عشق الشيطان : باللهجة التونسية

صدمة :

ياربي ، ما نصدقش إلي منعنا !!قالت ليلى أو هيا داخلا لدارهم
- شعرة و إلا شدنا و الله ، جاوبتها مرام ، المرة الجاية نردو بالنا أكثر
- إنت ما تعرفش طلال كي الشيطان ،  إينجم من أي بقعة يخرجلك
- يعني ، شنوا نعملوا في عمر ، الطفل يحبك راهو
- نعرف ، أنا زادا نحبو ، آما أمي لصقتني في طلال  ، منجمش نبعد عليه لازمني الفلوس متاعو
- و الحل ؟؟
- ما نعرفش ؟!!
- لازمك تختار في أقرب فرصة
- ما نجمش  إفه....! ... فجأة ، تاليفونها نوقز أو لقات عمر يطلب فاها ، هزت أو سمعتو إيقول
- ليلى وينك ياخي ؟؟
- آآآ ، ر.و.ح.ت ، قتلو بخوف
- علاه ، موش قلت بش تستنى ؟؟ سألها عمر
- أي ، آما حسيت روحي تعبت شويا ياخي روحت بيا مرام
- لاباس توا ؟؟
- أي ، خير
- آآآ ، السرفور  (serveur ) لنا قلي إلي فما  راجل قلقك و إنت خارجا ، شكون ؟؟!!
ياربي ، بش تتفضح ....
- لا هذاكا واحد متعدي ، فهم روحو أو مشا لا علينا فيه ...
- على كيفك ، المرة الجاية قلي كان قلقك حد باهي !!
- أكيد ،نخليك توا ، باي باي
- باي ، نحبك برشا .....
علقت ليلى التاليفون أو قلبها قريب بش يخرج من بقعتو بالفجعة ....
*****************
أخيرا .... وصل إل أرض الوطن بعد غياب قريب العامين ، عامين عداهم في الغربة بعيد على بلادو ، قداه توحش أرضها و توحش ناسها أو خصوصا حب حياتو إلي مانجمش ينساها حتى بعد سنين ، قرر باش يرجع أو إيصلح الغلطة متاعو ... دقايق أو هبط مالطيارة إل مطار تونس قرطاج ، وين ما كان حتى حد يستنى فيه ، شكون بش يستناه أمو خلاها في فرنسا ، أو أختو إلي في تونس ما عندوش علاقة وطيدة معاها ، كل حد على روحو ... إمشا ، ستنى الباڨاج (bagage )، خذاه أو شد الطريق إل دارهم إلي في تونس ، أو في مخو حاجة برك ... إيحب إيراها ....
***********
- آما إستقالة تحكي علاها .... صوت من وراهم تكلم أو كان آسر
- آسر الطفلة متقلقا برشا راهو ، أو قالت بش تبطل الخدمة أحكي معاها ، قال طلال
- أنا خذيت قراري ، قالت دلال
- أو أنا قتلك سامحني علي صار ، الله غالب إيصير
- أنا راني ما عادش نتحمل سي آسر إنت أكثر واحد تعرف إلي خطيبتك ما تفلّت حتى فرصة لإهانتي ، أو هاذي آخر مرة ، يزي ...
- دلال ، بربي أمسحها فيا ، ماك تعرفها مهبولة ، قال آسر 
- مهبولة تمشي إتداوي روحها ، موش تجي تسيّب في هبالها على الخلق ... جاوبت دلال
تكلم طلال :- شوف ، دلال ..
قص عليه آسر
- نقولو مدام دلال
- أنا نقوللها كيما نحب ، شوف" دَدُّو "زيد خمم
دلال  مانجمتش تشد ضحكتها أو ضحكت على  طلال
- إل هالدرجة نضحّك ياخي ، تعلم خويا ، تعلم ، قال طلال أو هوا يستفز في خوه
- طلال الموضوع مهم ، قلو آسر أو هوا منرفز أو كمّل :و إنت دلال خوذ بقية النهار راحة خمم فيه في عقلك أو أعمل رايك على راحتك
- باهي ، جاوبت دلال ...
- بش تروّح؟؟ ، سألها طلال
- أيه ، جاوبت دلال
- ما لا خلّيني نوصلك للدار
- ما تقلّقش روحك ، توا نركب في تاكسي
- لا باهيشي توا ، هاني جاي معاك
- على كيفك ، قالت دلال .... أو خرجو مع بعضهم ، وقعد آسر وحدو في قمة الغش و الغيرة متاعو ....
***************
- آ، ريڨلت كل شي
- أي ، أهوما الوراق حاضرين ، بش إنخليهم على البيرو متاعو كان قال إلي هوا لقاهم راهو ما يعرف شي ، كان سكت راهو في بالو
- زعما ننجحو يا كارولين ، راني خايفة
- لا متخافش جوليا ، ناجحين ، تي رانا عصابة و إلا ناسيا ؟؟
- أشش ، بشويا لا يسمعوك ....
أو خرجو من بيت آسر ، بعد ما نفذو خطتهم
************
- منين الطريق ؟؟ سأل طلال
- إمشي أو أنا توا نوريك ، جاوبت دلال
- حاضر ، تتدلّل ، أو خدّم الكرهبة متاعو أو مشا باش إيوصلها
- مازلت شادّا صحيح في الإستقالة ، سألها طلال
- أي ، ما فما حتى حل قدّامي
- هذا حل الضّعفاء ، إلي يهربو من المواجهة
- لا ، أنا نحب نرتاح ، تعبت من مشاكلها
- موش كان تواجهّا خير ، في كل الحالات هيا الغالطة
- أو إنت تظن إلي بش تسيّبني ، مستحيل
- ما عندها ما تعملّك
- شكون يضمنلي
- أنا
- كيفاه
- اتحبش نولي الحارس الشخصي متاعك ؟؟
- إنت ؟؟ ، قالت دلال أو هيا مصدومة من فكرتو
- علاش لا ، آما لمدة شهر بركا ، ما دامني ما نخدمش
- تحكي بجدك !
- ما لا نفدلك ، توا تشوف
- إنت مهبول !!
- ياحسرة عليك .... هوا ما كملش أو تاليفونو نوقز ، أو تطلع ليلى ... هز علاها أو قال " شتحب ، أي توا وليت تشاور ، لا ، هكّا ، لا يعني لا " أو علق علاها
- شبيك تخزرلي هكا ؟؟ سألها طلال
لا ، حتى شي ، جاوبت دلال
- ما تقلّيش مستغربة خاطرني نحكي هكا في التليفون ؟؟
_الحقيقة ، أي ، آما كان تحكي مع صاحبك عادي ، أولاد في بعضكم !!
- هههههه !! لا ، كنت نحكي مع خطيبتي
- تحكي معاها هكا !!، قالت دلال
- و علاش لا ؟ جاوبها طلال
- أنا هاني نقلّك مستحيل تعاود تحكي معاك ، قالت دلال
- علاه زادا ؟؟
- لاباس إنت تحكي مع خطيبتك هكا !!
- عادي !! مستانس
- ربي معاها الطفلة و الله ، مسكينة
_علاه ، شبيني وحش أنا بش ناكلها قلو مسكينة  ؟؟
- اما ماتعرفش تحكي مع البنات
- عيشو ما تعرفش تحكي ، كان ترا البنات إلي تجري ورايا تو تبدل رايك
- أي باين على ذوقهم هالبنات ، مخلين الاولاد الأخرين الزين و العين أو شادينك إنت
- ميسالش ، هاني بش نقبل رايك ، تو نشوفو شكون بش ياخذك إنت
- يا حسرة عليك ، توا تشوف
- علاه ، إنت مخطوبة
- كنت ياحسرة ، آما توا لا سيليباتار
- علاه ياحسرة ، ظاهر فيك كنت تحبو برشا خطيبك الأول  ، قلها طلال
- حب صغر ، أنا توا كبرت ، جاوبتو دلال
- موش صحيح ، قاللها طلال
- علاه زادا ؟؟
- ما تنساش شرطي راني ، أو نعرف العبد وقتاه يقول الصحيح ، أو وقتاش لا
- ما لا نقلك لا ، أو هوا أكثر عبد نكرهو  ، سافا
- با هي بركا ما تصيحش ، آما ظاهر فيه عملّك حاجة خايبة خلاتك تكرهو
- أي ، حاجة خايبة برشا
- كان ما تراش مانع تنجم تقلي شنيا ، كان ما يقلقكش ؟؟
تنهدت دلال أو قتلو  : خانّي مع وحدة أخرى أو نحنا مخطوبين ، مع مانكان (mannequin )
- كيفاه فقت بيه ، سألها طلال
- هيا جاتني أو جابت معاها التصاور متاعهم مع بعضهم أو حكاتلي كل شي ، في الأخر قصّيتها معاه أو هوا مشا لفرنسا بحذا أمو ... قالت هذا أو ولّات بش تبكي
- سامحني كان حيرتلك  مواجعك ، قال طلال
- لا عادي تجاوزتها الحكاية ، جاوبت دلال
- قدّاش رخاص البنات إلي هكّاكا ، تبدا مع راجل خاطب أو فرحانة  ، حاجة تقزّز
- أنا معادش إيهمني فيهم الزوز ، حاجة مالماضي توا لازمني نخزر القدام ... أهيا الدار ، هذيا ، قالت دلال
- أيّا توا نحبك تخمم مليح أو ما تتسرعش ، خوذ وقتك أو أنا كيما قتلك الشهر الجاي بكل نبقى الحارس متاعك ، باهي
- تفاهمنا يا سيدي ، جاوبت دلال أو هيا تضحك
- سلّم على أمّك ، أو قُلها يجي نهار أو نتعرّف علاها
- يَبْلَغ ، عيشك سي طلال ، قالت دلال أو جات هابطا حتى رات عبد عاطي بظهرو ليها أو واقف قريب للدار ، أو كيف دارلها تصدمت ، أو حست روحها تخنقت ، فاش يعمل هذا لنّا ، مستحيل آش جابو ، أو هبطت تجري مالكرهبة ، أو مشاتلو ، كيف راها طلال هكّاكا ما فهم شي أو هبط باش يشوف آش صار .....
**************
زعما شكون عمر إلي إيكلم في ليلى ؟؟ أو هل بش إيفيق بيهم طلال ؟؟
أو آسر زعما بش إيطيح في فخ أمو أو خالتو ولاّ لا ؟؟
- وشكون الراجل إلي لقاتو دلال قدّام دارهم ، وشنوا بش إيكون الدّور متاعو في الحكاية ؟؟
تابعونا بش تعرفو البقية ، أو ميرسي 😘😘😘