سلام ♥
شلونكم يا بطينات واذينات گلبي ؟ 😂♥
هاي السنه من بدايتها جانت صعبه ولحد الان الاغلب خسر بيها هواي امور وخاصه احنه هنا بالعراق بدايتها جانت ..مظاهرات وقتل ومآسي وبعدين اجت كورونا يعني مجاي نلحگ نشوف شغله حلوه بيها ..بس نكول ان شاء الله نصها الثاني احلى
طبعا اكثر المتضررين من هاي الظروف همه الكسبه اولا وثانيا الطلاب لان كلشي ما كدرو يفتهمون من السنه واكو مدارس اببد ما درسو ..صح اغلب المراحل صارت السنه بالنسبه الهم سنة عبور بس همه متضررين لان ما درسو الماده كلها بالتالي السنه التجي رح تصير صعبه عليهم ..
مثلا اول ابتدائي درسو بس كم اسبوع معناها ما لحكو يدرسون الحروف كلها شلون رح يدبروها بالثاني ؟
والمتخرجين من الكليات هالسنه المساكين راحو بالرجلين لا حفله مثل العالم لا شي كلشي ماكو
ع العموم احنه مو هذا موضوعنه اني موضوعي اليوم هو طلاب السادس ( دفعة كورونا )
انتو الصراحه مجاهدين كورونا الله يساعدكم ويعينكم جاي تدرسون بهيج ظروف صعبه .. بس من جهه ثانيه هاي السنه هي سنة حظ بالنسبه الكم قللو المواد للنص والامتحانات رح تتأخر واني متأكد الاسئله هم رح تجي سهله... لهذا لتشيلون هم
لان اهم شي بهاي المرحله راحتكم النفسيه اكثر من نص الاجابه وسيطرتك ع المواد هو يتبع الحاله النفسيه مالتك ..حاول قدر الامكان تبتعد عن المحبطات والافضل تترك كل مواقع التواصل الاجتماعي لان اخبارها تجيب المرض ...احذفهن كلهن وخلي بس اليوتيوب ..واتبع طرق حته تحافظ على حالتك النفسيه ..
1- شوكت متشوف نفسك محبط وماعندك واهس ادخل على فيديوهات محفزه حته تنطيك طاقه وحماس حته تكمل
2 - ابتعد عن السلبيه والناس المحبطين يعني اللي يلطمون وحجيهم كله حجت كورونا وكالت كورونا هذوله رح يفقدوك الامل بالحياة
3- خصصلك ربع ساعه كل يوم تمارين رياضيه حته تتنشط الدوره الدمويه ويصير اقبالك افضل للحياة ونشاطك اعلى وتركيزك اقوى
4- شرب الماء كلش مهم لتستهين بي اشرب الكميه اللي تكفيك حته تتوازن كميه الماء بالجسم وبالدماغ وهيج يزداد تركيزك والاكل الصحي هم مطلوب حته تكون معدتك خفيفه مو بطنك بيها عشر كيلوات وكوه تمشي بعد يا واهس يبقه عندك متكلي حبيبي انت ! 🌚
5 - قسم جدولك ولتبقه محتار بيمن تبدي وشنو تسوي لتخلي دراستك ع الهامش هيج رح تتأخر وتشوف نفسك كلشي مجاي تفتهم وتتوتر
6 - رتب ساعات نومك ولتنام اقل من 8 ساعات النوم مهم حته تكدر تركز ومتبقه مسطور يومك كله ...وركز على الدراسه بالنهار احسن من الليل
7- اذا عندك مشاكل بالبيت وضغوطات حاول تبتعد عنها وخلي الك غرفه خاصه تنعزل بيها حتلو فوك السطح وطنش المشاكل حته لتأثر على نفسيتك
8- سويلك يوم استراحه سوي بيها الاشياء اللي تحبها وتنطيك ايجابيه حته لتمل من الدراسه
9 - حاول تقره بصوت عالي افضل من الخافت هيج رح تحس نفسك قريت مرتين لان تقره مره وتسمع صوتك هيج رح تحفظ اسرع 🙂👏
10- لتقره لساعات طويله متواصله هيج رح يصير بيك اجهاد وتكره الدراسه وابوها وتلعب نفسك من شكو شي اسمه سادس 🚬
سوي اللي عليك وادرس عدل تره هي سنة وحده وراها رح يتقرر مصير حياتك كلها ادرس هسه حته لتتندم باجر ...وارجع واكول هاي السنه فرصه لكل واحد عنده حلم هاي فرصتك حته تحققه ..والله اتمنه اني بعمركم وامتحن وياكم هاي السنه ..
ولتكول تعبت ومليت و ما اعرف شنو ..... تره اللعب بهاي السنه مراح يفيدك ورح يخليك تخسر حلم جنت تتمناه 12 سنه ...
احجيلكم سالفه...
هذا واحد من كرايبنه جان فدمره اثول درجه اولى جنت كلش اترفز منه ومن غبائه لهذا من چنه صغار جنج مشبعه دگ ارتاح من اشوف وجهه مجعوص وهو يبجي لان جان شكله يضحك سمين مدبدب وطرن الله وكيلكم لا فهم ولا علم ..جان ابو كلما يشوف نتيجتي يتفل على ابنه لان گضه عمره رسوب واكمالات
تخيلو احنه بالمتوسطه وجان يزرع الطحين يگول حته يطلع النه شعير يكرم الله حته صوف مال طلي جان يزرع ويگلي ياابه هسه يطلع النه طليان ونبييييع ونصير طاگين ...اصفن على وجهه اگله راسك شمتمدد بي مطي لو ثور دخيله لله مو راح اشگگ هدومي شهالعقل اللي شايله انت
المهم راحت الايام واجت الايام وصلنه للسادس اني بقيت كأنما سنه عاديه مثل باقي السنوات گضيتها العب طوبه ودخلت قاعه مال حديد وابوي طبعاً گضاها عرك وياي ..يوميه شاگ طوبه حته ابطل لعب
بس هو هذا كرايبنه بقه كاعد بالبيت حته ميطلع للشارع اببد بس يدرس بحيث والله من اشوفه جنت اضحك عليه لحيته شطولها وشعره ميزينه وحته سبح ميسبح اگله خايب جريذي رح يعشش براسك شهالوصخ هو يضحك ...
حالياً هو شنو ( طبيب عام ) ما شاء الله الله يستر عليه واني محامي 😂😂
يعني النهايه السعيده للي يجتهد ويخلي هدف كدامه ويسعى اله بإراده وعزيمه وميسمع لكلام غيره ويؤمن بذاته وبقدراته ..صدگوني رح يحصل اللي يريده ورح يكون من لا شيء شي جبير ..هي سنه وحده تحدد مستقبل كامل !!
ماكو مثل فرحة النجاح من السادس ابببد ماكو فرحه اقوى منها رح تكون فخور بنفسك لتخسر هاي اللحظات ولتحرم اهلك منها ... خليك تكون فرحتهم اللي تعوضهم عن متاعب هاي السنه
وشيل فكرة التأجيل من بالك اببد لتفكر بيها الدور الاول اهم شي حاول تخلص منه وترتاح ...
اتمنالكم التوفيق جميعاً وان شاء الله كلكم تحققون اللي تريدو وتحلمون بي ....
ملاحظه / هسه يجيلي كم واحد ليش هيج حاقد ع الولد ؟ ليش هيج اخذت غيبته ؟ بابا الولد صديقي اصلا كلما اشوفه اگله هااا ابو ثرب يكوم يضحك وهذا السوالف كلها حاجيها كدامه واني حجيت بصيغه مجهوله بدون ذكر اسماء ..فمتعتبر غيبه تاج راسي انتو 🌚🚬
صدگ نسيت يگولون اذا تريد ايجابيه هاليومين اگعد يم طالب ثالث متوسط .. صدگ هذا الحجي ؟ 😂
وشكرا 😂✋
