عشق الشيطان : باللهجة التونسية

مصادفة :

خذا آسر الأوراق أو بدا يقرى فيهم أو مع كل كلمة يحس روحو تخنق ، أو وجهو تقلب ، أو خزر لخوه أو قلو بتهديد : قلّي منين جبت الأوراق هاذم ؟؟ ...
- إنت إلّي بش تقلّي موش أنا ، جاوبو طلال
- طلال الحكاية خطيرة ، قلّي منين جبتهم ، قال آسر بتحذير
- أسمعني ، الوراق هاذم لقيتهم فوق بيروك ، يعني إنت لي تقلي موش أنا سيدي خويا
- وين فوق بيرويا ؟؟ سأل آسر بصدمة
- ما عادش تعمل فاها بهلول ، بيروك هذا آسر ، جاوب طلال أو هوا يصيح
- مستحيل ، موش ممكن ، قال آسر بصدمة
- شوف خويا العزيز ، ما تخافش قلّي شصار أو أنا تو نتصرف ، قال طلال
- شنوا ما تخافش آش لقيتني عامل ؟؟ صاح آسر
- ما تنكرش آسر ، شنوّا علاقتك بالراجل هذا ، قال طلال
- صدّقني ما عندي بيه حتى علاقة
- يعني ما تعرفوش
- لا
- باهي تو نتصرّف أنا ، و تو نعرف شكون أو وقتها كل واحد تو يعرف شنوّا ليه و شنوّا عليه ... قال طلال هذا أو ضرب باب البيت و خرج منرفز ، أو خلّا وراه آسر مصدوم زعما إلي خمّم فيه صحيح ؟؟
********
في الصباح قامت دلال مالنوم بنشاط ، فطرت بدلت حوايجها باست أمها أو خرجت كالعادة ماشيا لخدمتها ، أو عرضها طلال قدام الباب
- صباح الخييير و النّور و السرور يا عسل ، قال طلال
- صباح الخير ، قالت دلال أو هيّا متفاجأة
- هيا نمشيوا ؟؟
- وين ؟؟ ردت دلال
- ياربّي ! للخدمة ، وين تحب نهزّك عالصباح
- آ ! سا محني و الله نسيت
- موش مهم ، خلّينا نمشيو
- هيّا ! ، قالت دلال أو ركبو في الكرهبة أو مشاو ، واحد كان وراهم إيتبّع فيهم أو خذا تصويرة لطلال ، أو قال يحكي في التليفون : هذاكا هوّا سي وليد ؟؟
- هوّا بيدو يا عمّار ، هوّا بيدو ، قال وليد هذا من بين سنّيه و الغش ياكل فيه
- نكمّل نتبّعهم سيدي ، سأل عمّار
- بالطبيعة ، رد بالك تغفل عليهم
- حاضر ، أوامر أخرى
- لا ، قال وليد أو سكّر التليفون ، أو قعد يحكي مع التّصويرة متاع طلال : مسكين ، تسخّف و الله ، كان تعرف آش بش إيصير فيك ، صدّقني إلا ما نخليك تتمنّى الموت علّي بش اتشوفو ، إلا ما نذوقك المر يا كلب يا ***** ...
أو مبعد نادى :هشاااام !!
جاه هشام يجري :- نعم سيدي
- خوذ التصويرة هاذي مالتليفون ، ريت مولاها نحب نعرف كل شي عليه الشقيقة و الرقيقة ، فاهم ؟؟
- حاضر سيدي
- في إيدك ساعة ، ساعة وحدة تجيب فاها المعلومات الكل... باااهي ، صاح وليد
- حاضر سيدي ، قال هشام هذا و خرج يجري ، وقتلّي قعد وليد يحكي مع روحو " مهما تكون راسك بش يتقص ، توّا تشوف و تعرف وليد الشيطان على حقيقتو ، موش أنا إلّي تفكلي حاجتي و خاصّة دلال ، بش نتحاسبو أو كل واحد بش إيخلّص فاتورة إلي عملو " ......
*********
- فهمت آش بش تعمل و لا نعاودلك
- لا، لا مفهوم مدام مريم
- صحّيت ، تحط المنڨالة في السّاك متاع الكلبة دلال ، أو مبعد تقول إلي منڨالتك تسرقت أو في أخّر تطلع عند الكلبة هاذيكا إيطرّدها آسر و تولّي إنت في بقعتها مع الفلوس هذوما ، ريتهم محلاهم ، قالت مريم أو هيا تحسب في الفلوس قدّام عينين زهرة
- أي ، أو فمّا حاجة في الدنيا أحلى و أجمل مالفلوس
- صحيت ، مالا كان تحب تاخوهم أعمل إلي قتلك عليه بالصحيح
- بالطبيعة ، ما تخافش عندك كان النساء
- هنّيني يا زهرة نحبها في ظرف سوايع تطير منّا بفضيحة
- إتهنّى أو أرقد على وذنيك الزّوز مدام ...
أو مبعد هزّت المنڨالة أو قعدت في بيروها تستنى في دلال حتى تجي ، أو هيّا معملا باش تعمل كيف ما قالتلها مريم .....
**********
قام آسر مالنّوم موخّر على عكس العادة ، البارح كان تاعب برشا ، كل شي هبط على راسو كالصّاعقة أو زيد كمّل عليه طلال بحكاية هذا عادل ، فقَام لبس حوايجو فطر أو خذا كرهبتو ، أو مد كارطة مكتوب علاها رقم ، بعد أخذ و رد قرّر باش يطلبو ، بعد دقايق جاه الجواب أو صوت راجل كلمو
- ألو
- صباح الخير
- صباح النور شكون معايا
- أنا آسر ، آسر ولد سي محمّد الله يرحمو
- آمين ، تفضل ولدي ، آش حاجتك
- نحب نقابلك سي عادل
- توّا ؟؟
- أي ، عندي حاجة أكيدة ليك
- يا ولدي صعيب برشا كان نجّم نجيك
- أنا نجيك ، قلّي وين أو وقتاش و أنا نكون بحذاك
- باهي الأربعة متاع العشية إيجا للعنوان هاذا إلي بش نبعثهولك و توّا تلقاني
- باهي ، مشات معاك
- في الأمان سي آسر
- على خير سي عادل ....
مبعد ما علّق التليفون قعد يضحك أو يضحك بش إيموت بالضّحك ، أو مشى للسّيّد إلي مربوط قدامو أو قلو : للأسف ما طلعش ذكي كيما بوه ، و لا خبيث كيما أمو ، ههههههه ، والله صدق إلي أنا عادل ، قداشو بهيم ال***** ، لازم نفرح بيه موش هكّا عادل ولد صاحبك ، لازم نفرحو بيه بطريقتنا ، أو صاح ، هيا لولاد هزّو عمكم عادل منّا أو حضرو رواحكم عنّا حفلة العشيّة .....
**********

-سي وليد المعلومات إلي طلبتهم حاضرين ، قال هاشم
- برافو عليك يا بطل هات نشوف
- تفضّل
خذا وليد الوراق أو بدا يقرى : طلال ال ... بوليس ، خو آسر رجل الأعمال الكبير ، ولد محمّد ... مستحيل لا موش ممكن ، كيفاه ، هذا يطلع ولد صاحب بوه أو عايلاتهم صحاب و قراب لبعضهم ، ملا زهر ، مالا آش وصلو لدلال ، كيفاه عرفها ، يحس في روحو بش يهبل ، لازم يكلّم بوه و يحكيلو الحكاية ، خذا تاليفونو طلب بوه إينوقز أو ما يهزّش ، الأكيد إنّو ما زال راقد ، خذا مفتاح كرهبتو أو قرّر باش إيشوفو في الدار .
- عينيكم نحبها محلولة قال وليد لهشام، نوصل للدار نشوف سي عادل أو نرجع
- حاضر سيدي
- باهي ، قال وليد و خرج ماشي للدار ....
******
زعما دلال بش تطّرد مالخدمة ؟؟
أو آسر شنوّا المفاجأة إلي تستنّى فيه ؟؟
وشنيّا علاقة بو طلال بعايلة وليد ؟؟
تابعونا باش تعرفو هذا أو أكثر 😘😘