عشق الشيطان : باللهجة التونسية

تخطيط :

طلال يقرى في الوراق أو الصدمة مع كل حرف تزيد تقوى ، موش مصدّق شنوّا علاقة خوه بهذا عادل ، السيّد سارق أو مجرم من النّوع الخطير ، مستحيل خوه تكون عندو علاقة بالسيّد هذا ... فجأة الباب تحل ، ياخي قام طلال  مفجوع أو حط الوراق في جيبو ، و إلي دخل كانت الفام دو ميناج (femme de ménage) متاع الدار ، تشوف في آسر رجع ولّا لا ... مبعد طلع طلال أو في مخّو تدور ألف حكاية و حكاية على الوراق إلي لقاهم ....
*********
دخلت دلال للدار متقلقة عل أخّر موش عارفة كان ما جاش طلال معاها شنوّا كان إينجّم إيصير فاها بالحق الطفل هذا بعثهولها ربي ، باش إيكون بحذاها في اللحضات الخايبة إلي عاشتهم اليوم الكل ... أو هيا في طريقها لبيتها لقات أمها في الكوجينة تطيّب في العشاء ، سلمت علاها أو قعدت تعاون فاها فمّاش ما تنسى إلي صار
لاحظت أمها إلّي بنتها متقلقة موش كالعادة ، ياخي سألتها :- ددّو عزيزتي ، قلّي شبيك يا روح ماما ..
أول ما سمعت دلال أمها قالتلها ددّو تطرشقت بالضّحك ، أو تذكرت طلال كيفاه قالها لها ..
استغربت أمها أو قالتلها : - إل هالدّرجة كلامي إيضحّك ؟؟
- لا ، سامحني أمي و الله ما نقصد ، تفكّرت حاجة ضحكتني
- باهي ، قلّي شبيك ؟؟
- حتى شي أمي ، لاباس
- مثبتة ، رد بالك تحاول تخبّي عليا
- لا ما تقلّقش روحك ، لباااس عل أخّر ... أو قعدت دلال تعاون في أمها بعد ما قررّت باش ما تقلهاش إلّي وليد رجع أهوكا بأنقص مشكلة ، أو  قعدت كل كلمة من كلمات طلال تتعاود في راسها ، ملامحو تبسيمتو روحو الخفيفة ما نجمتش تنساهم ليلة كاملا ...
************
- حضّر كل شي عمّار ، عنّا هدف جديد ، قال وليد
- شكون تعيس الحظ إلي طاح تحت يديك سي وليد ، سأل عمّار
- واحد تعدّى على زرع النّاس لازم نقصولو ساقيه ، جاوب وليد ، أو كمّل بنبرة جديّة تخوّف ، نحب نعرف عيه كل شي أمو بوه خواتو جد جد جد جدّو نحب نعرفو ، المختصر نحب تقرير مفصّل عليه ، هنّيني عمّار
- حاضر سي وليد ، آما ما قتليش شكونو
- مازلت ما عرفتش إسمو ، نحبك غدوة تمشي قدّام دار دلال أو تبقى تبّع فاها نهار كامل أو تجيبلي تصويرة كل راجل تتقابل هيّا ويّاه ، و توّا نطلعوه  مفهوم ؟؟ قال وليد
- مفهوم سيدي
- تنجّم تمشي توّا .....
خرج عمّار و قعد وليد يخمّم ، مستحيل يخسر دلال ، الموت أقربلو من إنّو يراها مع راجل آخر ، مستحيل موش هوّا وليد الشيطان ، كيما إيقولولو ، كان ما يرجّعش دلال لحضنو ، لمكانها الطبيعي وين لازمها تكون ....
***********
قعد آسر مقابل قبر بوه و الدموع بدات تجري من عينيه لا إراديا ، كل وين يتقلّق يجي لنّا ، يحكي لبوه على إلي قلقو و إيفرّغ قلبو خاتر ما عندو حد يسمعو ، بدى يحكي أو قال : كان تعرف يا بابا قدّاه أنا محتاجلك ، ولدك حاجتو بيك أكثر من أي وقت ، برغم كل شي أنا حاجتي بيك بمساوئك أو طبيعتك الصعيبة ، بتنرفيزك أو غشّك ، أنا حاجتي بيك ، موش باش تربّت على كتفي و تقلّي أنسى ، لا حاجتي بكف من عندك تفيّقني بيه و تقلّي أنا ولدي راجل أو ما يهزّو شي ، آما  للأسف أنا جيت ضعيف نغرق في كاس ماء ، كلمة تهزني و كلمة تجيبني ، على عكس طلال ، قدّاه نحسدو على طبيعتو أو تفكيرو ، تتفكّر وقتلّي كنّا صغار كنت تقلّي كان جبان ، أو كان طلال الشُّجاع  المغوار ، بالرغم ملّي كنت نقرا خير منّو كنت ديما تعتبرو الأحسن  ، أو توّا وين فهمت علاش ، للأسف فهمت بعد ما فات الفوت ، أو قعدت ديما الخاسر في كل شي خاسر ، أصلا حياتي خسارة ، أو زادت دموعو ، خسارة إلي كيفي إيعيشو ، ما صاب جيت أنا في بقعتك يا بابا ، تعبت و الله تعبت ، تعبت ، تعبت ، تعبت...  قال كلماتو و ترحّم على بوه أو ركب في كرهبتو راجع للدار
***********
- زعما أمي تنجح الخطة متاعنا ؟؟
- أكيد يا بنتي راني كارولين أو ما أدراك ، توا تشوف بش إيطرّدها أول ما يسمع و إيرى
- زعما يرجعلي آسر كيما قبل ؟؟ سألت مريم
- بالطبيعة توا تشوف بش إيولي يجري وراك بعد ما يعرف الكلبة دلال على حقيقتها ، جاوبت كارولين
- و الله إلا ما نذلّو باش نرجعلو ، إلا ما نخلّيه كالخاتم في صبعي  ، قالت مريم
- ستنّى  السّاعة نعطيو المنڨالة  هاذي  متاع وحدة تخدم في الشّركة معاهم ، أو هيّا بيدها  إلّي بش تحطها في ساك هاك الكلبة دلال ، أو مبعد تتطرّد بفضيحتها و العار يبقى لاصق فاها ، أو إيجي حبيب القلب  إيبوسلك ساقيك باش ترجعلو ، او وقتها ناخذو كل شي نحبّو عليه ، آسر و الرّزق و الأملاك مع بعضهم .....
أو خزرت لبنتها أو ضحكو  ضحكة خبث أو شر ....
******"*
قعد طلال في بيتو يعاود يقرى في الوراق إلي لقاهم أو يزيد يركّز مع كل كلمة ، أو مخّو يخدم يحب يعرف علاقة خوه بالشخص هذا ، مبعد جاتو فكرة خذا الوراق صوّرهم بتاليفونو أو قرّر باش يبعثهم الصباح لصحابو في الشرطة باش يعرف شكون الشخص هذا بالظبط ، أو بعد دقايق سمع  صوت كرهبة وقفت   ، خزر مالشبّاك يلقاه آسر جا ، أخيرا بش يعرف منّو كل شي ...
بعد دقايق كان آسر في الدار ، ستنّاه طلال لين يدخل لبيتو أو مشالو ،
- الحمد الله عالسلامة سيدي خويا وين كنت
- ما يدخلكش،  أو أخرج نحب نرقد ، قال آسر هذا و مشى يجيب في حوايجو باش يبدّلهم
- يحرز الدنيا ليل و لّا راني ...
- و لّا راك شنوّا ؟؟ سأل آسر
- ما يهمّش ، أخزر شنوّا هذا ، قال طلال أو مد الأوراق من جيبو
- شنوما الأوراق هاذم ؟؟ تسائل آسر
- خوذ أقرى ، لقيتهم فوق بيروك خويا العزيز
خذا آسر الأوراق أو بدا يقرى فيهم أو مع كل كلمة يحس روحو تخنق ، أو وجهو تقلب ، أو خزر لخوه أو قلو بتهديد : قلّي منين جبت الأوراق هاذم ؟؟ ...
*********
زعما دلال بش اتطيح في الفخ متاع كارولين أو مريم ؟؟
أو آسر كيفاه بش إيبرّر إل خوه حكاية الوراق ؟؟
و شكونو هذا عادل إلّي رجع لحياتهم من جديد ؟؟
تا بعونا باش تعرفو هذا أو أكثر في البرتيّات الجايّة 😘😘