سلام ♥
شلونكم يبعد روحي ؟
اريد اخذ من وقتكم شويه واحجي بشغله تخصني 😅 تحملوني ابويه انتو ♥
وصلتني هاي الرساله ع السايت والصراحه جذبت نظري وتوقفت عدها لان الكلام عجبني والنقد المؤدب هم عجبني 👇
اني هم اتفق وياهة بنقطة التغيير ..
جنت مرح، تسولف، تضحك، حتى مو نفسية، ولتكول من ورا الوات والناس
التكرهني كوومة هنايا زعاطيط وعادي
بتهديد منك ينقضرون .. جنت اشوفك حالك حال غيرك كبشر يعني ... بس نفسيتك وروحك تختلف...
هسة مجاي احسك انت، مواضيعك كلها متقاربة لبعض نفس مواضيع الكتاب القديم والكلام جاي يتطبق واحنا شبه ملينا... وها للمعلومة 🌚 لأن انت رجال وحليوة يتابعنك اغلب البنات مو كلهن..
مو بس انت ايضا باقي كتب الشباب
أني كولد ومتابعك ... اتمنى ترجع نفسك الاولاني .. احس الحساب مهجور وبس النشر مستمر ..
يا تتوقف بالحساب والنشر...يا تتفرغ لشغلك ولحياتك وتبقى بس وي الناس التعرفهم هنا
اتمنى تتقبل الكلام... هواي اكو شرح
ردت اوصلة الك بصورة أوضح
وهاي اول مرة اكتب بمصارحة احد
وفقط للضرورة
!!!!!!!!!!!!!!!!!!!!!!!!!!!!!!!!!!!!!!
جوابي / اخويه وتاج راسي اشكرك على رسالتك وشرفتني ونورتني واحيك على اسلوبك الراقي وذوقك الرفيع ..♥
اما عن موضوع انه اني متغير والكل هنا يگلي متغير هههه ومحد جاي يگلي بشنو متغير ويوگعني ع العله ...
بس اعترف اني بطبيعتي جنت ما اضحك هواي ولحد الان اني هيج شخصيتي بالواقع اذا طلعن سنوني واني اضحك عجيبه ههههه بس جاي احاول هنا اكون اكثر سبورت واتعامل وي الناس بطريقة مرنه اكثر وهاي جاي تشوفوني اضحك وي الكل
اما عن تغير بشخصيتي وتفكيري مجاي اشوف اي تغير اني نفسي المجهول هو هو صح غيرت اسمي بس اني نفسي والدليل رغم تغير اسمي بس الكل يعرفني بس احجي ويا ويگلولي المجهول مو ؟..
لحد الان من جاي يجيني احد ع الخاص انصحه واحجي ويا مثل الاخ او الاخت ولحد الان علاقاتي سطحيه وي الكل هنا ما احب اسوي علاقات عميقه ميجي منها غير المشاكل وبس ..
وبالنسبه لكتابي اني مخلي ك مدونه الي كلما تجي ببالي فكره او موقف يصير كدامي يذكرني بموضوع احجي بي واغلب متابعاتي هنا بنات واكو بيهن مراهقات ويحبن مواضيعي وممكن يتأثرن بيهن ويستفادن ..كتابي اعتقد يختلف عن الكتب البقيه لان ما احب اخلي للضحك والتحشيش والصور والرمزيات والتعارف بدون فائده ولا رساله 🙂
اغلب البارتات اللي اكتبهن اكتبهن بالعاميه وبأسبط الالفاظ والعبارات حته يوصل للكل والكل يستوعبه ويهضمه والكلام البسيط على رغم بساطته ينحفر بالذاكره ومينسه اعتقد ...جاي انطي نصائح بطرق مختلفه مو بالطرق اللي تعودنه عليها وصارت روتين ممل
بالاضافه انه اني ما فد يوم كلت البارتات رح تكون بشكل يومي لان هذا الشي شبه مستحيل اني انسان الي اشغالي مو فارغ كل يوم ..بس من افرغ ويجي على بالي فكره اكتبها ع السريع حته ما انساها وبالتالي اني اشوف بارتاتي كلها هادفه وبيها معنى ورساله وشاهد الله غايتي مو مشاهدات ولا متابعات وشرف محمد حته مشاهدات كتابي مادري شكد 😂 ومتابعيني شوفة عينكم نقطه ببحر 😅💔..
واي شخص يطلب مني اكتب بخصوص موضوع اني مستعد ان شاء الله اكتبله ومن عيني بس المواضيع المتاشبها عذروني ما اكدر يوميه اعيد بنفس المواضيع
وكتابي هذا احسه هواااي يختلف عن كتابي القديم واحسه افضل هناك حجيت بكل المواضيع المجتمعيه بصورة مباشره وبطريقه روتينيه هنا احس تطور اسلوبي بطرح المواضيع وصار اكثر سلسل ويتقبله الشخص بطريقه اسرع واجمل
والناس اللي تعرفني وقريبه الي ابببد مگلولي تغيرت ههههه بس يجوز اللي ميعرفني هيج يكول
احبكم كلكم واموت على ربكم شلع واي شي تحبون اغيره او اطرحه او اتطرق اله كتبوليا من بطن عيني شعندي غيركم الله وكيلكم لا احبل ولا اجيب 😂😂
وشكرا 😂✋
