مبعد ما خرج طلال حط آسر راسو على طاولة البيرو متاعو و قعد يخمم ، كيفاه بش يعمل أو يتصرف بعد إلي عرفو ،كيفاه بش يخزر إل أموا بعد اليوم لازموا يبعد علاها، المرأة هاذي مريضة تنجم تعملوا كيما عملت لبوه بالضبط ، مالأول حبت تربطوا إببنت أختها أو مبعد تولي هدرة أخرى ، لازموا يبعد، هوا في خطر كيفو كيف خوه آما طلال إينجم روحو ماهوش كيفو ، هوا توا مايحبش إيواجها و لا بش إيقول لخوه لين يزيد يفهم الموضوع أكثر ، فجأة يسمع في الباب يدق ، هز راسو أو قال : تفضل .
دخلت دلال أو فيديها برشا وراق أو قتلو : سي آسر الإجتماع بعد ساعة ، أو هذوما الوراق إلي طلبتهم البارح ..
حطتلو الوراق عالبيرو ، ياخي قلها : أقعد دلال ، عاوني باش نراجعهم نحس في روحي تاعب شويا ... قعدت دلال أو بداو في الخدمة أما آسر ما كانش كيف عادتو بل كل أو مخو ماكانش في الخدمة كانت هيا تحكي أو هوا يخزرلها أو ساكت ، أو مبعد ما كملت خزرلها أو قلها : صدقني مانيش معاك بل كل ، عندي برشا مشاكل هالأيمات
- إي نعرف ، قالت منغير ما تشعر
- آش تعرف ، قلها أو هوا مش فاهم علاش تحكي
أو هيا كانت موش عارفة آش بش تقلو ، ياربي لسانها ديما جايبلها كان المشاكل
- آااا، أو مبعد كملت بصوت واطي ، البنات المرة لخرى قالو إلي إنت فسخت الخطبة متاعك ياخي أنا نسخايل سبب المشاكل هذا ....
- إييي ، هاو البنات طلع عندهم أخباري الكل
سكتت دلال أو هبطت راسها موش عارفا شنوا تقول
أو كمل آسر أو على فموا ضحكة صغيرة
- موش مهم ،آما صدقني الحكاية هاذي موش مقلقتني ، خاترني ما خسرتهاش بالأخص إلي أنا عندي شكون في قلبي بخلافها
هزت عيناها أو هيا مصدومة منو ، هيا ستانست بيه ديما إيفرغلها قلبو آما موش لهالدرجة
- شبيك تصدمت ؟
- سامحني سي آسر آما هاذي إسمها ... آااا خيانة
-هههههههه ، خيانة هههه، كيفاه تره ؟؟
- يعني إنك تكون مخطوب لطفلة و إنت تحب وحدة غيرها
- و إنت شكون قلك إلي أنا موش نحب الطفلة الأخرى قبل حتى الخطبة !! على كل حال خليلي الوراق هذوما نحاول نعاود نراجعهم أو مبعد نمشيو للإجتماع ، تنجم تمشي
- حاضر .....
مبعد ماخرجت قعد آسر موش فاهم روحو يتمنى يصارحها و ايقلها إلي في قلبو من زمان آما مانجمش ، صعيب برشا إنوا ينجم إيقلها حاجة كيما هكا خاصة بعد إلي صارلها مع خطيبها الأول و إلي كان هوا شاهد عليه ....
************
مبعد ما خرج طلال من عند خوه كان منرفز برشا بش يحرق روحو يحب يعرف الحكاية ، يكره التصرفات هاذي متاع خوه عالاخر هو ديما حاسبو صغير أو إيعامل فيه على أساس طفل ، موش راجل بعقلوا ، هذاكا علاش خذا عهد على روحو إنو بش يعرف أو في أقرب وقت ، مبعد كلم خطيبتو ليلى باش يتقابلو آما هيا قتلو إلي عندها برشا خدمة أو عندها عرض ( هيا عارضة أزياء ) قريب برشا تحضرلو أو إلي هيا تصور توا أو ما تكمل كان في الليل يعني حتى باش يستناها لا ، فقرر باش يكلم صاحبو و عشيرو فهد يجي يعمل معاه قهوة ،.... أو كيف جا فهد سلموا على بعضهم أو قعدوا ، أو بدا طلال كالعدة بالهدرة
- تعرف و الله نحس في روحي تخنقت أو روحي طلعت مالقعدة ، قداه نحب نرجع نخدم
- بشويا على روحك ، راهو ما عندكش جمعة ملي تضربت برصاصة
- إي و أنا توا مريڨل ، نحب نرجع كالعادة
- ياخي ما سمعتش كلام الطبيب ، قال شهر ، يعني شهر
- إي ماهو زميلك هوا ، هاكا علاه تساند فيه
- لا ! لا ! آما صحتك أبجل من كل شي
- صحيت ، البدن بدني و الصحة صحتي و أنا حر فاها يعني سي الطبيب ما دخلوش
- ياخي ماكش ناوي تكبر إنت ، شهر يعني شهر ، إفهمها
فجأة سكت طلال فرد ضربة أو وجهو تقلب أو عينيه حمارو أو هو إيشوف في بلاصة وحدا ما بعدش علاها عينيه ، أو كيف راه فهد هكاكا قلو
: شبيك طلال وجهك تقلب
أو ما يفيق كان بالطفل تنطَر من بحذاه أو قام يجري من بقعتو لين وصللها ....
*************
- كيفاه قتلي ، أو هوا منين بش يعرف
- مدام جوليات ، سي عادل رجع من سويسرا
- كيفاه ، يا ربي هالمصيبة ، شنوا إلي رجعوا لنا
- بالضبط مانعرفش آما الأكيد إنو قابل سي آسر أكثر من مرة
- مستحيل ...
- هذا إلي صار مدام
- آسر ما جبدش عليه ، زعما قلو حاجة
- الحقيقة مانتصورش ، آما تو نتأكد
- باهي منا لغدوة تجيبلي الأخبار الكل
- حاضر مدام
علقت التليفون أو هيا تحس في روحها بش تدوخ ، السر إلي خباتو أكثر من 14 عام بش يتكشف ، الموت أقربلها مالنهار هذاكا مستحيل ، تقتل عادل و أولادها كان لزم المهم الفضيحة لا لا أو لا.....
***********
و أخيرا كمل الإجتماع ، آسر صايي راسو ولا يوجع أو معادش فيه ، تعب عل الأخر أو حب إيروح يرتاح ، أو قال لدلال : - أنا الحق ما عادش فيا ، نحس في راسي بش يتكسر ، بش نروح
- باهي سي آسر ، توا نكمل أنا بقية الخدمة أو غدوة تكون عندك حاضرة
- يعطيك الصحة ، و الله ما نعرش منغيرك آش كنت تعمل ...
فجأة ولاو يسمعو في حس صياح و عياط متاع مرأة ، أو مايفيقوا كان بالباب تحل بالقوي أو مريم واقفا قدامهم أو هيا تصيح و تعيط.......
**************
زعما شنوا إلي شافو طلال ؟ و علاه مريم جات لعند آسر ؟ و شنوا سر جوليات إلي تنجم تقتل على خاطرو أولادها ؟؟
تابعونا بش تعرفو هذا الكل...
****************
إنشاء الله عجبتكم ، خليولنا تعليقاتكم ، أو ميرسي 😘😘😘
أنت تقرأ
عشق الشيطان : باللهجة التونسية
Romansعندما يعشق الإنسان يكون ضعيفا أسيرا لمعشوقه سجينا لحبه لا يرى سواه و لا يلمحه إلا هو ... فما بالك إن كان معشوقك الشيطان !! " عسلامة أو مرحبا بيكم نشاء الله تعجبكم "
