سلام ♥
شلونكم غوالي ؟
اليوم اريد اسولف وياكم شوي 👇
مره من الايام جنت جاي من الشغل بالليل دخلت للبيت شفت امي بالصاله وحدها تقره بالموبايل وتبچي .. سألتها شبيج يمه ؟ گالت كلشي ماكو يمه بس هيج قريت قصه واتأثرت بيها ...
اني متعود على امي ام دميعه دائما لو لازمه القران وتبجي لو تسمع شي ع الحسين (ع) وتبجي لو تشوف شي يكسر خاطرها وهم تبجي يعني لو شافت قرد هستوه امه جابته تبچي 😐
المهم غلست عن الموضوع راحت ايام واجت ايام اسمع امي واختي دائما يسولفن قصص ناس ومتأثرات ومندمجات بالسوالف اني اگعد اتصفح بالموبايل أذن اسمع بيها الفيديو مال اليوتيوب واذن يمهن .. مع انه اني من النوع اللي كلش يكره سوالف النسوان تريد تنرفزني گعدني يم نسوان يسولفن 🌚 بس هاي اول مره يثير فضولي حديثهن... هاا وبالمناسبه القصه اللي جانن يسولفن عنها هي ( ثمار العار بالحلال )
جان اسألهم شنو هاي القصص من وين تسمعوهن يوميه تحجن بسالفه شكل ؟ گعدت اختي تشرحلي انه اكو برنامج اسمه واتباد بي قصص وروايات وهوااي كتب تگدر تقراهن تدري بيه اني كلش محب للكتب ودائما اشتريهن فقنعتني بدل ما اشتري كتاب اكدر اقره اللي يعجبني بهذا البرنامج
نزلته بالموبايل ودخلت عليه وبديت ابحث عن الكتب اللي اريدها بوقت فراغي الصراحه شفته احسن بهوااي بأنه املي وقت فراغي بي احسن ما اتابع اشياء مضيعه للوقت واتصفح بالنت بدون فائده ...ما جانت القصص العراقيه تستهويني ابد احسها ركيكه ومكرره لهذا اول روايه قريتها ( انت لي ) جانت بالفصيح اني احب الروايات اللي بالفصحى وتخيلو جنت اقره قصص خليجيه اكثر من العراقيه مادري شجنت احس ههه
الى ان لگيت الكاتبه ( زينب ماجد) قريت اول قصه منها هي ( نهوة حارث ) جان اسلوبها بالسرد لطيف وممتع مع انه تجرر بالاحداث وتطولها واحداثها تقليديه ومكرره بس اسلوب كتابتها حلو
بعدين لكيت الكاتب ( غزوان علي ) هذا البشر يا اخي نطاني واهس اكتب قصص وانطاني دافع فضيع لهذا قررت اكتب قصة واحد صاحبي قصته جانت كلش قويه تحجي عن السحر وشلون يهدم حياة الاسر والعوائل كتبت منها كم بارت ووصلت القصه لل2000 مشاهده صارت بيها هواي اشكال وناس تودي وناس تجيب تدرون بيه ما اتحمل حذفت القصه كلها ..
بالمناسبه جان حسابي ( المجهول ) بي خلل وهو انه كل الافتات متطلع عندي مجرد شاشه بيضه لافتة الرسائل والمنصه والاصدقاء وكلشي ما عدا الكتب تطلع عندي ورغم هذا جنت متمسك بي شايفين من تحبون شخص وتتقبلو بعيوبه ومتگدرون تتركو وتتخلون عنه اني جنت اعاني من هذا الاحساس حبيت الواتباد لان شفت بي ناس هوااي حابين وجودي بي واقبال الناس المعجبين بيه جانو شي غير متوقع مع انه اني عمري ما مجرب اكون فد شخص نشط بأي موقع تواصل اجتماعي .. لهذا اني سنه كامله بي اتصفح بين لافتات بيض بس تكيفت وي الوضع وگمت اعرف شلون اراسل الناس وانشر ع المنصه بطريقتي للانه الخلل للاسف جان بس بحسابي يعني ميتصلح ..!
لهذا ما جنت اتابع ناس هواي ولا اتفاعل بمنصاتهم ولا كتبهم هواي ومرات حته ما ارد ع الرسائل لان اني بالحقيقه مشايفهم ! هذا الشي اول مره احجي هنا ومحد يدري بي من قبل 😸
جاهدت هواي علمودكم جمهوري ههههه
عفت القصص وفتحت كتاب ( ثرثره بقلمي ) هذا الكتاب اللي حبه وتابعه 109 شخص ع الواتباد عمري ما قلدت احد بالنشر بي وحته اسألتي عمري ما اخذت اسأله من النت كلهن جانن اختراعي وكل مواضيعي جانت من بالي وتفكيري و فقراتي كذالك الله يشهد عليه ما قلدت ولا بشر بيهن لهذا حبو الناس حيل وصار من كتبهم المفضله هم لان جان كلشي يحتوي وشي ما مطروق ومو تقليدي ...
صار كلما يكبر الكتاب كلما تزيد الناس الحاقده والحسوده واللي تموت من تشوف بشر اعلى منها بدت حملات التسقيط من كل صوب وناحيه ههههه وصارو يطلعون عليه سوالف يابو سالف بس حته يوگعون اسمي بقيت ما مهتم وعادي لان كلهم جانو مزعطه كلمتين ميعرفون يحجون الى ان اجه يوم لگيت نفسي صاير بوسط حلقه من الناس التافهه وهمجيه والساذجه اللي حلگها ملزگ من الوصخ وفطور رجليهم ينام بيها بعير 🙂
لهذا شفت الوضع بعد ميليق بيه ابببدا وحسيت مكاني مو هنا بعد حذفت كلشي وگلت لاختي فرغيلي الحساب وحذفيليا هي شمسويه حاضره كل واحد بالمحادثات وبالمنصه وحاذفه كلشي طار الحساب ههههه
لهذا السبب هسه الناس تكول عليه متغير لان عرفت الطريقه الصح اللي اتعامل بيها وي الناس هنا ومو تغيرت علمود كلام جهال توء بس ابتعدت عن الناس المتسوه ورح اصنع مكان الي وللناس اللي تحبني وتحترمني وبس
وبالمناسبه غبت كم شهر وسويت هذا الحساب الگه نص شباب الوات صايرين نسخه ثانيه من المجهول يابه غير متت من الضحك 😂😂 ماخذين كل افكاري ومواضيعي وحته طريقتي بالكلام ومفرداتي وردودي دخيلك يا علي ماكو هيج شي قبل جنتو تحجون عليه تره وهسه كلكم صايرين مجاهيل بالعافيه عليكم 😂
لهنا خلصت اتمنى ما طولت عليكم بالحجي وادري طولت 😂 بس شفت بارت بكتاب نبگه اغلبكم يعرفها كاتبه بي مسيرتها ع الوات وحبيت الفكره وردت اسولف وياكم شصار وياي من بديت بالواتباد لحد ...
وشكراً 😂✋
