحل
جوان : بسس انـ...
حسين : خليني اكمل يا يابه
جوان : تمام اسفه
حسين : لتغلطين مثلي و تخلين فراغ بعلاقتكم ترا الرجال كل ما يشوف كرامته تهتز يسحب روحه و هو ضابط اشكال الوان بنات يعرف ما اكلج باقي الزلم مو مثله بس اني معاشرهم و اعرف سوالفهم
جوان : و هسه شسوي
حسين : اصبري هل يومين اذا ما اجه حجه وياج انتي ابدي و خلو حدود و امسحو الي راح يولي راح يصير اسبوعين على عنادكم ع الاقل احجوا شوفوا ليوين توصلون بهاي العلاقه و ترا تعرفين غيرج يريدن زلمه حوك و هو يغمزلي عود يعني يريدن ذيج السوالف منه
جوان : هاااااا فهمتك عيب بابا عيب
حسين : شعليه غير هن ذني جماعته امهات الثلاثينات يموتن ع هيج سوالف و خاصه اذا من رجال مثله
جوان : سد الموضوع و باجر تاخذني للدكتورة بلكي تفك ايدي مليت
حسين : ها هي باجر
جوان : اي و الله
حسين : ديلا كومي نامي علمود نطلع من الصبح لان عندي شغل و انتي طفرتي خربتي جدولي
جوان : ما استاهل؟
حسين : دفوتي فوتي انطمري
———————————————————————-
بارت كله عركات😂،،يابه اذا قصير كلولي عفيه❤️.