عشق الشيطان : باللهجة التونسية

حقائق :

هابطة تجري مالدروج مزروبة الوقت بش إيفوتها أو ما عادش بكري على خدمتها ... أو تتصدم في عبد
- هاااااي ،  تي حل عينيك يخي  ما تراش  ؟؟ قعدت تخزرلو أو هو يصيح أو هي باهتة فيه   
- سامحني ماريتكش  مزروبة  !! قالت أو جات بش تتعدى
- ملا حالة هاذي المرة الجاية حل عينيك
- تي ماو قلنا سامحني عاد ، شبيك ماتفهمش ،  جاوبت أو هيا تصيح
- كان الهمجية ، أو آخر مرة تهز صوتك إنت ، أو كان والديك ما رباوكش أنا نربيك ، باهي
- إسمعني إنت يا سي السيد ، ياخي شنوا تسخايل في روحك قايم تصيح أو قال بش تربيني ، برا إمشي ربي روحك أو أعرف كيفاه تحكي مع بنات الناس
- يا طفلة إنت رد بالك أو أوزن كلامك المرة الجاية ماكانش و الله ما تلوم كان روحك
- هاني قدامك تره وريني آش بش تعمل ... او وقفت تخزرلو 
ياخي السيد امشا أو خلاها هككا واقفة تحكي مع روحها : ملا مناظر قداش مالين الشوارع ، حثالة المجتمع "
أو بعد خزرت للوقت تلقاه ماعادش بكري بالكل أو لازمها تزرب باش توصل فيسع ... أو كيف كيف هو قعد يتمتم : ملا حالة قول ماهياش طفلة ، تحكي و تصيح قولش علاها طفل ، بنات آخر زمان كان قلت التربية " ، أو مشا مكمل طريقو للشركة متاع خوه حب يحكي معاه على راحتهم بعد المشكلة إلي صارت معا أمهم في الدار لازم إيفضوها ...
***************
وقفت قدام الشركة موش مصدقة إلي وصلت موخَر ، أول مرة في حياتها توخر على خدمتها ياربي كلو من هاك المنظر إلي عرضها الصباح هو خلاها توخر ...
مبعد تنفست مليح أو دخلت تدعي في ربي باش عرفها يتفهم التأخير متاعها ...
- دلال ! ناداتها صاحبتها زهرة ، شبيك لتوا ياخي سي آسر سأل عليك مرتين
هذا إلي كان ناقصها عالصباح أو زيد كمل سأل يا ربي
- زهرة عيش أختي عاوني آش بش نقلو
- قلو الحقيقة ماك تعرفوا ، و إنت الساعة علاش وخرت ... قعدت دلال قدامها أو حكاتلها الي صار الكل الصباح
- إي برا قلوا ماعندك حتى حل ...
مشات دلال حتى لين وصلت للبيرو متاع عرفها " سي آسر " أو هيا تدعي في ربي في قلبها ... دقت الباب ، استنات و استنات أو بعد دقايق سمعتوا يقول :- تفضل "
دزت الباب بشويا أو دخلت ... وقفت قدامو أو ماهزتش حتى عيناها مالقاعة ، آسر كان فرحان عالاخر إلي شافها او خاف علاها برشا كيف قالولو إلي هيا وخرت او هو موش عوايدها ، آما قدامها عمل روحو موش مهتم باها أو قاللها : آنسة دلال تنجم تبررلي سبب تأخيرك اليوم ...
جات بش تجاوب حتى سمعت صوت من وراها قال : بش تقعد ساكتة برشا ؟
دارت دلال وراها لا إراديا أو رات نفس الراجل إلي تصدمت فيه الصباح هوا بيدو ، فش يعمل هنا هذا ، آش مجيبوا ، يعجبكشي زادا ؟؟ قعدت حالا عيناها عالاخر مصدومة مالعبد إلي قدامها
:_ ياخي إنتوما تعرفوا بعضكم ، قال آسر أو هوا يخزر لخوه
- لا ، أبدا ما نعرفهاش ، اللهم هيا تعرفني ، و إنت يا طفلة بش تخلي عرفك يستنى برشا ؟؟
- أنا ، الحقيقة ما قصدتش نوخر او .... ماعرفتش شنوا تكمل تحكي ، او باش بش تبرر
- الحكاية هاذي نحكيو فاها مبعد ، تنجم توا تمشي لخدمتك ، أو نعرفك هذا خويا طلال
قام طلال أو مشا لدلال أو قاللها : -  عسلامة تشرفت بمعرفتك
ما عرفتش شنوا تجاوبو أو قعدت تخزر موش مصدقة ، ياخي كمل طلال طريقو و اقعد في الكرسي إلي قدام بيرو خوه أو قالو : ماكش مستانس تخدم ناس هكا حتى السلام ما تعرش تردو
تنرفز آسر من كلام خوه أو قال لدلال: -  تنجم تخرج توا ... مبعد ماخرجت ، حست بقلبها بش يخرج من بقعتو ، يا ربي قلي خوه أو أنا الصباح نسب فيه يا ملا وحلة وحلتها لو كان إيقلوا إلا ما نتطرد عالبلاصة ياربي ... أو مبعد مشات للبيرو متاعها أو قعدت تحاول تبدا في خدمتها إلي تستنا فاها منغير ما تخمم في إلي صار ...
**************
مبعد ما خرجت دلال ، قال طلال لخوه :- نرا فيك خايف برشا على هالطفلة شنيا الحكاية
- لا فما لا حكاية لا غنايا ، الطفلة وخرت و  أنا اسألتها عالسبب ، ما تنساش هيا موظفة تخدم لنا ، أو من واجبي نعرف كل شي
- آما الطريقة إلي كنت تحكي باها معاها تجيب الشبهات الحقيقة
- لا شبهات لا شي ، هيا السكريتيرة الخاصة متاعي أو أكيد ماهياش بش تكون كيما البقية
- على كيفك ، أمورك خويا
- باهي إنت ماكش بش تقول علاه جيت ، ياخي ماتخدمش
- ما هو فيبالك بيا مضروب ، يعني ما نخدمش
- إي ، يعني تجي تحقق معايا و تقلق فيا كي ما تخدمش
- الله غالب الشي في دمي ، أهوكا في عوض ما نحقق مع المجرمين هاني نحقق معاك
- هيا تكلم فيسع شتحب تقول ، و إلا أنفض ريشك أو سامحنا البرا
- آمان ، تطرد فيا
- كان عجبك ، ماكانش توكل مانيش ناقصك
إستوا طلال قعدتوا و اخزر لخوه بجدية او قالو
- شو خويا العزيز ، أمي راهي متقلقا برشا ملي صار البارح
آسر حس روحو تخنق ملي جبدلو الحكاية ، الموضوع هذا بالذات مايحبش يحكي فيه
- طلال بربي سكر علينا هالموضوع
- ما تنجمش تزيد تتهرب أكثر ، أحكيلي هانا وحدنا شنوا إلي صار شبيك تقلبت
- أمي ماتحبش تفهم ، الطفلة ماعادش حاشتي باها أوفا المكتوب الله غالب
- إنت كنت بش تموت علاها شنوا إلي خلاك تبعد علاها
- لا كنت بش نموت علاها لاشي ، أمي هذيكا حبت التصويرة هكاكا
- إنت توا تحب تقنعني إلي إنت ماحبيتش مريم ؟
- حتى طرف
- بربي شكون بش إيصدق  الحكاية هاذي
- تحب تصدق صدق ، ما تحبش موش لازم
- شنوا الحل توا
- حتى شي
- أمك في الدار صاير فاها و إنت تقلي حتى شي ، شبيك راك بهدلت بحال بنت أختها ، الطفلة طيشتها على طول يدك
- هيا وصلت روحها ، أمي ضغطت عليا باش ناخو بنت أختها و أنا مانحبهاش
- راهي مالها إلا قريبتك كيفاه تعمللها هكا 
تبسم آسر تبسيما خفيفة أو قلو
: أتوا كيف توصل تعرف إلي عرفتوا تو تعرف شمعناها قريبتك ، قلو قريبتك
- شنوا إلي عرفتو ، قال طلال أو هوا مضيق على عينيه
- سامحني خويا الغالي  ، مانيش بش نقلك ، حاجات أكبر من مخك
- شنيا إلي أكبر من مخي ، جاوبوا طلال أو هوا يصيح
- أعصابك يا سيد بالك تسخايل روحك في إستجواب ، تحب تعرف برا لوج وحدك ، أو توا سامحني البرا
- باهي يا آسر ، توا نعرف ما تخافش ... توا نعرف
***********
مبعد خرج أو هوا يتمتم أو سكر الباب وراه بالقوي حتى لين ترعبت دلال القاعدة في بيروها ، شويا خزرلها باستحقار أو كمل ثنيتوا للباب ......
******
أعطيوني رايكم او ميرسي 😘😘😘