عشق الشيطان : باللهجة التونسية

مواجهة :

جات هابطا حتى رات عبد عاطي بظهرو ليها أو واقف قريب للدار ، أو كيف دارلها تصدمت ، أو حست روحها تخنقت ، فاش يعمل هذا لنا ، مستحيل آش جابو ، أو هبطت تجري مالكرهبة ، أو مشاتلو ، كيف راها طلال هكاكا ما فهم شي أو هبط باش يشوف آش صار .....
**************
وقفت دلال قدّامو أو قتلو :- فاش تعمل إنت لنّا ؟؟
- دلال ، عزيزتي ...
- ماني عزيزة حد  أو إمشي منّا وليد ، جاوبتّو دلال أو هيا منرفزة
- ما تقلّيش بدّلتني بهالكلوشار ؟؟ قال وليد
- حسّن منطقك خير لك ، جاوب طلال بغش
- ما كانش ؟؟ قال وليد بٱستفزاز
- فمّك نكسّرهولك ، باهي ، جاوب طلال
- شيهمك فيه أخطاك منو طلال ، واحد مريض هذاكا ، قالت دلال
- قلي هكا مالأول باش نفهم مع شكون قاعد نحكي  ، جاوب طلال
- دلال ، 5 دقايق بركا ، قال وليد
- لا ، أنا موش ما عندي ما نعمل يا سيد ، أو أخطاني معادش نحب نرى منظرك
- بربي 5 دقايق ، قال وليد
- ما هو قتلك لا ، ياخي ما تفهمش إنت ؟؟ قلو طلال
- شمدخلك ، إنت ولي أمرها ؟؟ قال وليد
- كان كْتب ، باهي ، جاوب طلال
- أسمعني خليني نحكي مع الطفلة عندي ما نوضحلها ، قال وليد
- أو كيف نقلّك لا ، جاوب طلال بتحدي
- شكون تسخايل في روحك إنت ، شادد بنت الناس أو تجاوب في بقعتها
- حاجة ما تعنيكش ، إتلها في روحك ، قال طلال من بين سنيه
- من وقتاش دلال ولّيت تعرف الكلوشارات ، قال وليد بتهكم
- عاود شكون الكلوشار يا مسخ ، أو قدّم طلال باش يضربو
- لا ، قتلو دلال ، سيبو ما يستحقش
- باهي على خاترك عزيزتي ، قلها طلال
- شكون عزيزتك ؟؟ قال وليد أو هوا موش مصدق
- ترى في طفلة أخرى لنا ؟؟ جاوب طلال
- قلي لا دلال ، تكلم قول حاجة
- للأسف !! قتلو دلال أو تبسيمة على فمها
- إنت ليّا أنا ، حتى حد ما يفكّك منّي ، إنت تحبني كان أنا إنت ليّا إفهم ...
كف قوي صوتو ملى البقعة الكل ، كف خرّج الغُلْ الكل ....
***********
قعد آسر وحدو شادد راسو إلي بش يتكسر بالوجيعة ، المصايب الكل جات مع بعضها ، حكاية أمو أو خالتو مع حكاية مريم أو دلال الطفلة الوحيدة إلي حبها في حياتو الكل ، بش يخسرها .... ضحك على روحو خوه نجم في شطر نهار يعمل  إلي ما نجّمش هوا يعملو في تلاثة سنين ، قداه يكره روحو و طبيعتو الباردة ، قداه فد من عيشتو هاذي ، قلق يحب إيقدّم يزّيه ... أو مبعد خرج أو خذا كرهبتو ، ماشي لوين تهزو ساقيه ....
*********
شد وليد وجهو موش مصدق أو يسمع في دلال تقلو : الكف هذا كنت لازم نعطيهولك من مدة طويلة ، إنت إنسان مريض أو مهبول ، أو أنا توا كي نولي تفشة توا نولي متاعك ، تعرف و الله الموت أقربلي من إني نرجعلك حتى بالكذب .... ما كش عبد ...
أو مشات بحذا طلال أو قتلو : هيا عزيزي ، بقعتنا موش لنا ..
جاوبها طلال : بالطبيعة نمشيو ددّو هيا ...
هوما قدمو خطوات أو يسمعو في وليد إيقول : صدّقني  الفاتورة بش تدفعوها غالية ...
دارتلو دلال أو قتلو : تحب ندفعو كاش و إلا بالتقسيط ؟؟ هههههه ، أو ضحكو أو كملو طريقهم للدار ، مبعد مشى وليد أو هوا يتمتم يتوعّد فيهم ... شويّا قلها طلال :- تعرف ولاّو عنّا برشا أعداء
- أي و الله ، جاوبت دلال
- آما إنت مالصباح تعطي في الكفوف خطيرة و الله ، إنشاء الله ما تدورش عليّا بركا  ..
- معناها رد بالك تغلط معايا ، كيما شفت مانيش ساهلة ، قالت دلال
- ماكش ساهلة بل كل والله ، أو توا نخليك ترتاح شويا ، قال طلال
- أي حتى هوا تعدّى نهار اللّطف ، زعما على شكون صبّحت ، أو غزرتلو
- ما لا حضّر روحك خاتر بش تولي تصبّح عليّا كل صباح ، جاوبها طلال بتحدّي
- أحلى على قلبي مالعسل ، نخليك ، بون نوي (bon nuit )

- ليلتك زينة ... أو خلاها دخلت للدار ، أو روّح لدارهم ....
******
- آ. كارولين تفاهمت مع العسّاس ؟؟
- شي يا جوليا ما حبّش
- شنوّا الحل توّا ؟؟
- ما عادش فاهما شي .... فجأة يسمعو في وحدة تصيح وتعيط و تكسّر في أي حاجة تجي قدّامها ، هبطولها كارولين أو جوليا ..  و تصدمو يلقاو مريم في حالة يرثى لها ، كانت تصيح وتقطع في شعرها و تقول بش نقتلكم ، ما نبرد كان ما نراك ذليلة قدامي ، إلا ما نورييييييك !!!
جاتها أمها تجري : مريم ، يا روحي شبيك آش صارلك  ؟؟
جاوبتها : ضربتني ، يا أمي أهانتني قدامو أو ما عملّلها شي ...
- فهّمني شكوني ، أو شكونو ؟؟ سألت أمها
- آسر و الكلبة إلي تخدم عندو ، قالت من بين دموعها .... كارولين من أول ما سمعت إسم آسر دارت لأختها أو صاحت فاها : - يعجبك هكا ، ريت ولدك آش عامل في بنتي ؟؟
جوليا ما عرفتش شنوا تقول ، أو مبعد تكلمت :- خلّي نفهمو الحكاية
قامت مريم أو صاحت في خالتها :- آما حكاية تحب تفهمها قلي ، الكلبة إلي تخدم عند ولدك ضربتني بكف  ، أو سيدي ولدك ما عمللها شي ، فهمت توا ، آه ، جاوبني !!
صوت من وراها تكلم :- و الله لعظيم كان ما تسكرش فمّك أو تعرف تحكي مع إلي أكبر منّك ، بش تعاود تاخو كف كيما الصباح ، آما من عندي المرّة هاذي ....
- طلال شنوا صار ولدي ، سألت جوليا
- أهيكا قتلك بنت أختك ، أو على فكرة ، راهي تستاهل إلي صار فاها كان موش أكثر
- شمعناها نستاهل ، تكلم قلّي ، صاحت فيه مريم
- يا طفلة إنت ، برّسمي ظاهر فيك تحب كف آخر ، ما عادش تصيح ما كانش لسانك نقصهولك ، باهي ، جاوبها طلال
- طلال فسّرلي شنوّا صار ؟؟ سألت جوليا
- إلي صار إنّو بنت أختك مشات للشركة تعيط و تصيح ، مبعد ولاّت تسب في  السكريتيرة متاع آسر أو تقوللها إنت فكّيتلي خاطيبي ، ياخي الطّفلة عطاتها كف على قلّة تربيتها ، فقط ، قال طلال
- أو إنت سي طلال فرحان ما دافعتش على بنت خالتك ، قالت كارولين بغش
- أنا ما كنتش غادي ، أو حتى كان كنت صدّقني الكف كانت تاخذو من عندي ، أو توّا السّلام ، طالع لبيتي ... أو مشا أو خلاّهم يتوعدو في دلال أو آسر ...
كيف طلع طلال لبيتو قعد يتذكّر فلّي صار مع دلال طفلة موش عاديّة تذكّر أوّل مرّة كيفاه راها ، أو مبعد كيفاه حشمت باش تسلّم عليه ، أو كيفاه صدمت بيه في الدروج ، أو لقاها تبكي ، كيفاه خزرتلو أو ضحكت ، كيفاه قعدت متذكرة إسمو ، كيفاه سكّتها أو قلها إلّي هوّا بش إيولّي الحارس متاعها كيفاه قالت إلي هوا حبيبها أو قتلو عزيزي ، أوّل مرة يحس بحاجة خاصّة كيف يسمع الكلمة هاذي برغم إلي ليلى ما تقلو كان هكّا ، تنرفز إلي تذكر ليلى ، تبّع فيه حتى في أحلى أحلامو ، مبعد قام وتذكّر إلي لازمو رقم دلال أو هوا نسى باش يطلبو منها ، فقام باش يمشي لبيت آسر ياخذو من عندو ... آما آسر ماكانش في البيت ستغرب ، طلبو على تاليفونو برشا مرّات ما يجاوبش، الوقت تاخّر برشا كيفاه ماروّحش؟؟ ، خزر على البيرو متاع خوه يلقى أوراق غريبة ، خذاهم في يديه أو قعد يقرى فيهم أو كانت الصّدمة ......!! 

*******
زعما شكون وليد  و شنوّا بش إيكون دورو في الحكاية ؟؟ أو آسر وين مشى ؟؟
أو طلال شنوّا الوراق إلي لقاهم ؟؟
تعرفو هذا أو أكثر في البرتيات الجاية 😘😘