مَلــَكتـني💕

£ p̷a̷r̷t̷ 9 £

للکاتبه °l||l°( ℣õ℣õ )°l||l°

ــــــــßΞ❤Ξ»¯−ـ‗_ღ ƤƛƦƬ 9 ღ_‗ـ−¯«Ξ❤Ξß ـــــــــ

حنين ...

صعد الشيخ بالسياره ..  محچه اي شي و لا حتى باوع عليه ... و ضلينه طول الطريق هو ساكت واني ابچي بس بدون صوت بس دموع تتجاره على خدي

كلش طولنه بالطريق و عرفت طلعنه من بغداد من السيطرات بس ما اعرف لوين رايحين ...

وراها غفيت و محسيت الا بواحد يهزني من ايدي ..

الشيخ حمد : يا بنيه.. بنيتي .. بنيتي

فزيت و جريت ايدي و صحت

حنين : ها ها ...

الشيخ حمد : گعدي يا بويه وصلنه الديره

تعدلت و نزلت من السياره الي چانت مطبوگه گدام بيت چبييييير حيل بعمري ما شايفه بيت بكبره و ضخامته و فخامته ... احنه بيتنه چان زغير يعني على گد الحال بيت گرايبنه همات مثل بيتنه بس هذول بيتهم چبيرحيل و اول شي طخ ابالي انو شلون ينظفوه ؟؟؟ صعبه والله

المهم هو فتح الباب بمفاتيحه و طبينه اول شي حديقه چبيره و بيها نافوره و كلش عجبتني حديقتهم چنها متنزه ابكبرها ،، بعدين يجي الحوش الي بيه سيارتين مطبوگات گلت اكيد يعيشون اهنا اكثر من عائله اي طبعا البيت چبير و يحوي عوائل مو بس عائله وحده

دخلنه من الكليدور و هو صاح ...

الشيخ حمد : يا جماعه الخير وينكم

رئسا ولد صغير بعمر حسن اخويه صاح بابا و چيت بحضنه

الشيخ حمد : هلا هلا بالبطل هلا بحبيب ابوك علاوي شلونك

علي : زين

اني انصدمت من گله بابا يعني هذا الرجال متزوج !!! لعد ليش تزوجني ؟!

الشيخ حمد : علاوي وينهن امك و حبوبتك  ؟؟

علي : بالهول گعد يسولفن

الشيخ حمد : عجل خل نروحلهم (اندارلي و گالي )  امشينا يلا ..

طبينه للهول و اني بس اباوع عل الاثاث و البيت مثل الما شايف ( و فعلا اني ما شايفه هيچ بيت چبير )

الشيخ حمد : الله بالخير

ام علي : الله بالخيرات

الحجيه : هلا وهلا بالغالي من فدوه رحت لطولك .. تعال احبك يا بعد رويحي انته

الشيخ حمد ( و هو يدنگ يحبها من ايدها ) : شونچ حجيه ..

الحجيه : الحمد لله يا يمه زينه بشوفتك

الشيخ حمد : دومچ زينه ان شاء الله ..

حنين .. هو يحچي وياها و هاي المره ضلت اتباوعلي من ساسي لراسي